АдыгеякIэм къыщыхъугъэм къыздихьыгъэ гумэкIыгъохэм ядэгъэзыжьын республикэм щылъагъэкIуатэ, унэхэу къутагъэхэм ащыпсэущтыгъэхэм IэпыIэгъу арагъэгъоты.

ОшIэ-дэмышIагъэ къызщыхъугъэм икъэплъыхьан Следственнэ комитетым еухы ыкIи унашъо ашIыгъ унэхэу учIэсынкIэ мыщынагъохэм цIыфхэр ягъэ­кIужьыгъэнхэу. Уни 8-у фыкъуагъэхэм ащыщэу зэфэшIыгъэу аIыгъыр анахьэу зэрар зэхыгъэ хъугъэ зыр ары. Джырэблагъэ ащ изытет нахь куоу ауплъэ­кIущт ыкIи унэшъо гъэнэфагъэхэр къыкIэлъыкIощтых.
Адыгеим и ЛIышъхьэ пшъэрылъ къызэрафишIыгъэмкIэ, унэ пэпчъ псэо­лъэшI компаниехэр рапхыгъэх. Ахэм унашъоу къафашIыгъэр охътэ кIэкIым гъэцэкIэ­ьынхэр яшIылIэгъэнхэр ары.
Iофхэм язытет ЛIышъхьэр ежь ышъхьэ­кIэ лъэплъэ, къулыкъу пэпчъ ышIэщтыр къегъэнафэ.
Оперативнэ штабым чэщи мафи Iоф ешIэ, джащ фэд къулыкъу зэфэшъхьафхэми — къэгъэнэжьакIохэм, коммунальнэ, медицинэ, социальнэ, хэбзэ къулыкъу IофышIэхэм. Унэхэу зэхэкъутагъэхэр нахь псынкIэу зыпкъ зэрэрагъэуцожьыщтхэм къыхэлажьэх къин хэфагъэхэм зыгу ягъухэрэри.

Тэхъутэмыкъое районым ичIыпIэ зэфэшъхьафхэм IэпыIэгъур ащаугъои.
ПсэупIэ заулэмэ ахэр къащызэIуахыгъэх: къуаджэу Тэхъутэмыкъуае иурамэу Лениным ыцIэ зыхьырэм тет унэу N 62-р (цIыфхэм ясоциальнэ фэIо-фа­шIэхэр зыщагъэцэкIэрэ Гупчэр), псэупIэу Яблоновскэм иурамэу Дорожнэм тет унэу N 59-р, Бжыхьэкъоежъым иурамэу Лениным ыцIэ зыхьырэм тет унэу N 35/1-р (культурэм и Ун).
Тэхъутэмыкъое районым зэрэщагъэ­нэфагъэмкIэ, чIыпIэхэм къаращалIэ­хэрэр зэрар зыхьыгъэ цIыфхэм яунэхэм анагъэсыщтых. ЯщыкIэгъэщт пкъыгъохэр мыщ фэдэ чIыпIэм щагъотыщтых: АдыгеякIэр, ур. Бжыхьэкъуаер, 25/1-р, я 16-рэ корпусыр (чIыунэр).
Ащ нэмыкIэу, яфэтэрхэм якIужьынхэу Iизын зэратыгъэхэм пIэлъэ гъэнэфагъэ­кIэ яшъхьаныгъупчъэхэр агъэпкIэнхэм пае а адресхэмкIэ ящыкIагъэр къащаратыщт.
Народнэ фронтымрэ ащ и НыбжьыкIэ организациерэ яшъолъыр къутамэхэм ахэтхэри чIыпIэм щыIэх. Общественнэ организациехэм, предпринимательхэм ащыщхэм, цIыф къызэрыкIохэу ищыкIэгъэ хьап-щыпхэр къезыхьылIэхэрэм Iо­фышхо зэрэзэшIуахырэр Адыгеим и ЛIышъхьэ къыхигъэщыгъ, фэдэ IэпыIэгъум осэ ин зэриIэр къыIуагъ.
ПсэолъэшIхэм ащыщыби къин хэфагъэхэм адэIэпыIэхэ ашIоигъоу къекIуа­лIэх. ГъэIорышIэкIо организациехэмрэ Iофхэр зэшIозыхыхэрэмрэ ягъусэхэу ахэм чIыпIэу къиныгъор къызщыхъугъэр агъэкъабзэ, псэолъэшI хэкIыр, машинэ стыгъэхэр Iуащых. Унэхэр зэрэзэтеутыгъэгъэхэ дэпкъхэу фыкъуагъэхэр псэолъэшIхэм зэтырагъэуцожьых. Фэтэрхэм яшъхьаныгъупчъэу хэмытыжьхэр охътэ гъэнэфагъэкIэ акудэнхэм пае пленкэмрэ ар зэрэрагъэпкIыщтымрэ ыпкIэ хэмы­лъэу арагъэгъоты. Ахэр къаIахынхэ алъэкIыщт зифэтэр учIэсымэ хъунэу агъэунэфыгъэхэм.
Мыщ дэжьым къыхэгъэщыгъэн фае охътэ гъэнэфагъэкIэ шъхьэегъэзыпIэ афэхъугъэми ящыкIэгъэфэ Iоф зэришIэщтыр. Ащ щыпсэунхэм пае пстэури арагъэгъоты, социальнэ IофышIэхэм, психологхэм цIыфхэм Iоф адашIэ.
Зэрарым икъэлъытэни пылъых. Район администрацием иIофышIэхэм фэтэр пэпчъ къакIухьэ, къаплъыхьэ, ахъщэ IэпыIэгъу аратыным пае тхылъхэр аугъо­ищтых. Оперштабым лъэIу 300 фэдиз ратыгъах.

