ДзюдомкIэ Къыблэ федеральнэ шъолъырым ипервенствэ къалэу Ермэлхьаблэ щыкIуагъ. Мыщ зыныбжь илъэс 18-м емыхъугъэ кIалэхэр ыкIи пшъашъэхэр хэлэ­жьагъэх.

Адыгэ Республикэр спортсмен 52-мэ къагъэлъэгъуагъ. Тигъэзет къызэрэхиутыгъэу, зэнэ­къо­къум иапэрэ мафэ Къанэкъо Салим, Къатмэс Тамерлан, Хьаджэкъо Чиназ хагъэунэфыкIырэ чIыпIэхэр къыщахьыгъэх.
Адыгеим илIыкIоу Быго ТIахьир килограмм 66-м нэс къэзыщэчыхэрэм якуп зыщиушэтыгъ ыкIи зэнэкъокъум иятIонэрэ мафэ тыжьын медаль къыщихьыгъ. Финалым ащ къытекIуагъэр Крас­нодар краим испортсменэу Дмитрий Евлампиевыр ары. Типшъашъэхэм нахь къахэщыгъэр Милена Тютюник, ащ я 5-рэ чIыпIэ къыдихыгъ.