Республикэм икъэлэ шъхьаIэ идзэ комиссариат илIыкIохэр Мыекъопэ къэралыгъо технологическэ университетым иполитехническэ колледж щеджэхэрэм тыгъуасэ аIукIагъ. ЦIыф зэрымыс быбырэ пкъыгъохэм (БПЛА) яоператорэу хъунхэ амал щыIэ зэрэхъугъэр къафаIотагъ.

— Зэзэгъыныгъэ шIыкIэм тетэу къулыкъу зыхьын мурад зиIэхэм джы цIыф зэрымыс быбырэ авиацием епхыгъэу япшъэрылъхэр агъэцэкIэнхэ алъэкIыщт. УФ-м зыкъэухъумэжьынымкIэ и Министерствэ мэзитIурэ хэушъхьафыкIыгъэ дзэ частым щыригъэ­джэщтых. Зэзэгъыныгъэм зы илъэс пIалъэкIэ кIэтхэх, ащ хэхьэ мэзитIо зэреджэхэри, ащ дакIоу зэтыгъо ахъщэ тынэу сомэ миллиони 2, 4-рэ къара­тыщт. А пIалъэр заухыкIэ къэкIо­жьынхэ алъэкIыщт, шIоигъоныгъэ зиIэхэм ар лъагъэкIо­тэн амал яI, — къыIуагъ къалэм идзэ комиссарэу Алексей Санташовым.

БПЛА-м иоператор хъущтхэм шэпхъэ гъэнэфагъэхэр апылъых. Ахэм аныбжь илъэс 18-м къыщегъэжьагъэу 45-м нэсын (FPV-дронхэр зыгъэIорышIэщтхэм аныбжь илъэс 35-м шIокI хъущтэп), псауны­гъэмкIэ пхырыкIынхэ, инджылызыбзэр ашIэн, компьютерым хэшIыкI дэгъу фыряIэн фае.
Дзэ егъэджэн гупчэм ипащэу Нурлан Самадьяновым нэужым цIыф зэрымыс быбырэ пкъыгъохэр зэрэзэтекIыхэрэр, ахэр зэрагъэфедэхэрэр ныбжьыкIэхэм къафиIотагъ. КъэралыгъомкIэ дронхэм ястуденческэ лигэ игупчэ 20-мэ Мые­къопэ къэралыгъо технологическэ уни­верситетыр зэращыщыр ащ къы­Iуагъ ыкIи дронхэм афэгъэхьыгъэ зэнэкъо­къухэр зэрэзэхащэхэрэр къыхигъэ- щыгъ.
Хэгъэгум икъэухъумэн зиIахьышIу хэзылъхьэ зышIоигъо ныбжьыкIэхэмкIэ мыр амалышIоу зэрэщытыр Iофтхьабзэм къыщаIуагъ. Ахэм Iашэ амыIыгъэу, окоп­хэм адэмысхэу пыим ебэныщтых, ятIонэрэ, ящэнэрэ линием тетхэу япшъэ­рылъхэр агъэцэкIэщтых. КъызагъэзэжькIэ лъэныкъо зэфэшъхьафхэмкIэ фэгъэ­кIотэнхэр яIэщтых.
Нэужым Адыгэ РеспубликэмкIэ Народнэ фронтым иныбжьыкIэхэм хэу­шъхьафыкIыгъэ дзэ операцием хэла­жьэхэрэм ыкIи яунагъохэм шIушIэ IэпыIэгъоу арагъэкIыхэрэр къафаIотагъ. Джащ фэдэу къэбар нэпцIэу дунэе хъы­тыум къихьэхэрэм апэшIуекIогъэнымкIэ IофшIэнэу агъэцакIэрэр къаIотагъ. Тэхъутэмыкъое районым къыщыхъу­гъэ тхьамыкIагъом идэгъэзыжьын хэлэжьэнхэу загъэхьазыры.
ДЕЛЭКЪО Анет.