Тхылъхэр тэрэзэу къызэраугъоищтымкIэ администрацием изакъоп упчIэжьэгъу хъурэр. Тыгъоспчыхьэ АдыгеякIэм иурамэу Бжыхьэкъуаем Тэхъутэмыкъое районым и Следственнэ комитет илIыкIохэр цIыфхэм щаIукIагъэх, зыгъэгумэкIыхэрэ упчIэхэм яджэуапхэр къаратыжьыгъэх.
«Непэ къыдгот пстэуми тхьашъуегъэпсэу. Зэдыти­пшъэрылъыр — къин хэфагъэ пэпчъ IэпыIэгъу егъэгъотыгъэныр, япсэупIэхэр зэтегъэуцожьыгъэнхэр ыкIи щыIэкIэ тэрэз яIэ шIыжьыгъэныр ары. Зыми икъин къылъэхэтынэ- щтэп. IофшIэныр ыкIэм нэдгъэсыщт. Нэбгырэ пэпчъэу Iэпы­Iэгъу хъурэр тхьаегъэпсэу. Джащ фэдэ уахътэхэр ары анахьэу зызэхатшIэрэр зыкIыныгъэу тхэлъыр», — къыIуагъ КъумпIыл Мурат.
Анахьэу зылъыплъэхэрэм ащыщых шъобжхэр зытещагъэхэм ягъэхъужьын. Адыгеим псауныгъэр къэухъумэгъэнымкIэ и Министерствэ къызэритырэмкIэ, сымэджэщхэм ачIэлъхэм зэкIэми язытет зыпкъ ит, пстэуми яIоф нахьышIум фэкIо. Инэм чIэлъыгъэхэ нымрэ сабыимрэ Мыекъуапэ дэт республикэ кIэлэцIыкIу сымэджэщым чIагъэгъолъхьагъэх. Краснодар ащяIазэх анахьыжъи 3-мрэ зы Iэтахъорэ. Гукъау нахь мышIэми, зэхэуа­гъэхэр Iуахыхэ зэхъум, цIыфыпкъыхэр следовательхэм къачIагъотагъэх. Ахэр зиехэмрэ хэкIодагъэхэм япчъагъэрэ агъэунэфынхэм пае хэушъхьафыкIыгъэ генетическэ экспертизэ зэрашIыщтыр Адыгеим и ЛIышъхьэ социальнэ нэкIубгъохэм къащиIопщыгъ, афэтхьаусыхагъ.