Осэу къесырэм иягъэ цIыфхэм аримыгъэкIыным пае Адыгеим икоммунальнэ хъызмэтшIапIэхэм гъэлъэшыгъэу Iоф ашIэ — къутамэхэу къыпытэкъугъэ­хэм яIущын, гъогухэм ягъэкъэбзэн зэшIуахы, унашъхьэхэм ткIопсэу апыщтыхьагъэхэр къа­раутэхых.

Мыекъуапи, Мыекъопэ, Тэхъутэмы­къое районхэми нычэпэ джыри ос къащесынэу ыублагъ ыкIи чэщым къыщегъэжьагъэу гъогухэр ащагъэкъабзэх, ахэр Iумыл мыхъунхэу яшIушIэх. Апэ дэдэ анаIэ зытырагъэтыхэрэр социальнэ псэуалъэ­хэм якIолIэрэ урамхэр ары. Шэуджэн районми Iофыр щызэпыурэп. Къулыкъу пстэуми гъэлъэшыгъэу Iоф ашIэ, муниципальнэ псэупIэ пстэуми япащэхэм мы Iофыгъом анаIэ тырагъэтынэу Адыгеим и ЛIышъхьэ афигъэпытагъ.
Мы мафэхэм анахьэу мэхьанэ зиIэхэм ащыщ машинэхэр гъогубгъухэм къаIуамыгъэнэнхэм — осыр Iузытхъухэрэр ахэм агъэохъух, тэрэзэу яIофшIэн арагъэгъэцакIэрэп.

Шэуджэн районым фэтэрыбэ хъурэ унэу итхэм ащыщхэу фабэ зимыIэу къэнэгъагъэхэм ар аратыжьыгъ. Муниципальнэ псэупIэм ипащэу Аулъэ Рэщыдэ ар къыIопщыгъ ыкIи чэщи мафи ямыIэу фабэм икъэтын зэтеуцожьыным дэлэжьагъэхэм рэзэныгъэ гущыIэхэр афигъэзагъэх: Адыгеим ипащэхэу лъэтемытэу IэпыIэгъур зэхэзыщагъэхэм, АКъУ-м иректорэу гъэцэкIэжьынхэр мэкIофэхэкIэ фабэм икъэтын тегъэ­псыхьэгъэ псэуалъэхэр къафэзыща­гъэхэм, цIыфхэу мы унэхэм ачIэсхэу гурыIоныгъэ къызхэзгъэфагъэхэм. Мыщ фэдэ чIыпIэ уиты зыхъукIэ, зэдеIэжьныгъэм мэхьанэу иIэр къызэрэбгурыIорэр ащ къыхигъэщыгъ.

Теуцожь районым джащ фэдэу анаIэ зыщытырагъэтыхэрэм ащыщ чъыгхэм осыр апыгъэтэкъугъэныр – ахэм якъутамэхэр зэпымыкIыкIынхэм ыкIи цIыфхэмкIэ щынэгъон­чъэнхэм пае.
Шъугу къэдгъэ­кIыжьын, ом изытет щынэгъончъэныр джырэ уахътэм ­апшъэу зэрэщытыр ыкIи ащкIэ пшъэ­дэкIыжь зыхьыхэрэм япшъэрылъхэр шIокI имыIэу агъэцэкIэнхэ зэрэфаер КъумпIыл ­Мурат зэхэсыгъоу гъэIорышIэкIо компаниехэм япащэхэм ­афишIыгъагъэм ащыриIогъагъ. «Пшъэ­дэкIыжь зыхьыхэрэм зэкIэми псынкIэу ыкIи аIэ зэкIэдзагъэу Iоф ашIэн фае. Ом изытет сыд фэдэми, типсэупIэхэр къэбзэнхэр, щынэгъончъэнхэр ыкIи Iэрыфэгъунхэр зэдытипшъэрылъ. Осымрэ щтыргъукIымрэ зи умышIэнымкIэ IэубытыпIэхэп. Ар – уипшъэ­дэкIыжь зэрэзэхапшIэрэмкIэ, Iоф зэрэпшIэшъу­рэмкIэ уплъэ­кIун», — къыIуагъ ­Адыгеим и ЛIышъхьэ.
МэшIодз С.