Урысые политическэ партиеу «Единэ Россием» ипроектэу «ПсэупIэ-коммунальнэ хъызмэтым иеджапI» зыфиIорэм къыдыхэлъытагъэу зэха­щэгъэ зэнэкъокъум къалэу МыекъуапэкIэ текIоныгъэр къыщыдэзыхы­гъэхэр тыгъуасэ къыхагъэщыгъэх.

«Унэ анахь дэгъур. Щагу анахь дэгъур» зэреджагъэхэр Iофтхьабзэм, фэтэрыбэу зэхэт унэхэр ары хэлэжьагъэхэр. Партийнэ проектым игъэIорышIакIоу, Мыекъуапэ инароднэ депутатхэм я Совет итхьаматэ игуадзэу Светлана Ме­керовам къызэриIуагъэмкIэ, икIыгъэ 2025-рэ илъэсым ичъэ­пыогъу­шэкIогъу мазэхэр ары мыр зы­зэхащэгъагъэр, лъэныкъуищкIэ зэнэкъокъугъэх.
Унэр зыхагъэлэжьэщт лъэныкъом елъытыгъэу, ащкIэ ежьхэм япсэупIэ анахь дэгъоу зыкIалъытэрэр къэзыушыхьа­тырэ тхылъхэр, сурэтхэр проектым иинтернет нэкIубгъо къагъэхьыгъэх, ахэм цIыфхэм амакъэхэр афатыгъэх.
Адыгеим икъэлэ шъхьаIэ фэтэрыбэу зэхэт унэу дэтхэм ащыщэу 9-мэ тхылъхэр къатыгъагъэх. Къалэм инароднэ депутатхэм я Совет итхьаматэу Джарымэкъо Азмэт текIоныгъэр къыдэзыхыгъэхэр къызщыха­гъэщыгъэхэ зэхахьэм къыщыгущыIэзэ, Iофтхьабзэм хэлэжьэгъэ унэхэм ащыпсэухэрэр ящагухэм, яподъездхэм язытет зэригъэгумэкIыхэрэм, анаIэ зэратетым, акIуачIи, ямылъкуи халъхьэзэ зэрэзэрагъафэхэрэм, Iэрыфэгъоу зэрашIыхэрэм афэшI лъэшэу зэрафэразэхэр къыхигъэщыгъ, нэмыкIхэмкIэ ахэр щысэтехыпIэ хъунхэу зэрэщыгу­гъы­хэрэм къыкIигъэтхъыгъ.
«Электричествэр анахь ма­кIэу чIэнагъэ зышIырэ унэр» зыфиIорэ лъэныкъомкIэ анахь дэгъоу къыхахыгъ урамэу Михайловым ыцIэ зыхьырэм тет унэу N 10-р. Мыщ щыпсэухэрэм ежьхэм яахъщэкIэ къащэфи, псэуалъэу агъэуцугъэм ишIуагъэкIэ электроэнергиеу агъэфедэрэри, чIэнагъэу ашIырэри адрэхэм анахь макI.
Урамэу Шоссейннэм тет унэу N 16-р «Подъезд анахь дэгъу» зыфиIорэ лъэныкъомкIэ апэрэ хъугъэ, урамэу Пионерскэм тет унэу N 389-м ия 2-рэ корпус ятIонэрэ чIыпIэр ыхьыгъ. Мы­хэм яподъездхэр якъэбзагъэкIи, зэрэзэгъэфагъэхэмкIи нэмыкI­хэм къахэщых. Унэхэм ачIэсхэм ар яшIушIагъ.
«Щагу анахь дэгъу» зыфиIорэ лъэныкъомкIэ П. Лумумб ыцIэ зыхьырэ урамым тет унэу N 113-м ищагу апэрэ чIыпIэр ыубытыгъ, Чкаловым ыцIэ зы­хьырэ урамым тет унэу N 86-м ия 3-рэ корпус ятIонэрэ хъугъэ, урамэу Михайловым ыцIэ зы­хьырэм тет унэу N 4-м ящэнэ чIыпIэр ыхьыгъ. Мыхэм ачIэс­хэм ямылъкурэ акIуачIэрэкIэ чъыг ыкIи кондэ зэфэшъхьаф­хэр, къэгъэгъэ дахэхэр адагъэ­тIысхьагъэх, ахэр дахэу зэрагъэфагъэх, хэкI итэкъупIэхэми, тIысыпIэхэми, джэгупIэхэми ягъэкъэбзэн, яIыгъын ыуж итых.
ХЪУТ Нэфсэт.