Мыекъуапэ игурыт еджапIэу N9-м ЛIыхъужъныгъэм иурок щыкIуагъ. Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэрэ ныбжьыкIэ Гупчэмрэ ащ кIэщакIо фэхъугъэх.

ЗищыIэныгъэ емыблэжьхэу Хэгъэгум зэрэфэшъыпкъэхэр къэзыушыхьатыгъэхэ ветеранхэу Юрий Виятикрэ Юрий Чмиревымрэ кIэлэеджакIохэм яхьакIагъэх. Iофтхьабзэр зэдэгущыIэгъу шIыкIэм тетэу рекIокIыгъ.
Пэублэм мэфэпчъым хэт дзэ мэфэкIхэр ныбжьыкIэхэм агу къагъэкIыжьыгъэх, ахэм ащыщ трубопроводнэ дзэхэм я Мафэ. Висло-Одер Iофтхьабзэу 1945-рэ илъэсым ищылэ мазэ рагъэжьэгъагъэм къытегущыIагъэх. Джащ фэдэу я 131-рэ Мыекъопэ бригадэм идзэкIолIмэ ялIыхъужъныгъэ къафаIотагъ. Нэужым хэушъхьафыкIыгъэ дзэ операцием фэгъэхьыгъэу ашIэрэр, алъэгъугъэр къыраIотыкIыгъ.
Юрий Виятик къулыкъу ужым ныбжьыкIэхэм япатриотическэ пIуныгъэ чанэу хэлажьэхэрэм ахэхьагъ, фондэу «Хэгъэгум иухъумакIохэм» зэпхыныгъэ дыриI. Ащ нэмыкIэу, ар Мыекъуапэ иныбжьыкIэ Гупчэ ипащэ игуадз, чанэу Iофтхьэбзэ зэфэшъхьафхэм ахэлажьэ. Ащ игъусагъэ Юрий Чмиревыр Чэчэн заом иветеран. Сыд фэдэрэ лъэхъани дзэкIолI зэкъошныгъэр зэрэпытэм, лъэпкъ зэфэшъхьафхэм языкIыныгъэ ар къатегущыIагъ.
— АпэрэмкIэ, кIэлэцIыкIухэм анахьэу анаIэ зытырядгъэдза­гъэр я Хэгъэгу шIу зэралъэгъун, къаухъумэн зэрэфаер ары. Сыда пIомэ, Хэгъэгур — зы, ар къэу­ухъумэ зыхъукIэ, ащ щыпсэухэ­рэри — ны-тыхэр, Iэхьыл-гупсэхэр — къэоухъумэх. Ары анахь мэхьанэ зиIэр, — хигъэунэфыкIыгъ Юрий Виятик.
Тызхэт охътэ мыпсынкIэм тикъэралыгъо иджэгъогъухэм тарихъым ишъыпкъапIэ чIаукъуащэу бэрэ къыхэкIы. Ащ фэдэ къэбар нэпцIхэм кIэлэеджакIохэр ямыдэIунхэу, Урысыем ицIыфхэу Iофым хэшIыкI фызиIэхэм къатхыхэрэм арыгъо­зэнхэу зафагъэзагъ.
Шэн-хэбзэ-зэхэтыкIэхэр къызэтегъэ­нэгъэнхэмкIэ, тибаиныгъэхэр къэухъу­мэгъэнхэмкIэ, пшъэдэкIыжь ахэлъэу ныбжьыкIэхэр къэтэджынхэмкIэ мыщ фэдэ зэIукIэгъухэу лIэужхэр зэзыпхы­хэрэм яшIуагъэ къэкIо.
Iэшъынэ
Сусан.