АР-м и ЛIышъхьэу КъумпIыл Мурат иунашъокIэ республикэм игъэцэкIэкIо хэбзэ къулыкъухэм япащэхэм дэкIыгъо зэхэсыгъо Мыекъопэ районым щыряIагъ. ХэушъхьафыкIыгъэ дзэ операцием хэлэжьагъэхэм ыкIи ахэм яунагъохэм социальнэ IэпыIэгъоу арагъэгъотырэм ар фэгъэхьыгъагъ.

Iофтхьабзэм хэлэжьагъэх къэралыгъо фондэу «Хэгъэгум иухъумакIохэр» зыфи­Iорэм ишъолъыр къутамэ ипащэу ПIатIыкъо Аслъан, АР-м мэкъу-мэщымкIэ ими­нистрэу Къуанэ Анзаур, гъэсэныгъэм­рэ шIэныгъэмрэкIэ министрэу Евгений Лебедевыр, дзэ операцием иветеранхэр, яунагъохэр, нэмыкIхэри.
IэпыIэгъур
Мыекъопэ район администрацием ипащэу Михаил Марьиным къызэрэхигъэщыгъэмкIэ, федеральнэ гупчэр ыкIи Адыгеим и ЛIышъхьэ яIэпыIэгъоу хэушъхьафыкIыгъэ дзэ операцием хэлэжьагъэхэм ыкIи ахэм яунагъохэм ящыкIэгъэ IэпыIэгъур арагъэгъоты. Нахь игъэкIотыгъэу къатIомэ, фэгъэкIотэнхэр яIэх, ыпкIэ хэмылъэу медицинэ фэIо-фашIэхэр афагъэцакIэх, IофшIэпIэ чIыпIэхэр арагъэгъотых, нэмыкIхэри.
Фондэу «Хэгъэгум иухъумакIохэр» зыфиIорэм икъутамэ чанэу районым щэлажьэ, дзэкIолIхэм сыд фэдэрэ лъэныкъокIи ящыкIэгъэ Iофыгъохэр афызэшIуахых.
— ХэзгъэунэфыкIымэ сшIоигъу, 2025-рэ илъэсым хэушъхьафыкIыгъэ дзэ операцием хэлэжьагъэ­хэм яунэгъо 200-м ехъурэмэ материальнэ IэпыIэгъоу сомэ миллион 25,8-рэ, чIыгу Iахь 18-рэ яттыгъ. Дзэ опе­ра­цием къыхэкIыжьыгъэ нэбгырэ 16-мэ реабилитацие, 56-мэ — диспансеризациер акIугъ. Ветеранхэм якIэлэцIыкIу 340-м ехъур ыпкIэ хэмылъэу агъашхэх. Сомэ мин 500-м ехъоу аугъои­гъэмкIэ хэушъхьафыкIыгъэ дзэ операцием хэлажьэхэрэм ящыкIагъэу къызкIэлъэIу­гъэ­хэр къафащэфыгъэх, — къыIуагъ М. Марьиным.
Фондэу «Хэгъэгум иухъу­макIохэр»
Шъолъыр фондым ипащэу ПIатIыкъо Аслъан къызэриIуагъэмкIэ, къызыщызэIуахыгъэм къыщегъэжьагъэу ащ нэбгырэ 4200-м ехъурэмэ зыкъыфагъэзагъ, ахэм Iофыгъо 14100-м ехъу къырахьы­лIагъ. Ащ щыщэу процент 96-р афызэшIуахыгъ.
— ХэушъхьафыкIыгъэ дзэ операцием къикIыжьыгъэ нэбгыри 130-мэ сэкъатныгъэ яI. ЦIыфхэм IофшIэн ягъэгъотыгъэнымкIэ Гупчэмрэ фондымрэ язэдэлэжьэныгъэ ишIуагъэкIэ ахэм япроцент 80-р IофшIапIэхэм аIуагъэхьагъэх. Дзэ­кIолIэу къэзыгъэзэжьыгъэхэм япроцент 90-м диспансеризациер акIун алъэкIыгъ, процент 92-м психологическэ IэпыIэгъу арагъэгъотыгъ. Сыд фэдэрэ Iофыгъуи изэшIохын тисоциальнэ координаторхэр фэхьазырых, тызлъыплъэ­хэрэм зэпхыныгъэ адыряI, — хигъэунэфыкIыгъ ПIатIыкъо Аслъан.
