Урысыем илъэпкъ творческэ купхэм я Союз изэфэс Адыгэ Республикэм икъэлэ шъхьаIэ щыкIуагъ. Сэнаущыгъэ зыхэлъ творческэ купхэм анахь дэгъухэм япащэхэр, Росконцертым илIыкIохэр, культурэм иIофышIэхэр ащ хэлэжьагъэх. Урысыем илъэпкъ­хэм языкIыныгъэ и Илъэс къыдыхэлъытагъэу ар рагъэкIокIыгъ.

Адыгеим имызакъоу тихэгъэгу ишъо­лъыр 37-мэ къарыкIыгъэ лIыкIо 43-рэ Iофтхьабзэм зэфищагъ. Урысыем ­илъэпкъ творческэ купхэм я Союз изэфэс хабзэ хъугъэу илъэс къэс тихэгъэгу ишъолъыр зэфэшъхьафхэм ащэкIо. Мызыгъэгум апэрэу тиреспубликэ ар щыкIуагъ.
Лъэпкъ творческэ купхэм я Союз итхьаматэу, Дагъыстан щылэжьэрэ къэ­ралыгъо академическэ къэшъокIо ансамблэу «Лезгинка» зыфиIорэм игенеральнэ пащэу Джамбулат Магомедо­вым зэфэсым пэублэ гущыIэ къыщишIыгъ ыкIи зэрищагъ.
— Урысыем и Президентэу Владимир Путиным къытфигъэуцугъэ пшъэрылъхэм ащыщ лъэпкъ культурэм икъызэтегъэнэн тыдэлэжьэныр. Лъэпкъ искусствэм ибаиныгъэ къашъом ыбзэкIэ къэзыгъэлъэгъорэ творческэ купхэр зэкъотхэу зэрэлэжьэщтхэм яамалхэм татегущыIэщт. Гастрольхэр, Iофтхьа­бзэхэр зэхэтщэщтых, ащ дакIоу цIыфхэм ягушъхьэбаиныгъэ хэд­гъэхъощт. IэпэIэсэныгъэу тIэкIэ­лъымкIэ тызэхъожьыщт, — къы­Iуагъ Джамбулат Магомедовым.
АР-м и ЛIышъхьэу КъумпIыл Мурат ыцIэкIэ къэзэрэугъоигъэхэм шIуфэс къарихыгъ АР-м иминистрэхэм я Ка­бинет и Тхьаматэ игуадзэу, финанс­хэмкIэ министрэу Виктор Орловым. Iофтхьабзэм мэхьанэшхо зэриIэр игущыIэ къыщыхигъэщыгъ.
— Лъэпкъыбэ зыщыпсэурэ Урысыем ицIыфхэр мамырэу зэдэпсэух. Ахэм яхабзэхэр, якультурэ къау­хъумэ. Лъэпкъхэм язэкъошныгъэ гъэпытэгъэным ыкIи тикъэралыгъо хахъо ышIыным афэшI ти­творческэ купхэм Iоф зэдашIэн фае. Шэн-хабзэхэм, лъытэныгъэмрэ зэгурыIоныгъэмрэ якъызэтегъэнэн ыкIи яхэгъэхъон культурэм иамалкIэ лъыдгъэкIотэщт, ащкIэ къыттефэрэр дгъэцэкIэщт, — къыIуагъ Виктор Орловым.
Ащ ыуж АР-м культурэмкIэ иминист­рэу Аулъэ Юрэ зэфэсым хэлажьэхэрэм закъыфигъэзагъ. Хэгъэгум илъ лъэпкъ зыкIыныгъэр гъэпытэгъэным мэхьанэшхо зэриIэр ащ ипсалъэ къыщыхи­гъэщыгъ.
— Лъэпкъхэм языкIыныгъэ — тикIуачI, тикъэкIощт уахът, тызэгъусэмэ, тихэгъэгушхо ифедэ пае лъэгэпIакIэхэм танэсыщт, — къы­Iуагъ Аулъэ Юрэ.
— Непэрэ зэфэсым мэхьанэшхо иI. Лъэпкъ культурэм ибаиныгъэ къагъэлъэгъоным творческэ куп-
хэр пылъых. ТызгъэгумэкIырэ уп­чIэхэр Iофтхьабзэм къыщытIэ­тыщтых, — къыIуагъ къэралыгъо академическэ къэшъокIо купэу «Кабардинкэм» ипащэу Атэбый Игорь.
Зэфэсым къыщаIэтыгъэ Iофыгъохэр ыкIи пшъэрылъэу зыфагъэуцужьыгъэхэр зэкIэ мы охътэ благъэм шъолъырхэм ащызэшIуахыщт.
Лъэпшъыкъо Фатим.