Урысыем и ДОСААФ зызэхащагъэр илъэс 99-рэ хъугъэ. Мы организацием къэралыгъом игъусэу гъогу къин къыкIугъ.

Илъэс зэкIэлъыкIохэм ыцIэ бэрэ зэблахъугъ — ОСОАВИАХИМ, ДОСААФ СССР, РОСТО. 2010-м къыщегъэжьагъэу ДОСААФ-м къыфагъэзэжьыгъ. Сыд фэдэрэ зэхъокIыныгъэ фэхъугъэми, ипшъэрылъхэр къэнэжьыгъэх. Ахэм ыкIи икIыгъэ илъэсым IофшIэнэу ашIагъэр «Адыгэ макъэм» къыфиIотагъ Урысые Федерацием и ДОСААФ ишъолъыр къу­тамэу Адыгэ Республикэм щыIэм итхьаматэу Барцо Тимур.
Пэублэм къыщысIомэ сшIоигъу—тигущыIэгъу запасым щыIэ полковник. СвязымкIэ Новочеркасскэ дэт училищыр къызеухым, ракетнэ дзэхэм ахэтэу илъэс пчъагъэм къулыкъур ыхьыгъ. Нэужым дзэ комиссариатхэм ясистемэ Iоф щишIагъэу, джы зыIут организацием ипащэу агъэнэфагъ. Илъэс 16-м къыкIоцI яIофшIэн зэрэзэхэтым хэшIыкI дэгъу фыриIэ хъугъэ. Джащ фэдэу рес­публикэм щызэхащэрэ общественнэ Iофтхьабзэхэми чанэу ахэлажьэ.

— Тимур, шъуиIофшIэн игугъу къэпшIымэ сыда анахьэу къы­хэбгъэщын плъэкIыщтыр?
— Адыгеим щыIэ къутамэр зыхэхьэрэ купым елъытыгъэу а 1-рэ чIыпIэр ­илъэс зэкIэлъыкIохэм къызэрэдихырэм къыгъэ­лъагъорэр организацием зыпкъ итэу Iоф зэришIэрэр ары. Мыр сэ сишIушIагъэу щытэп, зэкIэми тиIо зэхэлъэу типшъэ­рылъхэр тэгъэцакIэ. Ау ащ къикIырэп ДОСААФ-м гумэкIыгъохэр имыIэхэу: водительхэм ягъэхьазырынкIэ зэпымыоу хэбзэгъэуцугъэр зэрэзэблахъурэр, дзэ комиссариатым зэпхыныгъэу дытиIэм изэхэщэн, игъом ушэтынхэм ятын, нэмыкIхэри. ТиIофшIэн нахьышIоу зэрэзэхэтщэщтымкIэ хэкIыпIэхэр къэтэгъотых.
— Илъэсыр зедгъажьэкIэ зэхъо­кIыныгъакIэхэри IофшIэным къыхахьэхэу хабзэ.
— Ащ фэдэу зэхъокIыныгъэ тиIэп, ау тежэ. ДОСААФ-м фэгъэхьыгъэ федеральнэ законопроект агъэхьазырыгъ. Ар заштэкIэ, тиIофшIэн бэкIэ нахь псынкIэ хъущт, чIыпIэу тIыгъыр гъэнэфэгъэщт. Тэ общественнэ организациеу тыщыт шъхьаем, къэралыгъом иIахь къыхэмыхьэу тиIофшIэн дгъэпсышъущтэп. УФ-м зыкъэухъумэжьынымкIэ и Министерствэ иIахьышIу хэлъ организацием иIофшIэн изэхэщэн. Типшъэрылъхэм афэгъэхьыгъэу къасIомэ, ахэри къэнэжьых. Общественнэ-къэралыгъо организациеу ДОСААФ-р ныбжьыкIэхэр дзэ къулы­къум фэгъэхьазырыгъэнхэмкIэ, яхэгъэгу шIу алъэгъоу пIугъэнхэмкIэ, дзэ-учет сэнэхьатхэм, спорт лъэпкъ зэфэшъхьафхэм афэгъэсэгъэнхэмкIэ граждан обществэмрэ УIэшыгъэ КIуачIэхэмрэ зэзыпхыхэрэ лъэныкъоу щыт.
— Тимур, дзэ сэнэхьатхэм ­ягугъу къэпшIыгъэми, а Iоф­шIэныр икIыгъэ илъэсым зэрэжъугъэцэкIагъэм нахь игъэ­кIотыгъэу а IофшIэныр икIыгъэ илъэсым зэрэжъугъэцэкIа­гъэм тыщыбгъэгъозагъэмэ дэ­гъугъэ.

