Адыгеим щыпсэурэ ны-тыхэм япроектэу Урысые обществэу «ШIэныгъэм» ишъолъыр къутамэ пэщэныгъэ зыдызэрихьэгъэ ны-тыхэр зыхэхьэхэрэ купхэр кIэщакIо зыфэхъугъэ зэнэкъокъум ия II-рэ чэзыу текIоныгъэр къыщыдихыгъ.
«Мы гъэхъагъэр ны-тыхэр зыхэхьэрэ шъолъыр комитетым ыкIи обществэу «ШIэныгъэм» хэтхэу Адыгеим щыпсэухэ­рэм гъэсэныгъэ IофшIэным яIахьэу хашIыхьагъэм къыкIэкIуагъ. Илъэсэу икIыгъэм Iофтхьэбзэ 600 фэдиз лекторхэм республикэм щызэрахьагъ. Нэбгырэ мин 19 фэдиз лекциехэм, викторинэхэм, Iофыгъо гъэнэфагъэхэм афэгъэхьыгъэ кинохэм якъэгъэлъэгъон, джэгукIэхэм ахэлэжьагъэх. Обществэу «ШIэныгъэм» зэхищэрэ Iофтхьабзэхэм сэри мызэу, мытIоу сахэлэжьэнэу хъугъэ, правительствэм и Унэ нэмыкIэу чIыпIэ зэфэшъхьафхэми ахэм сащыIукIэу къыхэкIыгъ. НыбжьыкIэхэм ягупшысэхэр, ягухэлъхэр ренэу гъэшIэгъон дэдэх», — ихъытыу­хэм къащитхыгъ Адыгеим и ЛIышъхьэ.

Обществэу «ШIэныгъэм» ишъолъыр къутамэ республикэм иучреждениехэу гъэсэныгъэ зыщарагъэгъотыхэрэм гъусэныгъэ пытэ адыриIэу адэлажьэ. Илъэсым къыкIоцI ЛIыхъужъхэм, спортым, шIэныгъэм илъэныкъо зэфэшъхьафхэм япхыгъэ Iофыгъохэр зэшIуахыгъэх. Лъэпкъ проектэу «НыбжьыкIэхэмрэ кIэлэцIыкIухэм­рэ» зыфиIорэм имурадхэм адештэх обществэу «ШIэныгъэр» кIэщакIо зыфэхъу­рэ Iофтхьабзэхэм янахьыбэр.
Ныбжь зэфэшъхьаф зиIэхэр а Iоф­тхьабзэхэм ахэлажьэх: нахьыжъхэри, ныбжьыкIэхэри, якIэлэцIыкIухэр ягъусэхэу унагъохэри. Ны-тыхэр зыхэхьэрэ купхэм ялIыкIохэри нахьыбэрэ а Iофхэм ахэлажьэхэ хъугъэ. Нафэу зэрэщытымкIэ, мы аужырэ илъэсхэм гъэсэныгъэмкIи, пIуныгъэмкIи ахэм мэхьанэу яIэм нахь зыкъыIэтыгъ. Республикэм икомитетхэу ны-тыхэр зыхэтхэм яIэпыIэгъу хэлъэу проектэу «Еджэн программэхэр» зыфиIохэрэр къызфагъэфедэзэ литературнэ клубхэр зэхащагъэх. ЕджапIэхэм ащ фэдэ клуби 4 ащагъэпсыгъ.
«Ны-тыхэр зыхэт купхэм зэхащэрэ Iофтхьабзэхэм язэнэкъокъу текIоныгъэр къызэрэщыдахыгъэм гъэсэныгъэ проект­хэм заушъомбгъунымкIэ ишIуагъэ къызэрэкIощтым, Урысые обществэу «ШIэныгъэм» зэхищэрэ Iофтхьабзэхэм язэшIохын хэлажьэхэрэм япчъагъэ нахьыбэ ащ зэришIыщтым сицыхьэ телъ», — къы­Iуагъ КъумпIыл Мурат.