Адыгеим и ЛIышъхьэу КъумпIыл Мурат Красногвардейскэ районым IофшIэгъу дэкIыгъо зыщыреIэм бэмышIэу псэупIэу Красногвардейскэм къыщызэIуахыгъэ Культурэ-гъэсэныгъэ гупчэр зэригъэлъэгъугъ.

АР-м культурэмкIэ иминистрэу Аулъэ Юрэ къызэриIуагъэмкIэ, къатищэу зэтет унакIэм гупчэ ыкIи кIэлэцIыкIу тхылъеджапIэр, район тарихъ-краеведческэ музеир, «Апэрэхэм я Движение» ичIыпIэ къутамэ ыкIи гъэсэныгъэ тедзэм иучреждениехэр чIэтых.
Адыгеим и ЛIышъхьэ Красногвардейскэ районым ипащэу Гъубжьэкъо Темур, подряднэ организацием илIыкIо, ГупчакIэм ипащэхэмрэ иIофышIэхэмрэ гущыIэгъу афэхъугъ. КъумпIыл Мурат къырагъэлъэгъугъэх IофышIэхэмрэ цIыфэу къычIахьэхэрэмрэ апае Iэры­фэгъу амалэу яIэхэр. ТхылъеджапIэм мэ­кIай зэтегъэпсыхьагъэхэу тхылъхэр зытелъыщтхэр, зыщеджэщтхэ ыкIи зызщагъэпсэфыщт унэхэр, ящыкIэгъэщт мебелыр хэтых. Музеим IыгъыпIэ, хъар­зынэщ ыкIи къэгъэлъэгъопIэ зал хэтых. НэмыкI шъолъырхэм пэIудзыгъэ шIыкIэм тетэу адэгущыIэнхэм иамал къэзытырэ интернетми конференц-залым пае къащэфыгъэ Iэмэ-псымэхэми амалышIухэр къатыщтых. Къошныгъэ зыдыряIэ муниципалитетэу Краснодар краим ит Успенскэ районым культурэмрэ гъэсэныгъэм­рэкIэ иурчеждениехэм ялIыкIохэм пэIудзыгъэ шIыкIэм тетэу зэдэгущыIэгъу адыряIэгъах.

Республикэм и ЛIышъхьэ ащ фэдэ проектышхо агъэцэкIэн зэралъэкIыгъэм пае къекIолIэгъэ пстэуми афэгушIуагъ, Гупчэм гъэхъэгъэшхохэр ышIынхэу афэ­лъэIуагъ. КъумпIыл Мурат къызэрэхигъэ­щыгъэмкIэ, культурэмрэ гъэсэныгъэм­рэ япхыгъэ программэхэр гъэцэкIэгъэн­хэмкIэ псэолъакIэм амалышхохэр къетых, цIыфхэм яфэIо-фашIэхэр а лъэныкъомкIэ нахь дэгъоу зэшIуахынхэмкIэ ишIуагъэ къэкIощт.

