ЦIыф зэрымыс быбырэ пкъыгъохэм яоператорэу фырагъэджэнхэшъ мы лъэныкъомкIэ зэзэгъыныгъэ шIыкIэм тетэу къулыкъу ахьын амал щыIэ зэрэхъугъэр мы мафэхэм республикэм икъэлэ шъхьаIэ идзэ комиссариат илIыкIохэм ныбжьыкIэхэм къафаIуатэ, гурыт сэнэхьат зыщарагъэгъотырэ еджапIэхэр къакIухьэх.

Мы мафэхэм ахэр Мыекъопэ медицинэ колледжым щыIагъэх. Зэзэгъыныгъэ шIыкIэм тетэу къулыкъу зыхьы зышIоигъохэм апае лъэныкъуакIэ щыIэ зэрэхъугъэр къафаIотагъ. Ар къызыфэзыгъэфедэ зышIоигъохэр мэзитIо къалэу Краснодар щырагъэджэщтых, нэужым хэушъхьафыкIыгъэ дзэ операцием ащэщтых. НэмыкI дзэкIолIхэм ялъытыгъэмэ, ныбжьыкIэхэр компьютерым кIэрысхэу цIыф зэрымыс быбырэ пкъыгъохэр агъэзекIохэзэ пыим ебэныщтых. Анахь шъхьаIэр, ежь яшIоигъоныгъэкIэ къу­лыкъу зыхьынэу кIатхэхэрэр хэушъхьафыкIыгъэ дзэ операциер окIофэ япшъэ­рылъхэр агъэцэкIэнэу щытмэ, мыхэм илъэсым ыуж къагъэзэжьынэу фитыныгъэ яI.
— Мыщ фэдэ лъэныкъуакIэ щыIэ зэрэхъугъэр ныбжьыкIэхэм алъыдгъэIэсыныр ары пшъэрылъэу тиIэр. Шапхъэу пылъхэр, псауныгъэмкIэ пхырыкIынхэр, инджылызыбзэр ашIэныр ыкIи компьютерым хэшIыкI фыряIэныр ары анахь шъхьаIэхэр. Мы шIыкIэр къызфэзгъэфедэщтхэм зэтыгъоу сомэ миллиони 2,4-рэ къаратыщт, ащ нэмыкIэу мазэ къэс сомэ мин 230-рэ ­къафырагъэхьащт, джащ фэдэу япшъэрылъхэр зэрагъэ­цакIэхэрэм, гъэхъагъэу ашIыхэрэм ялъытыгъэу ахъщэ тедзэ къафатIупщыщт. Къулыкъур ахьэу къызагъэзэжьыкIэ, фэгъэкIотэнхэри яIэщт, — къыIуагъ къалэм идзэ комиссарэу Алексей Санташовым.

Зэхахьэм къызэрэщаIуагъэмкIэ, къэлэ инхэм мы шIыкIэр ащагъэфедэнэу ежьагъ. Академическэ отпуск аштэшъ, ныбжьыкIэхэр къулыкъум макIох. Анахь шъхьаIэр зэуапIэм имытхэу яхэгъэгу къызэраухъумэн амал зэряIэр ары.
— ЦIыф зэрымыс быбырэ пкъыгъохэм япхыгъэ лъэныкъо пстэури сшIогъэшIэгъон. Технопаркэу «Кванториум» зыфиIорэм илъэс пчъагъэрэ сыкIуагъ ыкIи мыщ епхыгъэу курсовой стхыгъагъ. Хэгъэгур къэуухъумэнымкIэ мы шIыкIэр къызыфэбгъэфедэзэ уипшъэрылъ бгъэцэкIэн зэрэплъэкIыщтыр сшIогъэшIэгъо­ныгъ, фэгъэкIотэнэу щыIэхэри къытфаIотагъ, — къыIуагъ ящэнэрэ курсым щеджэрэ Владислав.
Тыгъуасэ республикэм икъэлэ шъхьаIэ идзэ комиссариат хэтхэр Ханскэм дэт Мыекъопэ политехническэ колледжым щыIагъэх, ащ щеджэхэрэм гущыIэгъу афэхъугъэх. КъэкIорэ тхьамафэм Iоф­шIэныр лъыпадзэжьыщт.

ДЕЛЭКЪО
Анет.