Урым-рим бэнэнымкIэ Къыблэ федеральнэ шъолъырым ипер­венствэ къалэу Шъачэ щыкIуагъ. Зыныбжь илъэс 21-м шIомыкIыгъэхэр ары зызыушэты­гъэхэр. ПсэупIэу Яблонов­скэм испортсменхэм гъэхъэгъэ­шIухэр ашIыгъэх, медалиплI къахьыгъ.

Адыгэ Республикэм, Къалмыкъым, Къырым, Краснодар краим, Волгоград ыкIи Ростов хэкухэм ялIыкIохэр зэнэкъокъугъэх, текIоныгъэм ыкIи хагъэунэфыкIырэ чIыпIэхэм афэбэнагъэх. Тэхъутэмыкъое районым олимпийскэ резервым испорт еджапIэу N 3-м зыщызыгъасэхэрэм ухьазырыныгъэ дэгъу зэряIэр джыри зэ къагъэшъыпкъэжьыгъ. ЦIэгъошIу Дамир, Шъоумыз Амир ыкIи Нэхэе Рэмэзан текIоныгъэр къафагъэшъошагъ. Данил Тетовым джэрз медаль къыхьыгъ.
Урысыем ипервенствэу Ямало-Ненецкэ автоном хэкум щыкIощтым Адыгеир ыкIи Къыблэ федеральнэ шъолъырыр къащагъэлъэгъонэу тиспортсменхэм фитыныгъэ къыдахыгъ.