Адыгэ къэралыгъо университетым истудентитIу кIэлэегъэджэ ныбжьыкIэхэм апае тхылъ къыдэгъэкIыгъэным хэлэжьагъэх.

Педагогикэмрэ психологием­рэкIэ факультетым иящэнэрэ курс щеджэрэ Алина Ляликовар ыкIи адыгэ филологиемрэ культурэмрэкIэ факультетым ияплIэнэрэ курс ис Светлана Головановамрэ студент гъэсэныгъэ Iофтхьабзэу «КIэлэегъэ­джэ марафон» зыфиIорэм хэ­лэжьагъэх. Ар мэфиплIырэ щыкIуагъ шIэныгъэмкIэ гупчэу «Мэщыкъу» зыфиIорэм. Программэм къыдыхэлъытагъэу кIэлэегъэджэ ныбжьыкIэхэм апае практическэ IофшIэныр зэхагъэуцуагъ.
ЗэкIэмкIи программэм хэлэ­жьэнхэу Урысыем щыщ нэбгырэ миным ехъумэ ятхы­гъэхэр атыгъагъ. Зэнэкъокъум кIэлэегъэджэ сэнэхьат зэзыгъэгъотырэ студенти 150-рэ пхырыкIыгъэр.
МэфиплIым студентхэм экспертхэр ягъусэхэу кIэлэ­егъэджэ ныбжьыкIэхэм яIоф­шIэн нахь псынкIэ зышIыщт лъэныкъохэр агъэунэфыгъэх, шIэныгъэм ыкIи гъэсэныгъэм япхыгъэ методикэ зэфэшъхьаф­хэм нэIуасэ афэхъугъэх. КIэлэегъэджэ пэрытхэм мы сэнэхьатыр къызIэкIэзыгъэхьэрэ студентхэр ягъусэхэу кIэлэ­еджакIохэм янэ-ятэхэм Iоф зэрадэпшIэщтыр агъэунэфыгъ, хъугъэ-шIэгъэ зэфэшъхьафхэм екIолIакIэу къафэбгъотыщтхэр агъэнэфагъэх. IофшIэным изэ­фэхьысыжь хъугъэ тхылъ цIыкIоу къыдагъэкIыгъэр.
«КIэлэегъэджэ ныбжьыкIэ­хэм Iоф ашIэнэу гъэсэныгъэ учреждением къызыкIохэкIэ, гумэкIыгъохэм аIокIэх. Зы лъэныкъомкIэ, ахэр зэшIопхынхэр къинхэп, ау кIэупчIэнхэр ашIоемыкIоу къыхэкIы. Ащ пае тхылъ цIыкIу къыдагъэкIыгъ, ащ кIэлэегъэджэ ныбжьыкIэхэр нахь зыгъэгумэкIын ылъэ­кIыщт упчIэхэр щызэхэфыгъэх», — шIэныгъэмкIэ гупчэм ипащэу Антон Сериковым къыIуагъэу ащ ипресс-­къулыкъу къытыгъ.
ДжырэкIэ зэхэщакIохэм тхылъ цIыкIум гъэцэкIэжьынхэр рашIылIэх, бэ темышIэу «Мэщыкъом» ителеграм-канал къихьащт.
— ШIэныгъакIэхэр, гухэ­лъыкIэхэр тиIэх. Новосибирскэ, Тверь, Санкт-Петербург, Владивосток, Томскэ, Москва, инэмыкI къалэхэм къарыкIыгъэ кIэлэегъаджэхэм, студентхэм нэIуасэ тафэхъугъ. ШIэныгъэу зэдгъэгъо­тыгъэмкIэ тилэгъухэм тадэ­гощэным тыфэхьазыр, — къы­Iуагъ Алинэ.