Грантхэр
ХэушъхьафыкIыгъэ дзэ операцием хэлажьэхэрэм мэкъу-мэщым ылъэныкъо­кIэ IофшIэн агъотыным пае грант IэпыIэгъоу зекIохэрэм министрэу Къуанэ Анзаур къатегущыIагъ. Фермер хъызмэт­шIапIэхэм хэхъоныгъэ ашIынымкIэ грант IэпыIэгъоу сомэ миллиони 5-м къыщегъэжьагъэу миллион 30-м нэс зытелъы­тэгъэ программэр агъэцакIэ. Ащ хэлажьэрэм иунэе мылъкоу проценти 10-м къыщегъэжьагъэу процент 40-м нэс хилъхьан фае.
Грант IэпыIэгъум ихэушъхьафыкIыгъэ программэу «Агромотиватор» зыфиIорэм сомэ миллиони 7 къыдыхэлъытагъ, ар былымхъуным фытегъэпсыхьагъ ыкIи сомэ миллиони 5 фэдизыр — чIыгулэжьыным. 2025-рэ илъэсым а программэм сомэ миллиони 8, 2026-м —сомэ миллион 15 къыфыхагъэкIыгъ.

Цумпэ лъэпкъ зэфэшъхьафхэр къэзыгъэкIырэ хъызмэтшIапIэхэм IэпыIэгъу ятыгъэнымкIэ программэм сомэ миллиони 3,5-рэ къыдыхэлъытагъ. А ахъщэм агъэтIысхьащтыр ыкIи ар зэралэжьыщт пкъыгъохэр къыращэфынхэ алъэкIыщт.
— 2025-рэ илъэсым ащ фэдэ IэпыIэгъу нэбгырэ 30-мэ аратыгъ, къихьэгъэ илъэсым а программэм сомэ миллиони 100 пэIуагъэхьанэу агъэнэфагъ. Хэу­шъхьа­фыкIыгъэ дзэ операцием хэлэжьагъэхэм ыкIи ахэм яунагъохэм программэм игъэцэкIэн иедзыгъо пэпчъкIэ хэушъхьафыкIыгъэ IэпыIэгъу арагъэгъо­ты. Ащ хэлажьэрэр къулыкъум кIонэу зырихъухьэкIэ, ыпэкIэ грант IэпыIэгъу къыратыгъэу щытмэ, ащкIэ пшъэдэкIы­жьэу иIэр фагъэгъу, — къыхигъэщыгъ Къуанэ Анзаур.
Мэкъу-мэщымкIэ министрэм егъэджэн программэу «Фермерым иеджапI» зыфиIорэр зытегъэпсыхьагъэр, шIэныгъэу щызэрагъэгъотын алъэкIыщтхэр къэзэрэугъоигъэхэм къафиIотагъ.
АмалыкIэхэр
Дзэ операцием хэлэжьагъэхэм ыкIи ахэм яунагъохэм тапэкIэ социальнэ IэпыIэгъоу арагъэгъотыщтыгъэр зэкIэ 2026-рэ илъэсым зэрэлъагъэкIуатэхэрэр АР-м IофшIэнымкIэ ыкIи социальнэ хэхъо­ныгъэмкIэ иминистрэ иапэрэ гуадзэу Екатерина Леоновам къыIуагъ. Зы IэпыIэгъу кIэу къежьагъ — мы купэу зигугъу къэтшIыхэрэм хахъоу е щыкIагъэу яIэм яемылъытыгъэу, яунэе бизнес хэхъоныгъэ ышIынымкIэ, еджэнхэмкIэ е ашъхьэ фэлэжьэжьынхэмкIэ социальнэ зэзэгъыныгъэр агъэпсын алъэкIыщт. Ащ пае шъолъыр фондым зыфагъэзэн фае.
ХэушъхьафыкIыгъэ дзэ операцием хэлэжьагъэхэр зыгъэгумэкIырэ упчIэхэр зэхэсыгъом къекIолIэгъэ пащэхэм занкIэу афагъэзэн амал яIагъ. ЛъэIоу къырахьылIагъэр зэкIэ атхыгъ, ахэр афызэшIуахынхэу къагъэгугъагъэх.
Iэшъынэ Сусан.