НэкIмэзэ лъапIэр къызщихьащтым ехъулIэу Адыгэкъалэ мэщытыкIэ къыщызэIуахыгъ. Адыгеим, Къэбэртэе-Бэлъкъарым, Къэрэщэе-Черкесым, Краснодар краим ыкIи Урысыем инэмыкI шъолъырхэм, джащ фэдэу адыгэхэу IэкIыб къэралхэм ащыпсэухэрэм ялIыкIохэу быслъымэн диныр зылэжьырэ нэбгырэ мин пчъагъэ Iофтхьабзэм хэлэжьагъ.

Ахэм ахэтыгъэх Адыгеим и ЛIышъхьэу КъумпIыл Мурат, хабзэм игъэцэкIэкIо ыкIи ихэбзэихъухьэ къулыкъухэм ялIыкIохэр, Адыгеимрэ Краснодар краимрэ ямуфтиеу Къэрдэнэ Аскэрбый, респуб­ликэм идин ыкIи илъэпкъ-культурнэ зэхахьэхэм ахэтхэр.
Адыгеим и ЛIышъхьэ мэщытыкIэр къызэрэзэIуахыгъэм пае къэлэдэсхэми быслъымэн диным илIыкIохэми афэгушIуагъ, мамырныгъэрэ зэгурыIоныгъэ­рэ ахэлъэу, шIум фэлэжьэнхэу афи­Iуагъ. НэкIмэзэ лъапIэм икъихьэгъум а хъугъэ-шIагъэр зэрэхагъэунэфыкIырэми мэхьэнэ гъэнэфагъэ зэриIэр ащ къыхигъэщыгъ.

«Ар шIушIэным, агухэр нахь къабзэ хъунхэм, IэпыIэгъу аратыным яуахътэу щыт. Диныр зылэжьыхэрэр а уахътэм нахьышIу хъунхэм, нахьыбэрэ фэныкъо­хэм яшIуагъэ арагъэ­Iыным пылъых. Джащ фэдэу шIушIэным мэхьанэшхо езытырэ тичIыпIэгъу цIэрыIоу, предпринимателэу Сихъу Нарт ишIуагъэкIэ Адыгэкъалэ мэщытыкIэ къыдэуцуагъ. ЦIыфхэм федэ къафэпхьызэ упсэуныр ыкIи шIушIэныр къыткIэхъу­хьэхэрэм хабзэ афэхъуныр ары ислъам диным зыфигъасэхэрэр, мэщытыр языгъэшIыгъэр ахэм икъоу адештэ. Непэ къалэмрэ республикэмрэ ягушъхьэлэжьэу хъугъэ мэщытыр тапашъхьэ ит. НыбжьыкIэхэр зэкъозгъэуцохэрэ, шIошъхъуныгъэ ыкIи гукIэгъу шъыпкъэм ядесэу хъугъэ мыщ фэдэ шIуагъэ зыпылъ Iоф­тхьабзэхэм ренэу цIыфхэм агу нахь къеIэты», — къыIуагъ КъумпIыл Мурат.
Къыхэгъэщыгъэн фае: зитарихъ ЧIыгужъ къэзгъэзэжьыгъэ тилъэпкъэгъоу, предпринимателэу, псэолъэшIыным ылъэныкъокIэ Iоф зышIэрэ Сихъу Нарт ишIуагъэкIэ мэщытыр ашIыгъ. Респуб­ликэм и ЛIышъхьэ къызэрэхигъэщыгъэм­кIэ, ащ фэдэ IофтхьэбзэшIухэм цIыф лъэпкъ зэфэшъхьафхэм къахэкIыгъэхэм­рэ дин зэмылIэужыгъохэр зылэжьхэ­рэмрэ нахь зэрепхых, Урысыем ис цIыфхэм язэдегъэштэныгъэ лъэпсэ пытэ фешIы. УФ-м и Президентэу Владимир Путиным мы илъэсыр Урысыем щыпсэурэ цIыф лъэпкъхэм языкIыныгъэ и Илъэсэу зэригъэнэфагъэм дэгъоу ар зэрэдиштэрэр ЛIышъхьэм къыхигъэщыгъ.

