АР-м и ЛIышъхьэу КъумпIыл Мурат зичэзыу IофшIэгъу дэкIыгъо иIагъ, пыим тхьамыкIагъоу къафихьыгъэм къыхэкIэу зэхэкъутэгъэ унэхэр зыпкъ игъэуцожьыгъэнхэмкIэ чанэу IофшIэнхэр зыщылъыкIотэхэрэ къуаджэу АдыгеякIэм щыIагъ.

КъумпIыл Мурат IофшIэнхэр зэрэкIо­хэрэм зыщигъэгъозагъ, анахьэу ынаIэ зытетыгъэр зэрар зыхьыгъэ цIыфхэм лъэныкъо пстэумкIи IэпыIэгъу ятыгъэным фэгъэхьыгъэ унашъоу ыпэкIэ афи­шIыгъагъэхэр гъэцэкIагъэ зэрэхъухэрэр ары.
«Тэ типшъэрылъыр, амал зэриIэкIэ, анахь пIэлъэ кIэкIхэм яунэхэр зыпкъ игъэуцожьыгъэнхэмкIэ цIыфхэм тишIуа­гъэ ядгъэкIыныр ары. Унашъоу ыпэкIэ тштэгъагъэхэр зэкIэ икъоу гъэцэкIагъэ хъунхэ фае. Зэрар зыхьыгъэ унагъо пэпчъ псэунымкIэ щынэгъончъэ амал тэрэзхэр едгъэгъотынхэр типшъэрылъ», — къыхигъэщыгъ Адыгеим и ЛIы­шъхьэ.

Тэхъутэмыкъое районым ипащэу Шъэо Аскэр къызэриIуагъэмкIэ, комиссиехэу фэтэрхэр къэзыплъыхьэхэрэм, ахэр зиунаехэм гущыIэгъу афэхъухэрэм, акт­хэр зэхэзыгъэуцохэрэм, зэрарэу ахьыгъэр зыфэдизыр зыгъэунэфхэрэм яIоф­шIэн лъэкIуатэ. НепэкIэ фэтэр мин 1,4-м ехъу къаплъыхьагъ, ахэм ащыщэу фэтэр 981-мэ ямылъку фыкъуагъэу агъэунэфыгъ.
Шъугу къэтэгъэкIыжьы: ошIэ-дэмышIагъэ зыхэлъ тхьамыкIагъоу къэхъугъэм къыхэкIэу фэтэр 30-мэ ыкIи унэе псэупIэ заулэмэ зэрар ахьыгъ. Анахьэу корпусэу N 15-р ары зэрарышхо зыхьыгъэр. Тхьамэфи 5-м фэтэрхэу анахь зэрары­шхо зыхьыгъэхэр агъэцэкIэжьыщтых, тхьамэфи 2-м — нахь макIэу фыкъуагъэхэр ары. Республикэм ипсэолъэшIхэм акIуачIэкIэ унэхэр зэкIэ зыпкъ рагъэуцожьых. КъумпIыл Мурат пшъэрылъ зэрафишIыгъэм тетэу социальнэ пшъэ­дэкIыжь зыхьырэ псэолъэшI компание заулэмэ якIочIэ шъхьаIэхэр АдыгеякIэм къыфагъэзагъэх.

НепэкIэ IофшIэнхэр етIупщыгъэу ма­кIох: зэхэкъутэгъэ конструкциехэр зэпкъырахых, хэкIыр дащы, псэолъапхъэхэр къыIуащэх. Джырэблагъэ унашъхьэхэм япхыгъэ IофшIэныр аухыгъ. Пчъэ ыкIи шъхьаныгъупчъэ блыпкъхэр ашых, пчъэ 50 фэдиз зэблахъугъах. Щылэ мазэм ыкIэм ехъулIэу шъхьаныгъупчъэхэри хагъэуцощтых. ПсэолъэшI компание зэфэшъхьафхэм а зы уахътэм IофшIэнхэр зэдагъэцакIэх, зэкIэми чIыпIэ гъэ­нэфагъэхэр атегощагъэх.
Адыгеим и ЛIышъхьэ псэолъэшI орга­низациехэу Iофышхо зыплIэIу изылъхьа­жьыгъэхэм ыкIи пIэлъэ кIэкIым ахэр зэшIуахынхэу къэзыгъэгугъагъэхэм инэу зэрафэразэр къыIуагъ. Графикыр амыу­къоу ипIалъэм зыпкъигъэуцожьын Iоф­шIэнхэм янахьыбэр зэшIохыгъэ хъуным пае афэлъэкIыщтыр зэрашIэщтымкIэ псэолъэшIхэм къагъэгугъагъэх.

