ЦIыф зэрымыс быбырэ пкъы­гъо­хэм яоператорэу рагъэджэнхэшъ, зэзэгъыныгъэ шIыкIэм тетэу къулыкъу ахьын амал щыIэ зэрэхъугъэм фэгъэхьыгъэ Iофтхьабзэу Мыекъопэ дзэ комиссариатым зэхищэрэр лъэ­кIуатэ.

Мызыгъэгум Адыгэ къэралыгъо университетым и Мыекъопэ къэралыгъо гуманитар-техническэ колледж къулыкъушIэхэр еблэгъагъэх, гурыт сэнэхьат зэзыгъэгъотырэ студентхэм гущыIэгъу афэхъугъэх.
Зэзэгъыныгъэ шIыкIэм тетэу къулыкъу зыхьын мурад зиIэхэм джы цIыф зэрымыс быбырэ авиацием епхыгъэу джы япшъэрылъхэр агъэцэкIэнхэ зэралъэкIыщтыр ныбжьыкIэхэм ашIогъэшIэгъоныгъ. Iофтхьабзэм ипэублэ дзэ егъэджэн Гупчэм ипащэу Нурлан Самадьяновым быбырэ пкъыгъохэр зэрэзэтекIыхэрэр, ахэр зэрагъэфедэхэрэр къэзэрэугъоигъэхэм къафиIотагъ.
Мыекъопэ дзэ комиссариатым къулыкъу зыхьыщтхэр къыхэхыгъэнымкIэ иинструктор шъхьаIэу, прапорщикэу Михаил Волчанскэм БПЛА-м иоператор ухъуным шэпхъэ гъэнэфагъэу пылъхэр къафиIотагъ. УФ-м зыкъэухъумэжьынымкIэ и Министерствэ мэзитIурэ хэу­шъхьафыкIыгъэ дзэ частым щыригъэджэщтых. Зэзэгъыныгъэм зы илъэс пIалъэкIэ кIэтхэх, ащ хэхьэ мэзитIу егъэджэнхэри, ащ дакIоу зэтыгъо ахъщэ тынэу сомэ миллиони 2,4-рэ къаратыщт, мазэ къэс сомэ мин 230-рэ къафатIупщыщт. ­Илъэс пIалъэр заухыкIэ, къэкIожьынхэ алъэ­кIыщт, шIоигъоныгъэ зиIэхэм ар лъагъэ­кIотэн амал яI.

Мыщ фэдэ зэIукIэгъухэм яшIуагъэкIэ хэгъэгум икъэухъумэн зиIахьышIу хэзылъхьэ зышIоигъо ныбжьыкIэхэр агъэу­нэфых, амалэу яIэхэр къафаIуатэх. Мы шIыкIэм ишIуагъэкIэ Iашэ амыIыгъэу, окопхэм адэмысхэу пыим ебэныщтых, ятIонэрэ, ящэнэрэ линием тетхэу япшъэ­рылъхэр агъэцэкIэщтых. КъызагъэзэжькIэ, лъэныкъо зэфэшъхьафхэмкIэ фэ­гъэкIотэнхэр яIэщтых.
Iофтхьабзэр лъагъэкIуатэ, тыгъуасэ кIэлэегъэджэ колледжэу Андырхъое Хъусен ыцIэ зыхьырэм истудентхэм къулыкъушIэхэр гущыIэгъу афэ­хъугъэх.
.ДЕЛЭКЪО Анет.