«УФ-м мэкъумэщ хъызмэтымкIэ изаслуженнэ IофышI» зыфиIорэ щытхъуцIэр къыфагъэ­шъо-­
шагъэу джырэблагъэ къызэратыжьыгъэхэм ащыщ Александр Данилиныр. Ар Джэджэ рай­о­ным имэкъумэщ зэхахьэу «Восход» зыцIэм имеханизатор.

— Сэ сылэжьэкIо къызэрыкIу, губгъом нахь чыжьэ сыкIорэп, арышъ, ащ фэдэ тын лъапIэ ныбжьи сежагъэп, — къыIуагъ Александр гущыIэгъу тызыфэхъум. — Ау сырэгушхо, ащ фэдэу си­IофшIэн осэ ин къызэрэфашIыгъэр сигуап, сипащэу сызгъэлъэ­гъуагъэм «тхьауегъэпсэу» есэIо. ЩытхъуцIэм сэркIэ мэхьанэшхо иI, пшъэдэкIыжьыр джыри нахьыбэ ащ къешIы.
Александр хъызмэтшIапIэу зыщыла­жьэрэм иконторэ тыщыIукIагъ. Джыдэдэм губгъо IофшIэн зыпари зэрямыIэр нафэ, ау ащ пае къэмынэу гупсэфэу щысырэп, иунэгъо Iоф ыгъэтIылъэу, къыдэкIэу итрактор изытет зэригъэлъэгъоу, хэIэзыхьэу бэрэ къыхэкIы.
Мэкъумэщ хъызмэтым илъэс 40-м ехъу ащ ритыгъ. Станицэу Джаджэм къыщыхъугъ, щапIугъ. 1985-м гурыт еджапIэр къызеухым, зыпарэми ишIэ­ныгъэ щылъимыгъэкIуатэу ащыгъум щыIэгъэ колхозэу «Урысыем» хэхьэ­гъагъ. Дзэ къулыкъум ыуж ащ къы­гъэзэжьыгъагъ.
1990-рэ илъэсхэм хэгъэгум зэхъо­кIыныгъэу къихъухьагъэхэм адакIоу колхозхэри зызэхэзыжьхэм, «Возрож­дение» зыцIэ хъызмэтшIапIэм хэхьа­жьыгъ. Джы зыхэт «Восходыр» загъэ­псым, ащ зи­гъэзэ-
жьыгъэу илъэс 21-м ехъугъэу щэлажьэ.
Илъэсыбэхэм гъэтхэ-бжыхьэ уахътэм тракторым тесэу чIыгум дэлажьэщтыгъ, лэжьыгъэр хилъхьэщтыгъ, гъэмафэм комбайным зигъазэти Iуихыжьыщтыгъ. Джы къызэриIуагъэмкIэ, комбайныр ныбжьыкIэхэм афигъэзэжьыгъ, тракторым Iоф решIэ.
— Сянэ-сятэхэу къагъэшIагъэм инахьыбэм мэкъумэщ хъызмэтым щылэжьагъэхэр щысэтехыпIэ сфэхъугъэх, — ыIуагъ Александр. — Сятэ сыдигъокIи пэрытныгъэр ыIыгъэу лэжьагъэ, ыцIэ шIукIэ раригъэIуагъ. СицIыкIугъом къыщыублагъэу ар сынэгу кIэтыгъ, сыригъу­сэуи бэрэ къыхэкIыгъ. Тракторыр зэрэгъэпсыгъэми, комбайныр зэрэзэхэтыри синэIуасэхэу сыкъэтэ­джыгъ. Арышъ, еджэпIэ ужым зыздэзгъэзэщтыр теубытагъэ хэлъэу сшIэзэ сыкъычIэкIыгъагъ.
Илъэс тIокIитIу хъугъэу имафэхэр зэкIэри зэфэдэх пIоми хэгъэхъуагъэ хъущтэп. Джырэ фэдэ кIымэфэ уахътэм зыгъэпсэфыгъо тIэкIу къекIу, адрэ къа­нэрэм ащ фэдэ къыхэкIыжьырэп. Мы лъэныкъом щылэжьэрэ пстэуми афэдэу, пчэдыжьым жьэу иIофшIэн регъажьэ. Сыхьатыр блы мыхъузэ техникэм къе­кIуалIэ, ар егъэхьазыры, гъэстыныпхъэр регъахъо, етIанэ шъофым ехьэ. Мэзахэ мыхъоу ащ къикIыжьырэп. Ащ фэдиз илъэс пчъагъэм зы пчэдыжь закъуи гужъуагъэу IофшIэ кIуагъэу е джыри нэфынэу шъофым къикIыжьыгъэу къы­шIэжьырэп.
— Арэущтэу тянэ-тятэхэм тагъэсагъ. Пшъэрылъэу къыпфагъэуцурэр хэзыгъэ имыIэу бгъэцэкIэныр, игъом зищыкIагъэм, IофшIапIэм изакъоп, уекIолIэныр шIокI зимыIэу зэрэщытыр, чIыгум цIыфыр зэригъашхэрэр, лэжьыгъэ къэбгъэкIыныр зэрэпшъэдэкIыжьышхор, нэмыкIыбэхэр тицIыкIугъом къыщегъэжьагъэу къыдгурагъаIозэ ты­къэтэджыгъ. Арышъ, ащ тышIо­кIын тлъэкIыщтэп, — ыIуагъ ащ.
Александр къызэриIуагъэмкIэ, пцэ­жъыеешэныр икIас, ау ащ пае уахътэу къызхигъэкIышъурэр мэкIэ дэд. Ощххэр къызэкIэлъыкIуагъэхэу, губгъо IофшIэнхэр къызэтеуцохэмэ, тIэкIурэ псым Iусэу къыхэкIы.
Арэу щытми, мэкъумэщ хъызмэтым зыкъызэрэхигъэнагъэм, къалэм щыпсэу­нэу зэрэмыкIуагъэм, иеджэн зэрэлъимыгъэкIотагъэм рыкIэгъожьэу къыхэкIыгъэп. ИщыIэныгъэ икIэрыкIэу ригъэ­жьэ­жьынэу амал къыратыгъэми, нэмыкI гъогу къыхимыхыщтгъагъэу еIо.
НасыпышIоу зелъытэжьы. Унагъо иI. Ишъхьэгъусэу Евгение нэжъ-Iужъхэр зы­щаIыгъхэм Iут. Зы пшъашъэ зэдапIугъ. Викторие медсестра, район сымэ­джэщым щэлажьэ.
— Мамырныгъэ ташъхьагъ иты­нэу, тичIыгухэм лэжьыгъэ бэгъуагъэ къытат зэпытынэу, пхъорэлъф цIыкIухэр къэслъэгъужьынхэу, ахэр къысэрыгушхонхэу ары ныIэп
сызкIэхъопсырэр, — ыIуагъ Александр.
ХЪУТ Нэфсэт.