ТIопсэ шъолъырым иадминистрацие сэнаущыгъэ зыхэлъ ныбжьыкIэу къыщыхагъэщыгъэхэр щагъэшIуагъэх. Пащэу Сергей Бойкэм кIэлэеджакIохэу еджэным, ушэтын IофшIэным, творчествэм ыкIи спортым алъэныкъокIэ гъэхъагъэхэр зышIы­гъэхэм муниципальнэ шIухьафтынхэр аритыгъ.

ТIопсэ муниципальнэ шъолъырым иадминистрацие ишIухьафтын ыкIи лауреатым и Диплом зэратыгъэхэм ащыщ Агуй-Шапсыгъэ щы­псэоу, искусствэхэмкIэ кIэлэцIыкIу еджапIэм икIэлэеджакIоу Нэгъуцу Салим.
Салим орэд къеIо, музыкальнэ Iэмэ-псы­мэ зэфэшъхьаф­хэм къарегъаIо, хореографическэ ансамблэу «Шапсыгъэ нэфылъэхэр» зыфи­Iорэм хэтэу къэшъо, къэлэ ыкIи район зэхахьэхэм къащатырэ концертхэм чанэу ахэлажьэ. Шъачэ щыкIогъэгъэ зичэзыу зэнэкъокъум Селим текIоныгъитIу къыщыдихыгъ: лъэныкъоу «Аккордеон-соло» зыфиIорэмкIэ Гран-при, лъэныкъоу «Лъэпкъ пщынэмкIэ» — апэрэ чIыпIэр. Музыкальнэ колледжым чIэхьанэу зегъэхьазыры.
Джащ фэдэу Iофтхьабзэм щагъэшIуагъ Александр Киселевым ыцIэ зыхьырэ кIэлэцIыкIу художественнэ еджапIэм икIэлэеджакIоу Алхъэо Софие. Софие художественнэ творчествэм ишъыпкъэу пылъ, краим щызэхащэгъэ я III-рэ зэIухыгъэ зэнэкъокъу-фестивалэу «Сабыигъор. Творчествэр. Сэнаущыгъэр» зыфиIорэм Гран-при къыщыдихыгъ, дунэе зэнэкъокъоу «Киселевым фэдэу сурэт сэшIы», фестивалэу «Шъо зэфэшъхьафхэм ялэгъупкъопс» ыкIи къэгъэлъэгъонэу «ШIэ­жьым исыхьат» зыцIэхэм ахэлэжьагъ.
Ныбэ Анзор.