ГандболымкIэ Урысыем и Супер­лигэ хэт «АГУ-Адыифым» я 18-рэ турым къыдыхэлъытэгъэ ешIэгъоу иIагъэм командэу «Уфа-Алисэм» щыIукIагъ, пчъагъэр зэфэдизэу ар аухыгъ.

«Уфа-Алиса» — «АГУ-Адыиф» — 35:35 (18:18).
«Уфа-Алисэм» щешIагъэх:
къэлэпчъэIутхэр — Пономаревар, Ралько, Долотовских. Акентьевар — 10, Пичугинар — 5, Трухинар — 3, Сбытовар — 3, Куренковар — 2, Раджабековар — 2, Голубевар — 2, Тарабринар — 2, Мельниковар — 2, Коржовар — 2, Синюгинар — 1, Тарасовар — 1.
«АГУ-Адыифым» хэтыгъэх:
къэлэпчъэIутхэр — Черницовар, Гобадзе, Черновар. Смирновар — 10, Коблыр — 7, Утаровар — 4, Миловар — 3, Локян — 3, Салаховар — 2, Краснокутскаяр — 2, Казихановар — 2, Хавронинар — 1, Кожубековар — 1.
Уфа игандболисткэхэм текIоныгъэр къыдахын гухэлъ пытэ яIэу ешIапIэм къихьа­гъэх. Ащ фэдэ екIолIакIэм Мыекъуапэ икомандэ фэмыхьазырэу къычIэкIыгъ. Апэрэ таймыр 18:18-у, ятIонэрэр — 17:17-у аухыгъ. Мые­къуапэ илIыкIохэм Iэгуаоу адзыгъэм щыщэу процент 60-р къэлапчъэм дадзагъ, бысымхэм — процент 66-рэ. Уфа икомандэ хэт Анна Акентьевар дэгъу дэдэу джэгугъэ, къэлап­чъэм Iэгоуи 10 дидзагъ. «АГУ-Адыифым» щешIэхэрэм Елена Смирновар къахэщыгъ, ащи къэлапчъэм IэгоуипшI дидзэн ылъэ­кIыгъ. Тикомандэ икъэлэпчъэIутхэм Iэгоо 17 къызэкIадзэжьыгъ, ау пчъагъэр зыфэдэщтыр аужырэ нэгъэупIэпIэгъухэр ары къызщынэфагъэр. Мы уахътэм тикъэлэпчъэIутэу Тамара Гобадзе цыхьэшIэгъоу ешIагъ, ащ ишIуагъэкIэ пчъагъэр зэфэдизэу ешIэгъур «АГУ-Адыифым» ыухыгъ.
— Ухъумэныр дэй дэдэу дгъэцэкIагъ, ыпэкIэ тызэрэщешIагъэми уигъэрэзэнэу щытэп. Арышъ, ащ епхыгъэу зэфэхьысыжьхэр тшIыщтых, — къыIуагъ «АГУ-Адыифым» итренер шъхьаIэу Никита Голуб.
Турым изэфэхьысыжьхэм закъыфэбгъа­зэмэ, «Звездар» «Динамо-Синарэм» те­кIуагъ. «Лучымрэ» «Черноморочкэмрэ» язэ­IукIэгъу уеплъынкIэ гъэшIэгъоныгъ. «Рос­тов-Доным» апэрэ таймыр шIуахьыгъ нахь мышIэми, ятIонэрэм зэрифэшъуашэу джэгугъэ, «Астраханочкэм» нахь лъэшыгъ.
Я 18-рэ турым изэфэхьысыжьхэр:
«Кубань» — «Университет» — 48:18, «Уфа-Алиса» — «АГУ-Адыиф» — 35:35, «ЦСКА» — «Лада» — 36:26, «Черноморочка» — «Луч» — 26:25, «Звезда» — «Динамо-Синара» — 34:22, «Ростов-Дон» — «Астраханочка» — 36:22.
Турнир таблицэм пэрытныгъэр щиIыгъ «Ростов-Доным», «ЦСКА-м» ятIонэрэ чIыпIэр еубыты, «Черноморочкэр» ящэнэрэм къэ­кIуагъ. «АГУ-Адыифыр» я 9-рэ чIыпIэм щыт. КъыкIэлъыкIощт ешIэгъур тикомандэ Краснодар щыриIэщт, щылэ мазэм и 31-м «Кубань» IукIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 36.
2. «ЦСКА» — 34.
3. «Черноморочка» — 25.
4. «Астраханочка» — 23.
5. «Лада» — 23.
6. «Звезда» — 20.
7. «Динамо-Синара» — 16.
8. «Кубань» — 15.
9. «АГУ-Адыиф» — 10.
10. «Луч» — 8.
11. «Уфа-Алиса» — 3.
12. «Университет» — 3.