Депутатхэр хадзыжьыщтых
Илъэсэу къихьагъэм иIоныгъо мазэ, мэкъэтынхэм языкI мафэ, Адыгеим хэдзынхэмкIэ кампание 17 щызэхащэщт.
Ахэм анахь шъхьаIэхэм ащыщых УФ-м и Федеральнэ ЗэIукIэ и Къэралыгъо Думэ иябгъонэрэ зэIугъэкIугъэрэ АР-м и Къэралыгъо Совет — Хасэмрэ ядепутатхэм яхэдзынхэр.
АР-м хэдзынхэмкIэ и Гупчэ комиссие къызэрэщаIуагъэмкIэ, муниципальнэ районищми къэлэ ыкIи къоджэ псэупIэ кой 15-мэ ядепутатхэри хадзыжьыщтых.
Ахэм зэу ащыщ Джэджэ районыр. Ащ инароднэ депутатхэм я Совет Сергиевскэ ыкIи Дондуковскэ псэупIэ койхэм ялIыкIоу хэтыщтхэр къыхахыщтых.
Красногвардейскэ районыр пштэмэ, Хьатикъое, Белосельскэ, Садовскэ, Еленовскэ, Красногвардейскэ, Улэпэ ыкIи Большесидоровскэ псэупIэ койхэм янароднэ депутатхэм я Советхэр ащагъэкIэжьыщтых.
Джащ фэдэу Теуцожь районым инароднэ депутатхэм я Совет Аскъэлэе, Гъобэкъое, Очэпщые, ПчыхьалIыкъое, Пэнэжьыкъое ыкIи Лъэустэнхьэблэ псэупIэ койхэм ялIыкIоу хэтыщтхэр хадзыжьыщтых.