«ЧъыIэ, ау дахэ» — ары аIорэр къушъхьэлъэ Адыге­им къэкIорэ зекIохэм. Мыгъэрэ кIымафэм ащ шIухьафтын шъыпкъэ къафишIыгъ. Осымрэ ар жъужьынэу амал езымытырэ чъыIэмрэ яхьатыркIэ осылъэ республикэм икъоу зыщагъэплъэкIын алъэкIы. Мы мафэм бэхэр плъакIо зыдакIохэрэм ащыщ Мыекъопэ псыкъефэхэу ицIэджэгъу псыхъом щыгъэпсыгъэр. Мыл хъэрэ-пкIарэхэр ришIылIагъэх, щтыргъукIышхом нахь хэмылъэу псыкъе­фэхыр жьым хэтэу дыигъэ. ПсэупIэу Тульскэм ар километрибл фэдизкIэ пэчыжь. Ащ ихэпIэ тедзэхэм уапхырыкIымэ, сэмэгумкIэ къыпшъхьащыт хъурэ бгым лъэс лъагъоу уфэзыщэрэм автомобилькIэ уекIолIэшъу. Тхьабзэхэр тедзагъэхэу, апэрэу кIорэми къыгъотын ылъэкIынэу щыт. Ос шIукIае зэрэтелъым псыкъефэх щтыгъэр зылъэгъу зышIоигъохэр ыгъэщынэхэрэп, мэзым ичъыIи ыгъащтэхэрэп. Ар къыбгурыIонэу щыт. КIымэфэ пстэуми щтыргъукIым ыгъэдыигъэу псыкъефэхыр плъэгъун плъэкIыщтэп. Бэрэ чъыIэ лъэшхэр щыIагъэхэ хъумэ, мыгъэ фэдэу, зэкIеубытэшъу ныIэп. Километрэ фэдиз зикIыхьэгъэ гъогууанэу лъэгуахэ мэзым пхыры­кIырэр кIугъошIу, шъхьаIэр псыкъефэхым дэжь уезыщэхырэ ехыпIэ зандэр блэмыгъэкIыныр.

Ар къыозыIорэ тхьабзэр гъэзапIэм тет. АдыкIэ пшъэрылъыр — усакъы­зэ уукIочIыныр. Ар къызыбдэхъурэм нэмэ алъэгъурэр дэхэ дэд. МетрипшI фэдиз илъэгагъэу къечъэхырэ псыкъефэхыр мыл хъэрэ-пкIарэ хъугъэ. Зыщыфабэм уалъэу къечъэхырэ псыхъор, кIом хэтэу жьым къыщыуцугъ. ЩтыргъукIым къыIэкIэкIыгъэ псыхъо Iахь цIыкIу­хэм макъэ апыIукIэу мыл чIэгъым щэчъэх. Гъэмафэм иткIопсхэмкIэ узгъэуцIынырэ псыкъефэхэу къыпфэмыубытырэр Iумылым ыгъэIэсагъэу пIэгушъо рыбгъэчъэн олъэкIы. ЧIыопсым амалышхоу иIэмрэ ыкIуачIэрэ ар язы щыс. ЩтыргъукIым зэкIиIулIэгъэ псыкъефэхыр зылъэгъу зышIоигъохэм къэблэгъэрэ мафэхэр къызфагъэфедэхэмэ нахьышIу. ЧъыIэр зэкIакIоу ыублэмэ, псыкъефэхым ичъэ ыублэжьыщт. Идэхагъэ ащ ыукъощтэп, ау щтыгъэу плъэгъуным пае къэкIорэ кIымафэ нэс уежэн фае хъущт.
Анцокъо Ирин.