ИIэнатIэ къыгъэтIылъыгъ
Сергей Шевелевым Кавказ биосфернэ заповедникымрэ Шъачэ илъэпкъ паркрэ япэщэ IэнатIэ къыгъэтIылъыгъ.
УФ-м экологиемрэ чIыопс къэкIуапIэхэмрэкIэ иминистрэ ар къэзыушыхьатрэ тхьапэм кIэтхэжьыгъ.
Сергей Шевелевыр чIыопсым икъэухъумэн зыдэлажьэрэр илъэс 43-рэ хъугъэ. 2002-рэ илъэсым къыщегъэжьагъэу Кавказ заповедникым ипэщагъ, 2023-м къыщегъэжьагъэу Шъачэ лъэпкъ паркым ипащэ иIэнатIэ ыгъэцэкIагъ. Шъугу къэдгъэкIыжьын, Кавказ къэралыгъо биосфернэ заповедникыр чIыгу гектар мин 300 фэдиз мэхъу. Пшызэ шъолъырым, Адыгеим ыкIи Къэрэщэе-Черкес Республикэм ячIыналъэхэр къызэлъеубытых. С. Шевелевым ищыIэныгъэ зэрэщытэу пIоми хъунэу ащ епхыгъ. Анахь илъэс къинхэу заповедникыр зыпхырыкIыгъэхэр иIофшIэгъу лъэхъан тефагъэх. Лэжьэныр зыщыригъэжьакIэм чIыопс ухъумапIэм изытет дэй дэдагъ: шIэныгъэ ыкIи заповедникым икъэухъумэнкIэ IофшIэнхэр щызэтезыгъагъэх, хэбзэнчъэ шэкIоным зыщиушъомбгъугъагъ, псэушъхьэу хэсыр мэкIэ дэдэ хъугъагъ. А пстэур С. Шевелевым зыпкъ ригъэуцожьын ылъэкIыгъ. Непэ Кавказ заповедникыр ЮНЕСКО-м къыгъэгъунэрэ КъохьэпIэ Кавказым ыгупч. ИчIыналъэ къызэрэухъумагъэмкIи хэсымрэ къыщыкIырэмрэ язэмылIэужыгъуагъэкIи анахь пэрытхэм ащыщ.
Шъыхьэ лъэпкъышIур чIыопс ухъумапIэм щэбагъо, шъхьафит лъэпкъ закъоу щыIэ къушъхьэ домбаим изэтегъэуцожьынкIэ проектыр щыгъэцэкIагъ, заповедникым лIэшIэгъур хигъэунэфыкIыгъ ыкIи хэхъоныгъэшIухэр лъегъэкIуатэх.
ИIэнатIэ къыгъэтIылъыгъэми, ищыIэныгъэкIэ Iофэу ышIагъэм фэшъыпкъэу къызэрынэрэр
С.Шевелевым игущыIэ къыщыхигъэщыгъ.
Анцокъо Ирин.