Урысые Федерацием цIыф жъугъэхэм якъэухъумэнкIэ IофшIэнхэм язэхэщэн имазэ мэфэкI шIыкIэм тетэу щылэ мазэм и 22-м Адыгэ Республикэм щырагъэжьагъ.

Ащ епхыгъэ Iофтхьабзэу Урысыем и ДОСААФ икъутамэу Адыгэ Республикэм щыIэм щыкIуагъэм хэлэжьагъэх АР-м иветеранхэм я Совет итхьаматэу, отставкэм щыIэ полковникэу Къоджэ Аслъан, АР-м гъэсэныгъэмрэ шIэныгъэм­рэкIэ иминистрэу Евгений Лебедевыр, лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ Комитетым итхьаматэ игуадзэу Константин Щербаковыр, зыкъэухъумэжьынымкIэ Адыгэ республикэ организацием, ветеранхэм я Совет, дзэ комиссариатхэм ялIыкIохэр, дзэ-патриотическэ клубхэм, лъыхъон отрядхэм ахэтхэр, юнармейцэхэр, кIэлэеджакIохэр.
2026-рэ илъэсым Хэгъэгу зэошхом ТекIоныгъэр къызыщыдахыгъэр илъэс 81-рэ, организациеу “ДОСААФ-р» зызэхащагъэр илъэс 99-рэ, нэмыц-фашист техакIохэр рафыжьыхи, Адыгеир шъхьафит зашIыжьыгъэр илъэс 83-рэ зэрэхъухэрэм, Хэгъэгум иухъумакIо и Мафэ, Урысыем ишIэжь мэфэкIхэм ыкIи дзэ щытхъум имафэхэм ар анахьэу афэгъэхьыгъэщт.

ЦIыф жъугъэхэм якъэухъумэнкIэ Iоф­шIэнхэм язэхэщэн имазэ зэраублагъэ­м­кIэ къэзэрэугъоигъэхэм къафэгушIуагъ ДОСААФ-м ишъолъыр къутамэ итхьаматэу, запасым щыIэ полковникэу Барцо Тимур.
— НыбжьыкIэхэм патриотическэ гупшысакIэ ахэлъхьэгъэным ыкIи ахэм обществэм чIыпIэ гъэнэфагъэ щаубытыным, блэкIыгъэм лIыхъужъныгъэу зэрахьагъэм ишIэжь къызэтегъэнэгъэным Iофтхьабзэу зэхэтщэщтхэр фэIорышIэщтых. Джащ фэдэу районхэми ахэр ащыкIощтых, — къыIуагъ Барцо Тимур.
Егений Лебедевым къызэрэхигъэщыгъэмкIэ, министерствэмрэ ДОСААФ-мрэ илъэс пчъагъэхэм зэдэлэжьэныгъэ зэдыряI. Блыпэ пэпчъ «Разговоры о важном» зыфиIорэ егъэджэн сыхьатхэу еджапIэхэм ащызэхащэхэрэм ахэр къа­хагъэлажьэх. Джы кIэу къежьэгъэ цIыф зэрымыс быбырэ пкъыгъохэм ягъэIорышIэнкIэ сэнэхьатым феджэщтхэм яугъоин фытегъэпсыхьагъэу ныбжьыкIэхэм зэIукIэгъухэр зэрафызэхащэхэрэр министрэм къыIуагъ.
Ветеранхэм я Совет ыцIэкIэ ащ итхьаматэу Къоджэ Аслъан къэзэрэугъоигъэхэм шIуфэс къарихыгъ. Адыгеир шъхьафит зэрашIыжьыгъэм фэгъэхьыгъэ Iофтхьабзэу «ШIэжьым и Вахтэ» станицэу Дахъом зэрэщаублагъэр ащ къы­Iуагъ. Ащ къыдыхэлъытагъэу тарихъ мэхьанэ зиIэ хъугъэ-шIагъэхэм яшъыпкъа­пIэ тиныбжьыкIэхэм арагъэшIэныр, ащ уасэ фашIэу пIугъэнхэм зэрэдэлэжьэщтхэр къыхигъэщыгъ.
ГущыIэр лъигъэкIотагъ Юнармием ишъолъыр штаб ипащэу Ирина Князевам.
— Непэрэ мафэм ехъулIэу республикэм юнармейскэ отряди 154-рэ щытхыгъ, ахэм ныбжьыкIэ 11256-рэ ахэт. ТиотрядкIэ 2026-рэ илъэсыр юбилейнэу щыт, апэрэр сэ зызэхэсщагъэр илъэси 10 мэхъу. Ащ дэжьым джыри бэмэ къагурыIощтыгъэп тызщыщри, тызфэдэри, ау теубытагъэ хэлъэу ныбжьыкIэ заулэр зэхэтэу хахыгъэ гъогум рыкIощтыгъэх. Сигуапэу къасIомэ сшIоигъу апэрэ юнармейцэхэм ащыщхэм тикъэралыгъо ишIоигъоныгъэхэр къызэраухъумэхэрэр. Ахэм ащыщ нэбгыриплIым зэуапIэм иапэрэ сатырхэм аIутхэу ядзэ пшъэрылъхэр щытхъу хэлъэу агъэцакIэх, нэбгыри 3-мэ тын лъапIэхэр къафагъэшъошагъэх, — къыIуагъ Ирина Князевам.
Щылэ мазэм и 23-м къыщегъэжьа­гъэу мэзаем и 23-м нэс Iофтхьэбзэ зэфэшъхьафхэр республикэм щыкIощтых. Автопробегхэр, лIыхъужъныгъэм иурокхэр, зэнэкъокъухэр зэхащэщтых. Хэгъэгу зэошхом иветеранхэм ныбжьыкIэхэр аIуагъэкIэщтых, щымыIэжьхэм яшIэжь агъэлъэпIэщт, музейхэр къарагъэкIухьащтых.
Iэшъынэ Сусан.