АР-м и ЛIышъхьэ и УказкIэ респуб­ликэм ихэхъоныгъэ, социальнэ институтхэм ягъэпытэн, дин зэфэшъхьафхэр зылэжьхэрэм азыфагу зэгурыIоныгъэ илъыным иIахьэу ахишIыхьагъэм пае республикэм иапшъэрэ тынэу, медалэу «Адыгеим и Щытхъузехь» зыфиIорэр Сихъу Нарт фагъэшъошагъ. Ащ нэмыкIэу Адыгэкъалэ инароднэ депутатхэм я Совет ышIыгъэ унашъом къыпкъырыкIыхэзэ, мэщытыкIэр зытет урамым Сихъу Нарт ыцIэкIэ еджагъэх, ежь, шIушIэным емызэщырэ цIыфым, щытхъу­цIэу «Адыгэкъалэ ицIыф гъэшIуагъ» зыфиIорэр къылэжьыгъ.
Джащ фэдэу мэщытыкIэр къызэрэзэIуахыгъэм пае Адыгэкъалэ дэсхэм ыкIи республикэм щыпсэурэ быслъымэн пстэуми къафэгушIуагъ Адыгеимрэ Краснодар краимрэ ямуфтиеу Къэрдэнэ Аскэрбый. Темыр Кавказым ис быслъы­мэнхэм я Координационнэ гупчэ ыцIэкIэ орденэу «Гушъхьэлэжь байныгъэхэр гъэпытэгъэнхэм пае» зыфиIорэр Сихъу Нарт къыритыжьыгъ.
«ЦIыф лъэпкъ зэфэшъхьафхэм къа­хэкIыгъэхэм ыкIи дин зэмылIэужыгъохэр зылэжьхэрэм языкIыныгъэ, язэкъошныгъэ, яшъхьэкIэфэныгъэ итамыгъэу мэщытыр хъунэу зэкIэми сафэлъаIо», — къыIуагъ муфтиим.
Ащ нэужым мэщытым икъызэIухын къыщыгущыIагъэх Адыгэкъалэ инахьыжъхэм я Совет, адыгэхэу IэкIыб къэралхэм ащыпсэухэрэм ялIыкIохэр. Ахэм къыхагъэщыгъ Сихъу Нарт ишIухьафтын мэхьанэшхо зэриIэр ыкIи зэрэфэразэхэр раIуагъ.
Мэщыт хъоо-пщаур, къалэм анахь щагъэлъэпIэрэ ыкIи ар къэзгъэдэхэрэ псэуалъэхэм зыкIэ ащыщыр, 2023-рэ илъэсым ашIынэу рагъэжьэгъагъ. ПстэумкIи квадрат метрэ 1700-м ехъу ащ еубыты, азэнэджапIэу мэзэныкъохэр зытетхэм илъэгагъэ метрэ 32-м нэсы. Архитекторэу Къэзэнч Мурат иунэе проекткIэ ашIыгъэ мэщытыр Иран къыращыгъэ мыжъом къегъэдахэ. Мыщ нэмаз зыщашIыщт унэу хэтым нэбгырэ 1200-м нэс чIэфэщт, имамхэм апае кабинетхэр, Iэрыфэгъоу щыт классхэу гъэсэныгъэ сыхьатхэр зыщызэхащэщтхэр, амдэз зыщаштэщт ыкIи нэмыкI унэхэр хэтых. Джырэ нэс къызфагъэфедэщтыгъэ мэщытым чIыпIэхэр зэращыфимыкъущтыгъэхэм иIофыгъо зэшIохыгъэным телъытагъэу проектым иавторхэм гупчакIэр агъэпсыгъ, гъэсэныгъэ, шIушIэн Iофтхьабзэхэр республикэм щыпсэурэ быслъымэнхэм щызэшIуахынхэмкIи мэхьанэшхо зиIэ чIыпIэу ар щытыщт.
АР-м и ЛIышъхьэ ипресс- къулыкъу къытырэ къэбархэмкIэ Тхьаркъохъо Сафыет.