Мыекъопэ къэлэ администрацием культурэмкIэ игъэIорышIапIэ зэхищэгъэ­гъэ я ХIV-рэ зэIухыгъэ зэнэкъокъоу «Арт-елка — 2026» зыфиIорэм икIэух культурэм и Унэу «Гигантым» щызэфахьысыжьыгъ. КIэлэцIыкIу IыгъыпIэ 30-мэ ыкIи гурыт еджэпIэ 17-мэ аще­джэрэ кIэлэцIыкIухэр ащ хэлэжьагъэх. Зэнэкъокъум пшъэрылъ шъхьаIэу иIа­гъэр унэгъо творчествэм кIэлэцIыкIухэри, янэ-ятэхэри къыхэщэгъэнхэр, лъэпкъ пшысэхэм, шэн-хабзэхэм нэIуасэ афэшIыгъэнхэр ары.
Елкэ гъэшIэгъонэу, ямышIыкIэу шIыгъэхэр зэнэкъокъум къырахьылIагъэх. Лъэпкъ нэшанэ зиIэ илъэсыкIэ джэгуа­лъэхэр, тхылъыпIэм, шъом, бжъэм, хъэдэным ахашIыкIыгъэх. Хы хьамлашкIор елкэ зышIыгъэхэр къахэфагъ. Кинотеатрэм зэкIом натрыф гъэтIыпIагъэу (попкорн) къыщэфыгъагъэм щыщэу къэ­нагъэм елкэ хэзышIыкIыгъи къахэкIыгъ. Чэтыц фыжьым хишIыкIи илъэсыкIэм итамыгъэ чъыг дахэ зыгъэпсыгъэхэри Iофтхьабзэм хэлэжьагъэх.
Лъэпкъхэм языкIыныгъэ и Илъэс къыдыхэлъытагъэу пцIыикъ IэшIагъэхэр бэмэ агъэпсыгъ. «Елочка-символ года», «Елочка-символ города», «Елочка в национальном стиле» «Елочка-Гигант» зыфиIорэ лъэныкъохэмкIэ IофшIэгъэ 500 къырахьылIагъ. Мыекъопэ, Красногвардейскэ, Шэуджэн, Кощхьэблэ ыкIи Джэджэ районхэм, къалэу Мыекъуапэ ыкIи къалэу Шытхьалэ якIэлэеджакIохэр ары хэлэжьагъэхэр.
— Хабзэ зэрэхъугъэу, илъэсыкIэ чъыгыр шъхьадж зыфаем хишIыкIын ылъэкIын амал иIагъ. Зэнэкъокъум къы­рахьылIэгъэ елкэхэр щылэ мазэм и 3-м къыщегъэжьагъэу и 8-м нэс культурэм и Унэ ифойе къыщагъэлъэгъуагъэх, ащ нэбгырэ мин фэдиз яплъыгъ. Анахьэу агу рихьыгъэ елкэм амакъэ афатыгъ. Зэнэкъокъум изэфэхьысыжьхэр осэшI купым ыгъэнэфагъэх. Илъэс къэс дгъэ­шIэгъон IофшIэн къахьыжьынэпщтын тэIо, ау IэшIагъэ бэлахьэхэр къытфахьых, — къыIуагъ Мыекъопэ къэлэ администрацием культурэмкIэ игъэIорышIапIэ ипащэ игуадзэу Ольга Веселовам.
«Арт-Елка — 2026» зыфиIорэмкIэ текIоныгъэр къыдэзыхыгъэр Федор Втюриныр ары. Ар лицееу N 19-м ия 4-рэ класс щеджэ. Федор иунагъо къызэрэдеIагъэри мыщ къыщиIуагъ. Лъэныкъоу «ЦIыфэу къекIолIагъэхэм яшIухьафтын» зыфиIорэмкIэ мэкъэтын зэхащэгъагъ, нэбгырэ 1000 фэдиз ащ хэлэ­жьагъ. Нафэ зэрэхъугъэмкIэ, кIэлэцIыкIу IыгъыпIэу N 4-м кIорэ Екатерина Мироновам текIоныгъэр къыдихыгъ. Ащ мысатыу организациеу «Культпросветым» ихэушъхьафыкIыгъэ шIухьафтын ратыгъ. Джащ фэдэу мысатыу организациеу «Перезвон», пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «КубаньКредит» зыфиIохэрэм яхэушъхьафыкIыгъэ шIухьафтынхэри афагъэшъошагъэх. ЗипсауныгъэкIэ пыч зиIэ кIэлэцIыкIу 30-мэ яIофшIагъэхэр къыхагъэщыгъэх, зэкIэми шIухьафтынхэр аратыгъэх.
— ХэбзэшIу зэрэхъугъэу, мы Iоф­тхьабзэм изэхэщэнкIэ IэпыIэгъу хъугъэ компаниеу «ЭкоЦентр» зыфиIорэр ыкIи экологием ишапхъэхэм адиштэхэу къыхахыгъэ елкэхэр зиIэшIагъэхэм шIухьафтынхэр аритыгъэх. «ЭкоЦентрэм» и Адыгэ шъолъыр къутамэ ипащэу Алыбэрд Налбый жъы хъугъэ пкъыгъохэр чIамыдзыжьхэу, джыри зэ «псэ къызэрапагъэ­кIэжьыгъэм», творческэу а Iофым къызэрекIолIагъэхэм апае кIэлэеджакIоу хэлэжьагъэхэм, ахэм якIэлэегъаджэхэм, янэ-ятэхэм зэрафэразэр ипсалъэ къыщыхигъэщыгъ, зиIофшIагъэ анахь гъэшIэгъонэу алъытагъэхэм шIухьафтынхэр аритыжьыгъэх, — къыIуагъ Мыекъопэ къэлэ администрацием культурэмкIэ игъэIорышIапIэ испециалист шъхьаIэу Маргарита Остренок.
Зэнэкъокъум хэлэжьагъэхэр диплом­хэмрэ шIухьафтынхэмрэкIэ къыхагъэщыгъэх.
Лъэпшъыкъо Фатим.