ЦIэ лъапIэ къыфагъэшъошагъ
ИлъэсыкIэм ипэгъокIэу Адыгэ къэралыгъо университетым ишIэныгъэлэжьхэм я Совет игъэкIотыгъэ зэхэсыгъо иIагъ.
АКъУ-м ипресс-къулыкъу макъэ къызэригъэIугъэмкIэ, зэхэсыгъом къыдыхэлъытагъэу илъэс пчъагъэхэм къакIоцI университетым щылажьэрэ кIэлэегъаджэхэу IэпэIэсэныгъэшхо зиIэхэр, научнэ гъэхъагъэхэр зышIыгъэхэр къэралыгъо бгъэхалъхьэхэмкIэ къыхагъэщыгъэх. Ахэм ащыщ педагогикэ шIэныгъэхэмкIэ кандидатэу, доцентэу Къоджэшъэо Мэджыдэ, ащ цIэ лъапIэу «Адыгэ Республикэм физическэ культурэмкIэ изаслуженнэ IофышI» зыфиIорэр къыфагъэшъошагъ.
Мэджыдэ ШIоикъо къыщыхъугъ. Адыгэ къэралыгъо кIэлэегъэджэ институтым (джырэкIэ АКъУ-м) физическэ пIуныгъэмкIэ ифакультет къыухыгъ. 1989-рэ илъэсым къыщыублагъэу IэнэтIэ зэфэшъхьафхэм аIутэу университетым щэлажьэ: ассистентэу, кIэлэегъэджэ шъхьаIэу, доцентэу, АКъУ-м физическэ культурэмкIэ ыкIи дзюдомкIэ и Институт научнэ IофшIэнымкIэ ипроректорэу… Джащ фэдэу Къоджэшъэо Мэджыдэ докторскэ диссертационнэ советым шIэныгъэлэжь секретарэу охътабэрэ иIагъ. Илъэс пчъагъэхэм футболымкIэ университетым ихэшыпкIыгъэ командэ ипэщагъ.