«Мы ГупчакIэм амалэу къытырэр зэкIэ икъоу къызфагъэфедэным мэхьанэшхо иI. Шъуирайон ищыIакIэ чанэу шъухэлажь, сэнаущыгъэ зыхэлъ кIэлэцIыкIухэм шъунаIэ атежъугъэт, ныбжьыкIэхэр кIэщакIо зыфэхъухэрэмкIи шъуадеI, шIэныгъэхэмрэ творчествэмрэ анаIэ нахь атырадзэным шъудэлажь, креативнэ технологиехэр жъугъэфедэх. ЦIыфхэм яфэшъошэ щыIэкIэ тэрэз къуаджэм щыряIэнымкIэ а пстэуми мэхьанэшхо яI», — къыIуагъ КъумпIыл Мурат.
Шъугу къэтэгъэкIыжьы: къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм къыдыхэлъы­тагъэу ыкIи партиеу «Единэ Россием» и «Народнэ программэ» епхыгъэу псэуалъэр ашIыгъ, къуаджэм ихэхъоныгъэкIэ лъэныкъо шъхьаIэхэр ащ къыхеубытэх: медицинэр, культурэр, гъэсэныгъэр, IофышIэхэр гъэхьазырыгъэнхэр. Сомэ миллион 320-м ехъу Гупчэм тефагъ. Ащ нэмыкIэу сомэ миллион 40-м ехъукIэ ящыкIэгъэ Iэмэ-псымэхэр къащэфыгъэх.
А мэфэ дэдэм республикэм и ЛIышъхьэ культурэм и Унэу Красногвардейскэм дэтым щыIагъ. Къэралыгъо программэу «Къуаджэхэм хэхъоныгъэ ягъэ­шIыгъэныр» зыфиIорэм тегъэпсыхьагъэу бэмышIэу ар агъэцэкIэжьыгъ. Инженер коммуникациехэр зэкIэ зэб­лахъугъэх, унэр ыкIоцIыкIи ыкIыбкIи зэтырагъэпсыхьагъ, къыпэIулъ чIыпIэри агъэкIэрэкIагъ, залымрэ сценэмрэ апае аппаратурэр, офисымкIэ ящыкIэгъэщт Iэмэ-псымэхэр къащэфыгъэх.

Культурэм и Унэу агъэкIэжьыгъэр КъумпIыл Мурат къыплъыхьагъ, фольклор ансамблэу «Селяночка» зыфиIорэм хэлажьэхэрэми гущыIэгъу афэхъугъ. Ансамблэм хэтхэр чанэу фестивальхэм, зэнэкъокъухэм, мэфэкI Iофтхьабзэхэу муниципалитетым ыкIи республикэм ащызэхащэхэрэм ахэлажьэх. Артистхэм амалышIухэр зэрарагъэгъотыхэрэм апае ЛIышъхьэм зэрэфэразэхэр къаIуагъ.
Адыгеим и ЛIышъхьэ къызэрэхигъэщыгъэмкIэ, культурэм иунэхэр гъэкIэ­жьыгъэнхэр къуаджэхэм яхэхъоныгъэ фытегъэпсыхьэгъэ IофшIэнышхом изы Iахь. Ныбжь зэфэшъхьаф зиIэхэм языгъэпсэфыгъо уахътэ нахь дэгъоу зэхэщэгъэнымкIэ, агукIэ зыфэщэгъэхэ Iоф­тхьабзэхэм ахэлэжьэнхэмкIэ къэкIопIэшIоу ахэр щытых.
Ащ нэужым АР-м и ЛIышъхьэ псэупIэу Красногвардейскэм дэт кIэлэцIыкIу-ныбжьыкIэ спорт еджапIэм щыIагъ. Къуаджэ­хэм язэтегъэпсыхьанкIэ программэм къыдыхэлъытагъэу ащи гъэцэкIэжьынхэр рашIылIагъэх: псэуалъэр ыкIыбкIи ыкIоцIыкIи зэтырагъэпсхьагъ, инженер системэхэр зэкIэ агъэкIэжьыгъэх, урамхэм тренажерхэр атырагъэуцуагъэх. Спортзалри зэтырагъэпсыхьагъ: зыщыджэгущтхэ, зыщыбэнэщтхэ залхэр хэтых, тренажерхэри къызфагъэфедэнхэ алъэ­кIыщт.
Спорт еджапIэу «Юность» зыфиIорэм теплъакIэу иIэ хъугъэр республикэм ипащэ зэригъэлъэгъугъ, спортсменхэмрэ тренерхэмрэ гущыIэгъу афэхъугъ. Джырэ уахътэм диштэрэ комплексыкIэу псауныгъэм игъэпытэн фытегъэпсыхьагъэр спортсменхэм ягъэхьазырынкIи, къоджэдэсхэм япсауныгъэ игъэпытэнкIи амалышIоу зэрэщытыр къыхагъэщыгъ.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.