Лъэпкъым итарихъ лъэуж дахэ къыхинагъ
Темыр Кавказым щызэлъашIэрэ тарихълэжь цIэрыIоу Джымэ Бубэ Мосэ ыкъор 1929-рэ илъэсым мэзаем и 4-м Адыгэ автоном хэкумкIэ къуаджэу Хьатыгъужъыкъуае къыщыхъугъ. Джымэ Мосэрэ Куцэрэ ябын-унэгъо IужъукIэ ар анахьыкIагъ. Сабый 11-м щыщэу псаоу къэнэгъагъэр зэшиплIыр ары, джыри цIыкIухэзэ адрэхэр уз зэфэшъхьафхэм арылIыкIыгъагъэх.
Джымэ Мосэ 1934-рэ илъэсым идунай зехъожьым, кIалэхэм япIун зыпшъэ дэкIыгъэр ныр ары. Хьатыгъужъыкъое колхозым ар чанэу щылэжьагъ, ихъупхъагъэкIэ адрэхэм къахэщыщтыгъ. Бубэ ышнахьыжъищ Хэгъэгу зэошхом хэлэжьагъ. Мыхьамодрэ Заурбэчрэ хьылъэу къауIэгъагъэх, контузие хъугъагъэх, зэо ужым бэ темышIэу ахэм ядунай ахъожьыгъ. Ышнахьыжъэу Ахьмэд зыдэхъугъэр амышIэу заом илъэхъан кIодыгъэ.
1935-рэ илъэсым къыщегъэжьагъэу 1944-рэ илъэсым нэс Бубэ Хьатыгъужъыкъое ублэпIэ, гурыт еджапIэхэм ащеджагъ. Тарихъыр ащ шIу езыгъэлъэгъугъэр икIэлэегъэджагъэу Шэуджэн Яхьыер ары.
Я 9-рэ классыр къызеухым, Бубэ 1944-рэ илъэсым къоджэ колхозым хэхьагъ, 1946-рэ илъэсым къыщегъэжьагъэу 1948-рэ илъэсым нэс Адыгэ кIэлэегъэджэ училищым щеджагъ. Нэужым Мыекъопэ кIэлэегъэджэ институтым чIахьи, тарихъымкIэ факультетыр 1950-рэ илъэсым къыухыгъ. Пщыжъхьэблэ илъэсибл еджапIэм кIэлэегъаджэу тIэкIурэ щылэжьагъ.
1951-рэ илъэсым Джымэ Бубэ Коммунистическэ партием аштэ ыкIи КПСС-м и Шэуджэн райком ипропагандистэу агъэнафэ. 1951-рэ илъэсым ишэкIогъу мазэ ВЛКСМ-м и Шэуджэн райком иапэрэ секретарэу хадзы. 1953-рэ илъэсым итыгъэгъэзэ мазэ къыщегъэжьагъэу КПСС-м и Адыгэ хэку комитет инструкторэу Iоф щешIэ. 1954-рэ илъэсым игъэтхапэ Джымэ Бубэ КПСС-м и Шэуджэн райком пропагандэмрэ агитациемрэкIэ иотдел ипащэу агъэнафэ. 1954-рэ илъэсым къыщегъэжьагъэу 1957-рэ илъэсым нэс Краснодар дэт къэралыгъо кIэлэегъэджэ институтым заочнэу щеджэ.
Шэуджэн районыр Кощхьэблэ районым зыхагъэхьажьым, Джымэ Бубэ Хьатыгъужъыкъое илъэсибл еджапIэу N 7-м идиректорыгъ. Шэуджэн районыр зызэхащэжьым, 1958-рэ илъэсым имэлылъфэгъу къыщегъэжьагъэу КПСС-м и Шэуджэн райком пропагандэмрэ агитациемрэкIэ иотдел ипащэ игуадзэу Iоф ышIагъ, 1960-рэ илъэсым имэлылъфэгъу къыщегъэжьагъэу а отделым ипэщагъ. 1960-рэ илъэсым ичъэпыогъу къыщегъэжьагъэу Б.М. Джымэр Грузин ССР-м шIэныгъэхэмкIэ и Академие тарихъымкIэ иинститут иаспирантурэ очнэу щеджагъ. Мыщ «Крестьянское движение Адыгеи в ХIХ в. (до 1870 г.)» зыфиIорэ кандидат диссертацием итхын ишъыпкъэу щыпылъыгъ.
