КIымафэм иаужырэ мазэу мэзаер къихьагъ. Сыд фэдэщта ом изытет?

ЛатиныбзэкIэ «февралым» къи­кIырэр зыгъэкъэбзэжьыныр ары. Ижъырэ Урысыем мы мазэм илъэсыр зэфишIыжьыщтыгъ, ащ къыхэкIэу «меженькIэ» еджэщтыгъэх. Тэ тикъыблэ лъэныкъокIэ мэзаем зэреджэхэрэр «ветродуй». Мафэм икIыхьагъэ, зэрэ­нэфынэщтым хахъозэ джы лъы­кIо­тэщт, сыхьатитIу фэдиз къы­х­эхъощт.
ГидрометеорологиемкIэ ыкIи тыкъэзыуцухьэрэ дунаим имониторингкIэ Гупчэм ипащэу Александр Митровым тызэрэщигъэгъозагъэмкIэ, мэзаем температурэр зыпкъ итыщтэп. ГурытымкIэ мазэм температурэр ыкIи ощх-осэу къехыщтыр шапхъэхэм афэдизыщт, нахьыбэуи къыхэ­кIыщт. Мазэм арктикэ жьы чъы­Iэр, джащ фэдэу средиземноморскэ лъэныкъом къикIырэ фабэр щыIэщтых. Къещхыщт, нэужым ос цIынэр къыкIэлъыкIощт. КъызыщыучъыIырэ уахътэм мылыр чъыгхэм ыкIи электричествэм ирыкIуапIэхэм апишIыхьащт. Ошъуапщэу, гъогухэр цIэнлъагъоу къыхэкIыщт. Жьыбгъэр нэгъэупIэпIэгъум метрэ 15-м ехъоу къепщэщт.
Мы аужырэ илъэс 80-м мэзэе мазэр нахь чъыIэу къызщыхэкIыгъэр 1950-рэ илъэсыр ары, градус 31,6-рэ агъэунэфыгъагъ. Анахь фэбагъэр 2016-рэ илъэсыр ары, градус 24-рэ щыIагъ.
Апэрэ мэфипшIыр. Чэщым чъыIэу градуси 5 щыIэщт, къы­хэкIыщт чъыIэр градуси 10-м нэсэуи. Мафэм фабэу градуси 5 — 10 щыIэщт.
ЯтIонэрэ мэфипшIыр. Чэщым градуси 2 — 7 щыIэщт, фабэр градуси 8-м зыщынэсыщт мафэ­хэри къыхэкIыщт.
Ящэнэрэ мэфипшIыр. Мэзаем икIэухым чэщым чъыIэу гра­дуси 3 щыIэщт, къызыучъыIыкIэ, градуси 10-м кIэхьащт. Мафэм фабэр градуси 10-м нэсыщт.
Мы мазэм бжыхьасэхэм чъы­Iэр къягоощтэп. Псыхъохэм адэт псыр шапхъэу щыIэхэм ашIокIыщтэп. Къушъхьэхэм ателъ осыр къызщигъэжъурэ уахътэм ыкIи лъэшэу къызещхырэм, псыхъохэм адэт псыр къыдэкIоещт.
КIАРЭ Фатим.