Къэплъыхьанхэм ялъэхъан хэушъхьафыкIыгъэу анаIэ зытырадзагъэр анахь лъэшэу зэрар зыхьыгъэ унэр ары. Экспертхэм игъоу алъэгъугъэхэм адиштэу нахь игъэкIотыгъэу а псэуалъэм IофшIэнхэр щызэшIуахыщтых. Фэтэрыбэу зэхэт унэм иунашъхьэ псэолъэшIхэм агъэцэ­кIэжьыгъах, конструкциякIэхэм яшIын, шъхьаныгъупчъэ ыкIи пчъэ блыпкъхэм ягъэцэкIэжьын фежьагъэх. Унэ кIоцIхэм ащагъэцэкIэрэ IофшIэным дакIоу унэ гупэри зыпкъ рагъэуцожьы. Республикэм и ЛIышъхьэ унэм епхыгъэ IофшIэнхэр амал зэриIэкIэ нахь псынкIэу ыкIи нахь дэгъоу гъэцэкIэгъэнхэм пае пшъэрылъ тедзэхэр афишIыгъэх. ПIэлъэ кIэкIым къыкIоцI зэтырагъэпсыхьажьыгъэ псэу­пIэхэм цIыфхэр ачIэхьажьынхэмкIэ а пстэуми яшIуагъэ къэкIощт. НепэкIэ пIэ­лъэ гъэнэфагъэкIэ зычIэсыщтхэ пункт ахэм къафызэIуахыгъ. Зэрар зыхьыгъэ нэбгырэ 25-рэ ащ щыI. Щэгъогогъо агъашхэх, зыщычъыещтхэ чIыпIэхэр афагъэнэфагъэх, транспортыр къаIэкIагъахьэ, загъэкъэбзэнымкIэ ящыкIэгъэ амалхэр арагъэгъотых. А чIыпIэм дежурствэр щахьы социальнэ ыкIи ме­дицинэ IофышIэхэм, администрацием илIыкIохэм.

КъумпIыл Мурат къоджэдэсхэм гущыIэгъу афэхъугъ ищыкIэгъэ Iофтхьа­бзэхэр зэкIэ тэрэзэу зэшIохыгъэ хъунхэм пае ахэм къаIохэрэр зэфихьысы­жьыным фэшI. Зэрарэу ахьыгъэм уасэ фашIэу актхэр зызэхагъэуцохэрэ нэужым мылъку IэпыIэгъоу аратыщтымкIэ унашъохэр аштэщтых, зиавтомобиль стыгъэ­хэри ахэм къахеубытэх. ПэшIорыгъэ­шъэу къызэратыгъэмкIэ, машинэ 92-рэ зэщыкъуагъ, 27-р стыгъэ. Зитранспорт фыкъуагъэхэм сомэ мин 500 зырыз афалъэ­гъужьыщт, зимашинэ стыгъэхэм — сомэ миллионым нэс. Республикэм ахъщэу ахэм апэIухьащтыр къыхигъэкIыщт.
«КъыдгурэIо унэ заулэмэ ащыпсэу­хэрэм зэрарышхо зэрахьыгъэр. Мылъку IэпыIэгъоу яттыщтыр унэхэр зыпкъ игъэуцожьыгъэнхэмкIэ псэолъэшIхэм непэ яшIогъэшхоу къагъакIорэм ебгъэп­шэн плъэкIыщтэп. Ащ пае унашъо аштэгъагъ хьатырэу IэпыIэгъу къафэхъущт псэолъэшIхэр къызфэгъэфедэгъэнхэу. ЗэкIэ фэтэрхэр икъоу зыпкъ рагъэуцожьыщтых. ТхьамыкIагъор къызыхъугъэм лъыпытэу IофшIэнхэр аублагъэх ыкIи тхьамафэ хъугъэу ахэр макIох. Къулыкъу гъэнэфагъэхэмрэ подряднэ организациехэмрэ ащ лъыпытэу IэпыIэгъур аублагъ. ЗэкIэ муниципалитетхэм ягуфакIохэр, депутатхэр, партиеу «Единэ Россием», Народнэ фронтым, ныбжьыкIэ организациехэм ялIыкIохэр IэпыIэгъушхо къафэхъугъэх. ТкIуачIэ зэхэлъмэ цIыфхэм щыIэкIэ-псэукIэу яIагъэм къыфагъэзэжьынымкIэ тишIуагъэ ядгъэкIын тлъэкIыщт», — къыIуагъ КъумпIыл Мурат.
Пыим къинышхоу цIыфхэм къафихьыгъэм икIэуххэм ядэгъэзыжьын къуаджэу АдыгеякIэм щылъэкIуатэ, шIушIэ IэпыIэгъур къалъэIэсы, республикэм ипащэхэм анаIэ атетэу оперативнэ штабым Iоф ешIэ.
Шъугу къэтэгъэкIыжьы: ошIэ-дэмышIагъэ зыхэлъ тхьамыкIагъоу АдыгеякIэм къыщыхъугъэм икIэуххэм ядэгъэзы­жьын епхыгъэ упчIэ пстэумкIи кол-гупчэу 122-м зыфэжъугъэзэн шъулъэ­кIыщт. Ащ иIофышIэхэм хэти зыгъэгумэкIырэ упчIэр атхыщт ыкIи Тэхъутэмыкъое районым иадминистрацие е нэмыкI къулыкъум аIэкIагъэхьащт Iоф дашIэным пае.
Фэтэрхэр зиунаехэу республикэм е ащ нэмыкI чIыпIэхэм ащыпсэухэрэм зигугъу къэтшIыгъэхэм зафагъэзэн алъэ­кIыщт. Унэхэм зэрарэу ахьыгъэр зыгъэу­нэфырэ комиссиехэм яIофшIэн нахь тэрэзэу зэхащэнымкIэ ащ мэхьанэ иI.
Кол-гупчэу 122-м IофшIэгъу ма­фэхэм пчэдыжьым сыхьатыр 8-м къыщегъэжьагъэу пчыхьэм сыхьатыр 8-м нэс, гъэпсэ­фыгъо мафэхэм — сыхьатыр 8-м къыщыублагъэу мафэм сыхьатыр 2-м нэс Iоф ешIэ. Ащ нэмы­кIэу Тэхъутэмыкъое районым идис­петчер къулыкъу телефон номерэу 8-918-400-66-66-мкIэ чэщи мафи шъу­фытеон шъулъэкIыщт.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.