Аспирантурэ ужым Джымэ Бубэ 1963-рэ илъэсым ишышъхьэIу КПСС-м и Адыгэ хэку комитет икIэрыкIэу рагъэблэгъэжьышъ, политпросвещениемкIэ Унэм иконсультантэу Iоф щешIэ. 1963-рэ илъэсым итыгъэгъазэ партием ихэку комитет илектор купмэ япащэу агъэнафэ.
1967-рэ илъэсым мэкъуогъум и 20-м Б. М. Джымэм кандидат диссертациер гъэхъагъэ хэлъэу Тбилиси щыпхыригъэкIыгъ. Профессорхэу А. Робакидзе, М. Цинцадзе ащ иIофшIагъэ осэшхо къыфашIыгъ. ШIэныгъэлэжьхэм ясовет хэтхэм зэдырагъаштэу тарихъ шIэныгъэхэмкIэ кандидатыцIэр ащ къыфагъэшъошагъ.
Темыр Кавказым исхэ лъэпкъхэм ятарихъ фэгъэхьыгъэ тхылъи 4-мэ къадэхьащтхэм ягъэхьазырынкIэ я 70-рэ илъэсхэм ыкIэхэм — я 80-рэ илъэсхэм яублэгъу Iофышхо зэрашIагъэр къэIогъэн фае. Темыр Кавказымрэ Закавказьемрэ яшIэныгъэлэжьхэр, Адыгеим щыщ шIэныгъэлэжьхэу П. У. Аулъэр, Б. М. Джымэр, М. А. Мэрэтыкъор, А. О. ХъорэлIыр, Щ. С. Шыур ыкIи нэмыкIхэр ахэм адэлэжьагъэх.
ТхылъиплIэу «История народов Северного Кавказа с древнейших времен до конца ХVIII в.», «История народов Северного Кавказа (конец ХVIII в. — 1917 г. ), «История народов Северного Кавказа от Великой Октябрьской социалистической революции до 1945 г.», «История народов Северного Кавказа в 1945 — 1985 гг.» зыфиIохэрэр къыдагъэкIынхэу агъэхьазырыщтыгъэх.
Адыгэ научнэ-ушэтэкIо институтым тарихъымкIэ иотдел ипащэу Б. М. Джымэм, нэмыкI авторхэм ягъусэу, ятIонэрэ томым ия 6-рэ шъхьэ игъэхьазырыни, икъыдэгъэкIыни иIахьышхо ахишIыхьагъ. СССР-р зызэбгырэзыжьым я 3-рэ, я 4-рэ томхэр къызэрэдамыгъэкIыжьыгъэхэри къэIогъэн фае.
А томитIур къызэрэхаутыгъэр Темыр Кавказым щыпсэухэрэ лъэпкъхэмкIэ хъугъэ-шIэгъэшхоу щытыгъ. Я 2-рэ томэу «Очерки истории Адыгеи. Советский период» зыфиIорэм Октябрэ революцием къыщегъэжьагъэу я ХХ-рэ лIэшIэгъум ия 80-рэ илъэсхэм яублэгъу нэсэу къызэлъеубыты. Пшызэ шъолъыр щыцIэрыIо шIэныгъэлэжьэу, тарихъ шIэныгъэхэмкIэ докторэу, профессорэу Г. П. Ивановыр ары ащ редактор шъхьаIэу иIагъэр. Джымэ Бубэ редколлегием хэтыгъ, революцием епхыгъэхэ хъугъэ-шIагъэхэм, граждан заор Пшызэ шъолъыррэ Адыгеимрэ зэращыкIуагъэм афэгъэхьыгъэ шъхьитIумэ ащ Iоф адишIагъ. Журналэу «История СССР» зыфиIорэми, нэмыкI тедзэгъухэми «Очерки истории Адыгеи» осэшIу къызыщыратыгъэ тхыгъэхэр къарыхьэгъагъэх.
