Апэрэ оперэр къыхахыгъ
Урысыем культурэмкIэ и Министертвэ иосэшI совет Урысые Федерацием и Правительствэ игрантхэр 2019-рэ илъэсым зыратыщтхэр къыхихыгъэх.
Хэгъэгум и Правительствэ ишIухьафтынхэр музыкэмкIэ организацие 15-мэ афагъэшъошагъэх. Адыгэ Республикэм и Къэралыгъо филармоние иIофтхьабзэу «Апэрэ адыгэ лъэпкъ оперэу «Бзыикъо зау» зыфиIорэр зыцIэ къыраIуагъэмэ ащыщ. Урысыем инароднэ артистэу, композиторэу Нэхэе Аслъан ыусыгъэр концертым къыщырагъаIо.
— Урысыем и Правительствэ ишIухьафтын къызэрэтфагъэшъошагъэм тигъэгушIуагъ, — къытиIуагъ композитор цIэрыIоу, Адыгэ Республикэм и Къэралыгъо орэдыIо-къэшъокIо ансамблэу «Ислъамыем» ихудожественнэ пащэу Нэхэе Аслъан. — Филармонием исимфоническэ оркестрэрэ «Ислъамыемрэ» зэгъусэхэу Урысыем ишъолъырхэм, Абхъазым концертхэр къыщыттыщтых.
Концертхэр зыщыкIощтхэ къалэхэр мы уахътэм агъэнафэх. ЗэхэщакIохэм унашъоу рахъухьэрэм елъытыгъэу титворческэ купхэр гъогу техьащтых.
Урысыем ишъолъырхэм Нэхэе Аслъан ыусыгъэ оперэр ащыIущт, Адыгэ Республикэм ищытхъу ащаIощт. Тимузыкальнэ искусствэ тапэкIи хэхъоныгъэхэр зэришIыщтхэм тицыхьэ телъ.
Сахьидэкъо Нурбый.