— Лъэныкъуищмэ афэгъэзагъэу Iоф тшIагъэ: дзэ-патриотическэ пIуныгъэр, дзэ-учетнэ ыкIи техническэ сэнэхьатхэм афедгъэджэнхэр. ДОСААФ-м икъутамэхэу гъэсэныгъэ Iофым фэгъэзэгъэ организации 5-мэ а пшъэрылъыр зэшIуа­хыгъ. УФ-м зыкъэухъумэжьынымкIэ и Министерствэ дзэ-учетнэ сэнэхьатхэм афедгъэджэнэу къытфигъэуцугъэ пшъэ­рылъыр икIыгъэ илъэсым дгъэцэкIагъэ, республикэмкIэ нэбгыри 137-рэ фэдиз дгъэхьазырыгъ. Техническэ сэнэхьатхэм нэбгырэ 2107-рэ фэдиз афедгъэджагъ.
— Мары бэмышIэу цIыф зэрымыс быбырэ пкъыгъохэм (БПЛА) яоператор сэнэхьатым фырагъэ­джэщтхэм яугъоин зыкъэухъу­мэжьынымкIэ Министерствэм ригъэжьагъ. Ащ епхыгъэ егъэ­джэн Iофым ДОСААФ-р хэлэжьэщта?
— Мы уахътэм ащ фэдэ пшъэрылъ къытфашIыгъэу щытэп. ТымыгъэцэкIэшъунэу арэп, ау ащ егъэджэн программэ гъэнэфагъэ, езыгъэджэщт цIыфхэр хьазырхэу щыIэнхэ фае. ГущыIэм пае, дзэ-учетнэ сэнэхьатхэр ягъэгъотыгъэнымкIэ Гупчэм материальнэ-техническэ базэ икъу IэкIэлъ. Егъэджэн Iофым фэгъэзэгъэ кIэлэегъаджэхэр ыкIи инструкторхэр илъэс пчъагъэ хъугъэу мэлажьэх, IэпэIэсэныгъэшхо аIэкIэлъ. Джащ фэдэу тапэкIэ цIыф зэрымыс быбырэ пкъыгъохэр зыгъэIорышIэщтхэм яегъэджэнкIэ программэ ыкIи шэпхъэ гъэнэфагъэхэр къагъэхьазырхэу а пшъэ­рылъыр къызытфашIыкIэ дгъэцэкIэщт.
— ИкIыгъэ илъэсым изэфэхьысыжьхэмкIэ сыд фэдэ Iофтхьабзэхэр ара нахь къыхэбгъэщыхэрэр?
— Тызыхэт дунай мыпсынкIэм зэпымыоу зэхъокIынынгъэхэр щэхъух. Арышъ, къыткIэхъухьэрэ лIэужхэр яцIыкIугъом къыщегъэжьагъэу патриотхэу пIугъэнхэр пшъэрылъ шъхьаI. А лъэныкъом фэгъэзэгъагъ Iофтхьабзэу редгъэкIокIыгъэхэр ыкIи тынаIэ анахьэу зытедгъэтыгъэр ахэм цIыфхэр нахьыбэу къызэрахэдгъэлэжьэщтхэр ары. Iофтхьабзэхэр зэхэщэгъэнхэмкIэ гъэсэныгъэм, общественнэ ыкIи ветеран организациехэм зэпхыныгъэ адыриI. Ахэм ащыщхэм ягугъу къэтшIын: пчъэ зэIухыгъэхэм ямафэхэр, ЛIыхъужъныгъэм иурокхэр, автопробегэу «Традиции героев победителей – наследникам Победы», кIалэхэри пшъашъэхэри зэфэдэу зыхэлэжьэгъэхэ фестивалэу «Ворошиловский стрелок» зыфиIохэрэр, хэушъхьафыкIыгъэ дзэ операцием иветеранхэм адыряIэгъэ зэIукIэгъухэр, дзэ-IэрышI спорт лъэпкъхэмкIэ зэнэкъокъухэр, дзэ мэфэкI мафэхэм афэгъэхьыгъэ зэхахьэхэр, нэмыкIхэри.
— Тхьауегъэпсэу гущыIэгъу укъызэрэтфэхъугъэмкIэ.