2025-рэ илъэсым хэгъэгум и Правительствэ Iофэу ышIа­гъэм фэгъэхьыгъэ зэфэхьысыжьэу Урысые Федерацием и Премьер-министрэу Михаил Мишустиным къышIыгъэм Адыгеим и ЛIышъхьэ едэIугъ, ащ фэгъэхьыгъэу игупшы­сэхэр къыриIотыкIыгъ.

«Хэбзэ къулыкъу пстэухэмкIи, шъолъыр къулыкъухэри ахэм зэра­хэтхэу, мэхьанэшхо зиIэ хъугъэ-шIагъэу ар щыт. Илъэсым къы­кIоцI Iофэу ашIагъэм фэгъэхьыгъэ зэфэхьысыжьэу Урысыем и Пра­вительствэ и Тхьаматэ къышIыгъэр къыдэмылъытэу республикэм хэхъоныгъэу ышIыщтыр ипхъухьан плъэкIыщтэп. УФ-м и Премьер-­министрэ зэфэхьысыжь шъхьаIэу къышIыгъэхэр — Урысые Федера­цием и Президентэу Владимир ­Путиным къыгъэнэфэгъэ лъэныкъом тетэу ицыхьэ зытелъыжьэу Адыгеир ыпэкIэ зэрэлъыкIуатэрэр ары. Хэгъэгум хэхъоныгъэ езыгъэшIыщт гухэлъ зыкIым диштэу тиIофшIэнхэр зэкIэ зэхэтэщэх. Правительствэмрэ «Единэ Россиемрэ» хэхъоныгъэмкIэ игъо къытфалъэгъухэрэр зэкIэ амал зэриIэкIэ икъоу дгъэфедэнэу тыпылъ. Мы лъэныкъомкIэ гъэхъагъэхэр тшIыгъэх. 2025-рэ илъэсым шъолъырхэм арысхэм щыIэкIэ-псэукIэу яIагъэм епхыгъэу экономическэ ушэтынхэмкIэ Гупчэу «РИА Рейтинг» зыфиIорэм иэкспертхэм зэхагъэуцогъэ рейтингым Адыгеир щылъы­кIотагъ. ГъэрекIопагъэ я 18-рэ чIыпIэм щытыгъэмэ, гъэрекIо я 11-рэ хъугъэ. Къиныгъо пстэуми ямылъытыгъэу, республикэм иэкономикэ хэхъоныгъэ ешIы. ПстэумкIи Адыгеим продуктэу къыща­хьыжьыгъэр проценти 106,5-рэ хъугъэ. Унэ псэолъэшIыным зеу­шъомбгъу. КъыдэгъэкIыжьыным игъэхъагъэхэм проценти 2-кIэ ахэхъуагъ. Коцым икъэхьыжьынкIэ Урысыем апэрэ чIыпIэр къыщытхьыгъ. Инвестициехэми къа­хэхъуагъ. Ащ къикIырэр бизнесым Адыгеим инеущырэ мафэ ицыхьэ зэрэтелъыр, IофшIэпIэ чIыпIакIэхэр зэрэзэхищэхэрэр ары. ЗекIохэр проценти 165-кIэ нахьыбэу респуб­ликэм къэкIуагъэх, хэгъэгумкIэ ар ятIонэрэ къэгъэлъэгъон. Федеральнэ IэпыIэгъум ишIуагъэкIэ Адыгеим иамалхэм зыкъызэIуахы, бизнес е проектхэр АПК-м нахьыбэ щыхъугъэх, предпринимательствэ ­цIы­кIумрэ гурытымрэ заушъомбгъугъ. Социальнэ инфраструктурэм ипсэуа­лъэхэр нахь къызыфагъэфедэ хъугъэ. Хэгъэгум и Президентрэ Урысые Федерацием и Правительствэ и Тхьаматэрэ лъэшэу тафэраз республикэм хэхъоныгъэ езыгъэ­шIыщт унэе программэр зэрэлъагъэ­кIотагъэм фэшI. Къулыкъу гъэнэфа­гъэхэм пшъэрылъ афэсшIыгъ ­лъэпкъ проектхэу, къэралыгъо программэхэу республикэм щыпхыращыхэрэм шIуагъэу къатырэр агъэунэфынэу, федеральнэ гупчэм иIэпыIэгъу амал зэриIэкIэ къызыфагъэфедэнэу. УФ-м и Правительствэ и Тхьаматэ ащ фэгъэхьыгъэу изэфэхьысыжь къыщиIуагъ. Михаил Владимир ыкъом къызэрэхигъэщыгъэмкIэ, хэгъэгум иэкономикэ, цIыфхэм ящыIэкIэ-­псэукIэ зыкъягъэIэтыгъэным те­гъэпсыхьагъэу Урысыем и Президент пшъэрылъэу къыгъэуцугъэхэр гъэцэкIэгъэнхэмкIэ IэпыIэгъу лъэпкъыкIэхэр гъэфедэгъэнхэ, технологиехэр гъэкIэжьыгъэнхэ, респуб­ликэмкIэ IофшIэкIэшIоу яIэр зэлъя­гъэшIэгъэн фае. Тызэрыгъозэн фэе лъэныкъохэр къызэрэгъэнэфагъэхэм фэшI УФ-м и Правительствэ ты­фэраз. IофшIэнышхо тапэ илъ, Адыгеим хэхъоныгъэ ышIынымкIэ, тихэгъэгу нахь фэшIыгъэ хъуным ащ иIахь хишIыхьанымкIэ тапэкIи тфэлъэкIырэр зэкIэ тшIэщт» — къы­Iуагъ КъумпIыл Мурат.