ЦIыфыр тIо къэхъурэп хэти зы щыIэныгъ Тхьэм къыритырэр. Ар кIэкони, кIыхьани ылъэкIыщт, ау хэти илэжьэкIагъ, ишIушIагъ, ицIыфыгъ ар зэрашырэр.

Непэ зыцIэ къесIощтыр шъхьэлъытэжь ин хэткIи, сыдкIи зыхэлъыгъэу, Iофыр зикIэсагъэхэм ащыщ.
НэпшIэкъуй Заур щылэ мазэм и 20-м Теуцожь районымкIэ къуаджэу апэрэ Едэпсыкъуаем (хычIэгъ хъугъэм) къыщыхъугъ. Илъэс заулэ нахь ыныбжьыгъэп ятэу Сахьидэ еджапIэм ипэщагъэ­ти, ащ рагъэкIи, Хьатыгъужъыкъое гурыт еджапIэм Iоф щишIэнэу загъакIом. ЛIы Iуш IофшIакIор псынкIэу мыщ пащэ фашIыгъагъ. Ежь Заур зыщыпсэущтыгъэ къуаджэу Къэбыхьаблэ къикIызэ Хьатыгъужъыкъое гурыт еджапIэр 1954-рэ илъэсым, нэужым Адыгэ къэралыгъо кIэлэегъэджэ институтыр къыухыгъэх. А илъэс дэдэм гъэзетэу «Социалисическэ Адыгеим» IофшIэныр щыригъэжьагъ. Унэгъо Iофхэм къахэкIэу, IукIыжьэу къыхэкIыгъ, ау къыгъэзэжьыщтыгъ. Апэ­дэдэ корректорэу ригъэжьэгъагъ, етIанэ зэдзэкIакIоу, къэбархэмкIэ отделым икорреспондентэу, ипащэу Iоф ышIагъ. Бэрэ секретариатым щылэжьагъ.

ПшъэдэкIыжь зыхьырэ апэрэ секретарэу, гъэзетым иредактор шъхьаIэ игуадзэ епхыгъэу лэжьагъэ.
Адыгэ лъэпкъ гъэзет закъоу «Адыгэ макъэр» зие лъэпкъым ыгу ыкIи ышъо атешIыкIыгъэу, хэкум ыкIи ыужым рес­публикэм щыхъурэ-щышIэрэ пстэоу мэхьанэ зиIэр къыригъэлъэгъукIэу гъэ­псыгъэнымкIэ Заур Iофышхо ышIагъ. Зы нэцIэкI цIыкIу гъэзетым иIэмэ, мо цIыф Iушым псынкIэу къыубытыщтыгъ. Литературнэ шэпхъэ гъэнэфэгъэ зэдэштагъэ­хэм атетэу «Адыгэ макъэр» тхьамафэм 5 къыдэкIыщтыгъ, непи ащ тет. Пчэдыжь планеркэхэм гъэзетым ифэIо-фашIэхэм агъэгу­мэкIхэу ренэу атегущыIэщтыгъэх, тэ, ныбжьыкIэхэми, а зэкIэм такIэдэIукIызэ, тиIоф тызэрегугъущтым тыпылъыгъ.
Заур илъэс 40-м ехъурэ гъэзетым щылэжьагъ, мы хэутын Iофым ащ цы хэлъмэ, ымышIэ щыIагъэп: орфографием, стилистикэм хэшIыкIышхо афыри­Iагъ. Тхыгъэ пэпчъ мафэ къэс аузэ, щыбзэмкIэ егугъоу аутхындзы­щтыгъ.
«Журналист пэпчъ иамал-лъэкI елъытыгъэу тхэкIо хабзэ иI, — ыIощтыгъ Заур, — ау мытэрэз гущыIэ къэIуакIэр е гущыIэухыгъэ зэгъэзэкIыгъэр гъэтэрэзыжьыгъэнхэр ищыкIагъ».
Сэ 1993-рэ илъэсым тыгъэгъазэм иапэрэ мафэ «Адыгэ макъэм» обозревателэу сыкъаштагъ, непэ къынэсыгъэу сыщэлажьэ. IуакIи, шIыкIи, тхэкIэ шапхъи цIыкIу-цIыкIоу къысIэкIэхьанхэмкIэ зишIуа­гъэ къысэкIыгъэхэм ащыщых НэпшIэкъуй Заур, Аулъэ Къэ­лэшъау, Пэнэшъу Рамзин, нэмыкIхэри. Ащ дэжьым гъэзетым Iутыгъэм инахьыбэр хъулъфыгъэхэр ары. Нэхъой, укIытэ дахэ редакцием чIэ­лъыгъ. Хъулъфыгъэ нахьыжъхэр зычIэс секретариатым е кабинетым тызычIахьэкIэ, тагъэукIытэу, къызэхэтаджэщтыгъэх, тхыгъэ цIыкIу уиеу къи­хьагъэмэ, щытхъу пфалъэгъоу, пшIэрэм укIагъэгушIоу гущыIэ фабэ къыуаIо­щтыгъ.
