Хэгъэгум иухъумакIо и Мафэ ехъулIэу игъэкIотыгъэ зэIукIэ республикэ филармонием тыгъуасэ щыкIуагъ. Адыгеим и ЛIышъхьэу, Урысые политическэ партиеу «Единэ Россием» ишъолъыр къутамэ и Секретарэу КъумпIыл Мурат ащ хэлэжьагъ.

Джащ фэдэу мэфэкI зэIукIэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Къэралыгъо упчIэжьэгъоу ТхьакIущынэ Аслъан, Къэралыгъо Советым — Хасэм идепутатхэр, министрэхэм я Кабинет хэтхэр, хэбзэухъу­мэкIо, федеральнэ, республикэ къулыкъухэм, чIыпIэ зыгъэIорышIэжьынымкIэ къулыкъухэм япащэхэр, ветеранхэр, дзэкъулыкъушIэхэр, общественнэ организациехэм ахэтхэр.

Адыгеим и ЛIышъхьэ къэзэрэугъоигъэхэм шIуфэс псалъэкIэ зафигъэзагъ. КъумпIыл Мурат зэрэхигъэунэфыкIыгъэм­кIэ, мэзаем и 23-м Хэгъэгу зэошхом иветеранхэм, дзэкIолI-интернационалистхэм, охътэ зэфэшъхьафхэм Iашэ зыIыгъэу хэгъэгум ифедэхэр къэзыухъумэгъэ пстэуми ящытхъу Урысыем щаIо. Хэ­ушъхьа­фыкIыгъэ дзэ операцием хэлажьэхэрэм ахэр ящысэтехыпIэх.

«ГущыIэ пытэу атыгъэм фэ­шъыпкъэгъэ пстэури ренэу дгъэлъэпIэщтых ыкIи тыгу илъыщтых. ЛIыхъужъ шъыпкъэхэр зыпIугъэ ны-тыхэм лъэшэу тафэраз. ДзэкIолIхэм яшъхьэ­гъусэхэми «тхьашъуегъэпсэу» ятэIо. ДзэкIолIхэмрэ ахэм яунагъохэмрэ тафэгумэкIыныр типшъэрылъ лъапI. Президентэу Владимир Путинми анахь пшъэ­рылъ шъхьаIэхэм ар ахелъытэ», — къыIуагъ КъумпIыл Мурат.

Адыгеим и ЛIышъхьэ агу къызэригъэ­кIыжьыгъэмкIэ, хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ сыд фэдэрэ лъэныкъокIи IэпыIэгъу ягъэгъотыгъэнымкIэ республикэм Iофэу щызэшIуахын фаехэмкIэ зыгъэгъуазэрэр фондэу «Хэгъэгум иухъумакIохэр» зыфиIорэм икъутам ары. Партиеу «Единэ Россием», Адыгеим ибзылъфыгъэхэм я Союз, Хэгъэгум идзэкIолIхэм яунагъохэм я Комитет ахэтхэм, ныбжьыкIэ объединениехэм, общественнэ, дин организациехэм ягуфакIохэм яIахьышхо мы Iофым хашIыхьэ. Республикэм ращырэ шIушIэ IэпыIэгъур: дзэкIолI шъуашэхэр, Iэзэгъу уцхэр, гъо­мы­лапхъэхэр хэушъхьафыкIыгъэ дзэ операциер зыщыкIорэ чIыпIэм ра­гъэ­уалIэ.

«ТидзэкIолIхэм, ТекIоныгъэ къызэрэдэтхыщтым тицыхьэ зэрателъым нахь тызэкъуегъэуцо. НепэкIэ тизэкъотныгъэ къызыщылъагъорэр дзэм IэпыIэгъу зэрэфэхъухэрэр, дзэкIолIхэм лIыгъэшхоу зэрахьэрэр, респуб­ликэмрэ Хэгъэгумрэ яхэхъоныгъэ зиIахь хэзышIыхьэрэ пэпчъ гу­етыныгъэ хэлъэу зэрэлажьэрэр ары. Тицыхьэ зытелъыжьэу ыпэкIэ тылъыкIотэнымкIэ, гъэ­хъэгъакIэхэр тшIынымкIэ ар лъэпсэ пытэу щыт», — къы­Iуагъ КъумпIыл Мурат.
Джащ фэдэу къэзэрэугъоигъэхэм апашъхьэ къыщыгущыIагъ АР-м и Къэралыгъо Совет — Хасэм и Тхьаматэу Владимир Нарожнэр. ЗэIукIэм ыуж АР-м искусствэхэмкIэ иIэпэIасэхэм мэфэкI концертышхо къатыгъ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.