«Перестройкэм» илъэхъан цIыфхэм блэкIыгъэм изэгъэшIэн нахь зыфакъудыи хъугъагъэ. А лъэхъаным ягуапэу тарихълэжьхэр «Iэнэ хъураехэм», тематическэ пчыхьэзэхахьэхэм къарагъэблагъэщтыгъэх. ЧIыпIэ зэфэшъхьафхэм ахэр лекциехэм къащяджэщтыгъэх, Iофтхьабзэу зэхащэхэрэм ыужкIэ бэрэ атегущыIэжьыщтыгъэх. КультурэмкIэ унэхэм, еджапIэхэм цIыфхэр ачIизыгъэх. Адыгеим итарихълэжьхэу П. У. Аулъэм, Б. М. Джымэм, Дж. Хь. Мэкъулэм, М. А. Мэрэтыкъом ыкIи нэмыкIхэм цIыфхэм яупчIэхэм джэуап гъэшIэгъонхэр къаратыжьыщтыгъэх. АНИИ-м тарихъымкIэ исектор ипащэу Б.М. Джымэр ары анахьэу упчIабэ зэратыщтыгъэр. Ахэм азыныкъо нахьыбэр Кавказ заом фэгъэхьыгъагъ.
Джымэ Бубэ ыIощтымкIи, ытхыщтымкIи лъэшэу зыфэсакъыжьыщтыгъ. Iофым еплъыкIэу фыриIэр къыриIотыкIыным ыпэкIэ бэ зэпищэчыщтыгъ. Научнэ лъапсэ фишIызэ, лъэныкъо пстэури къыдилъытэзэ, шъыпкъагъэр ылъапсэу тхэщтыгъ. Ащ иIофшIэгъабэ «Ученые записки АНИИ» зыфиIорэм, научнэ журналхэм, нэмыкI тедзэгъухэм къадэхьагъ. Я 8 — 9-рэ классхэр езыгъаджэхэрэм IэпыIэгъу афэхъущт тхылъым, «Адыгея в трех революциях» зыфиIорэм, гурыт еджапIэхэм ачIэсхэм атегъэпсыхьагъэхэ нэмыкI тхылъхэм язэхэгъэуцон хъупхъэу Iоф дэзышIагъэхэм ащыщ.
Я 80 — 90-рэ илъэсхэм адыгэхэм ятарихъ епхыгъэ зигъо IофыгъохэмкIэ научнэ IофшIэгъэ 20 фэдиз тарихъымкIэ отделым къыдигъэкIыгъагъ. Ахэм ащыщых Б. М. Джымэм инаучнэ IофшIагъэхэу «История промышленности и рабочего класса Адыгеи (1917 — 1991 гг.)», «История сельского хозяйства и крестьянства Адыгеи (1870 – 1990 гг.)» зыфиIохэрэр ыкIи нэмыкIхэр.
Идокторскэ диссертациеу «Социально-экономические отношения и классовая борьба на Западном Кавказе, 1867 — 1917 гг.» зыфиIорэр шIэныгъэхэмкIэ Грузин Академием тарихъымкIэ иинститутэу И. А. Джавахишвили ыцIэкIэ щытым къыщигъэшъыпкъэжьи, 1987-рэ илъэсым итыгъэгъазэ тарихъ шIэныгъэхэмкIэ докторыцIэр Б. М. Джымэм къыфагъэшъошагъ.
Джымэ Бубэ Адыгэ къэралыгъо университетми, кIэлэегъаджэхэм яшIэныгъэ зыщыхагъэхъорэ институтми зэпхыныгъэ пытэ ренэу адыриIагъ. Ар университетым ипрофессорыгъ, АКъУ-мрэ КубКъУ-мрэ ядиссертационнэ советхэм ахэтыгъ, Пшызэ шъолъыррэ Адыгеимрэ ятарихъ фэгъэхьыгъэ очеркхэр ытхыгъэх. Пшызэ шъолъыр щыщ шIэныгъэлэжь цIэрыIоу М. В. Покровскэм итхылъэу «Из истории адыгов в конце ХVIII —первой половине ХIХ в.» зыфиIорэм икъыдэгъэкIынкIэ ишIогъэшхо къыгъэкIуагъ.
Адыгеим итарихъ изэгъэшIэн зиIахьышхо хэзышIыхьэгъэ, лъэужышIу къэзыгъэнэгъэ Джымэ Бубэ иIофшIэгъугъэхэм ащыгъупшэрэп, ыцIэ дахэкIэ раIо.
Ацумыжъ Казбек. Тарихъ шIэныгъэхэмкIэ доктор.