Сщыгъупшэрэп, сиапэрэ лирическэ рассказхэр сыкъыIухьэгъакIэу къызы­хэсэутхэм, Пэнэшъу Рамзин игушIокIагъэр, сэри Анна Ахматовау зыкъысщигъэхъужьыгъагъ.
Мы зэкIэ къызкIасIорэр гъэзетым иколлектив зэрэщытэу «Адыгэ макъэм» икъэбзэгъэ-зэфагъэ, лъэшыгъэ зэфэдэу зэдеIэжьэу, ыгъэгумэкIэу зэрэлажьэщтыгъэр ары, хэщ-халъхьэкIэ гъэзетыр дэгъоу бгъэпсын зэрэмылъэкIыщтыр къагурыIощтыгъ.
«Адыгэ макъэм» иредакцие къош республикэхэу Къэбэртаем, Черкесием къащыдэкIырэ гъэзетхэм япащэхэр, яIофышIэхэр чэзыукIэ къакIощтыгъэх, тэри ахэр тлъэгъущтыгъэх, къаIуи, къашIи зэхэтхыщтыгъ, республикищым къащыдэкIырэ гъэзетхэм язэхэт номерхэм зэпэблагъэ ташIыгъагъ.
НэпшIэкъуй Заур, ХьакIэмыз Биболэт, Пэнэшъу Сэфэр афэдэ журналист нахьыжъ IэпэIасэхэм яхьатыркIэ, тэри тхэкIэ-гупшысэкIэ амалхэр, IокIэ-шIыкIэ тэрэзхэр игъорыгъоу дгъотыщтыгъэх.
Заур (идунай зихъожьыгъэр джыри илъэс хъугъэп, Тхьэм джэнэт къырет), лIы Iуш зафэу, IофшIакIоу, илъэсыбэм лъэпкъ гъэзет закъоу «Адыгэ макъэм» икъыдэгъэкIын мыпшъыжьэу дэлэжьа­гъэм ыцIэ къепIоныр епэсыгъ, къылэжьыгъэ шъыпкъ. НэпшIэкъуй Заур, ЛIэхъу­сэжъ Хьаджэрэтбый, Нэхэе Рэмэзан (районым щыIэ корреспондентыгъ), мыхэм анэмыкIыбэми яхьатыркIэ, гъэзе­тым игъогушхо – илъэси 103-рэ къы­кIугъ.
Заур адыгэ унэгъо гупсэф тынч къы­щыхъугъ. Ятэу Сахьидэ ибэу къэтэ­джыгъ, ау иакъыл къызэкIом, цIыфы зэрэхъущтым дэшъхьахыгъэп, Адыгэ хэкум лъапсэ ыдзынымкIэ Iофышхо ылэжьыгъ. Ащ готэу, кIэлитIурэ пхъуитIурэ, нымрэ тымрэ аIэ зэкIэдзагъэу апIугъ, алэ­жьыгъ, апшъэрэ гъэсэныгъэ зэфэдэу арагъэгъо­тыгъ. Заур ыкIи ышнахьыкIэу Аслъан щыIэжьхэп, пхъухэр — псаух, Мариет иунагъокIэ Краснодар щэпсэу, шIэныгъэ­лэжь.
Заур цIыф хэхьакIэ-хэкIыкIэм хэ­шIыкI фыриIагъ, ифэшъуашэм тетэу, ыкъоу Мурат къызещэм, редакцием иколлектив мыхьамелэ Iэнэ шыгъэ къызэрэфишIыгъагъэр къэтэшIэжьы. Ащ фэдэу хьалэлэу, гуапэу ышIагъэр арым фэдэу ылъапсэр, къоми унэгъо лъэпсэ дахэ ыдзыгъ. Заур икIэлитIу нэхъой, Iэдэб ин ахэлъэу гъэ­псыгъэх. Ятэжъэу Сахьидэ ыкIи ятэу Заур яIорэ-яшIэрэ зэрахэхьагъэр гъуащэрэп, унагъохэр яIэх, арышъ, Заур илIэкъо лъапсэ щыI ыкIи щыIэщт. ЩыIагъэмэ ыныбжь илъэс 90-рэ хъущтыгъ.
Адыгэ гущыIэжъым «ПцIэ раIофэ ущыI» — еIо. Заур Iоф дэзышIагъэу гъэзетым Iутхэм — Тхьаркъохъо Сафыет, Мамырыкъо Нуриет, ЖакIэмыкъо Аминэт, Гъогъо Зарэ, нэмыкIхэми, бэрэ игугъу тэшIы, шIукIэ тыгу къинагъ, шъып­къэIо-нэфэIуагъ, гъэзет IофшIэнышхор дэгъу дэдэу ышIэщтыгъ, IофшIакIи, цIыф гъэпсыкIэ-шIыкIи хэлъыгъ. НэпшIэкъуй Заур щытхъу тхылъхэри, бгъэхалъхьэхэри иIагъэх, ау а зэкIэм анахь къахэщыщтыгъэр ицIыфыгъэ зэфагъ. Илъфыгъэ­хэм, иунагъо щыIэкIэшIу яIэнэу, ятэу, ятатэу Заур илъэуж нэф хамыгъэкIо­кIэнэу афэтэIо.
Мамырыкъо Нуриет.