ГандболымкIэ къэралыгъом иныбжьыкIэ первенствэ хэлэжьэрэ «АГУ-Адыиф-2-м» 2026-рэ илъэсымкIэ апэрэ ешIэгъуитIу Мыекъуапэ щыриIагъ.

Командэу «Астраханочка-­СШОР-р» тихьэкIагъ. ЗэIукIэ­гъуитIури гъэшIэгъонэу кIуагъэх, гандболисткэхэм ухьазырыныгъэ дэгъу къагъэлъэгъуагъ.
Адыгеим икомандэ итренерэу Анна Гармашевар ыпэкIэ «Астраханочка-СШОР-р» ыгъасэщтыгъ. Ар Мыекъуапэ къызэкIом, Астрахань ешIэкIуитф къыздырищыгъ, ахэм къэлэпчъэIутри ахэт.
Апэрэ зэIукIэгъум иапэрэ тайм типшъашъэхэм къадэхъугъ, пчъа­гъэр зэфэдизэу ар аухыгъ. Ау ятIо­нэрэ едзыгъом хьакIэхэр хэпшIыкIэу нахь щылъэшыгъэх, 22:32-у ешIэгъур ахьыгъ. Астрахань игандболисткэхэу Дарья Цвикаловамрэ Мария Зайцевамрэ зэгъусэхэу бысымхэм якъэ­лапчъэ Iэгоо 15 къыдадзыгъ. Республикэм икомандэ хэтхэм нахь къахэщыгъэр Софья Пивень, ащ къэлапчъэм Iэгоуи 8 дидзагъ.

ЯтIонэрэ зэIукIэгъум титренер­хэм зэфэхьысыжьхэр ашIыгъэх нахь мышIэми, текIоныгъэр къыдахын алъэкIыгъэп. Арина Горн, Мария Зайцевам ыкIи Наталья Хлюстовам дэгъу дэдэу зыкъа­гъэлъэгъуагъ.
Непэ ыкIи неущ Адыгеим икоман­дэ турнир таблицэм яхэ­нэрэ чIыпIэр щызыIыгъ «Динамо-Синара-2-м» дешIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «ЦСКА-2» — 55.
2. «СК КК Черноморочка-2» — 41.
3. «Лада-СШОР» — 38.
4. «Кубань-2» — 36.
5. «Астраханочка-СШОР» — 35.
6. «Динамо-Синара-2» — 34.
7. «Луч-2» — 20.
8. «АГУ-Адыиф-2» — 18.
9. «Ростов-Дон-3» — 18.
10. «Звезда-2» — 17.
11. «СШОР N 5 — Университет-2» — 7.
12. «СШ N 13 Алиса» — 1.