Лъэпкъ культурэхэм ыкIи фольклорым яфестивалэу Краснодар щызэхащагъэм илауреат хъугъэ КодэшъхьапIэ щыщ художественнэ ансамблэу «Жъогъобыныр».

Тхьагъушъэ Мариет зипэщэ артист ныбжьыкIэхэр Краснодар краим итворческэ куп 12-у финалым ихьагъэхэм ахэтхэу гала-концертым хэлэжьагъэх.
«Жъогъобынэу» зызэхэщагъэр илъэс 30 зэрэхъугъэр икIыгъэ илъэсым хэзыгъэунэфыкIыгъэм фестивалым къашъоу «ТекIоныгъэм уасэу иIэр» зыфиIорэр къыщигъэлъэгъуагъ, ар зикIалэхэр заом зыгъэкIотэрэ нэу гукъэкIыжь щэхъу къызфэмынагъэм фэгъэхьы­гъагъ.
— Пчыхьэзэхахьэр а къашъомкIэ зэфашIыжьыгъ, цIыфхэми осэшIхэми агухэр ащ зэхигъэхьагъэх, — къыщыкIагъэтхъыгъ ТIопсэ шъолъыр администрацием. — Залым чIэс цIыфмэ нэпсэу къырагъэхырэм нафэ къышIыгъ къашъор дэгъу дэдэу зэрагъэуцугъэр, ар «къызэрагъэгущыIагъэр», псэм лъыIэсэу къызэрашIы­шъугъэр. «Жъогъобыным» хэт артистмэ яIэпэIэсэ­ныгъэ икъу фэдизэу къызэIуахыгъ ыкIи къэшъо искусствэмкIэ цIыфхэм адэгущыIагъэх.
— ШIоикъо щыщ Шъхьэлахъохэм яунагъо итарихъ къашъом ыбзэкIэ къэтIотагъ, — къыхигъэщыгъ «Жъо­гъо­быным» ипащэу Тхьагъушъэ Мариет. — Зэшъхьэ­гъусэхэ Къасполэтрэ Чэбэхъанрэ Хэгъэгур къаухъумэ­нэу якIэлибгъу, къорэлъфищыр ыкIи зы нысэр агъэ­кIуагъэх, къэзыгъэзэжьыгъэхэр якIэлитIурэ къорэлъфи­тIумрэ. ТичIыгогъумэ лIыхъужъныгъэу зэрахьагъэр, зэрэпсэемыблэжьыгъэхэр лIэуж пчъагъэхэм яшIэжь хэлъыщт, агъэлъэпIэщт, Хэгъэгум шъыпкъэныгъэу фыряIагъэр патриотизмагъэм ищысэу къахьы зэпытыщт.