Урысыем зыкъэухъумэжьынымкIэ и Министерствэ цIыф зэрымыс системэхэм яподразделение зэзэгъыныгъэ шIыкIэкIэ дзэ къулыкъу щызыхьыщтхэр къыхехых.

Контрактым кIэтхэшъущтхэр запасым щыIэхэу илъэс 18-м къыщегъэжьагъэу 45-рэ зыныбжьхэр, джащ фэдэу апшъэрэ ыкIи гурыт техническэ сэнэхьат гъэсэныгъэ зиIэхэ е зэзыгъэгъотыхэрэр арых.Ащ фэгъэхьыгъэу исоциальнэ нэкIубгъо­хэм къащитхыгъ Адыгеим и ЛIышъхьэ.
— Непэ мы лъэныкъор дзэм кIэу къыхэхьагъ,анахь шъхьаIэу щыт чIыналъэхэм апэчыжьэу алъыплъэнхэ елъэкIы, ыпэкIэ зыщылъыкIотэхэрэ операциехэм разведкэмрэ топыонымрэ ащызэшIуихынхэр иамал. ЦIыф зэрымыс аппаратхэр гъэIорышIэгъэнхэмкIэ IофышIэхэр дзэ подразделениехэми, мамыр щыIакIэми зэфэдэу щящыкIэгъэщтых.Гъэсэныгъэ арагъэгъоты зыхъукIэ, цIыф зэрымыс быбырэ аппаратхэм ягъэцэкIэжьын, язефэн ыкIи программэхэр ахэлъхьэгъэнхэр, сатыум тегъэ­псыхьагъэхэри зэрахэтэу; 3D шъуашэмрэ хэутынымрэ; IP-зэпхыныгъэмрэ радиозэпхыныгъэм­рэ; транспортым игъэзекIон; инженернэ Iофым афагъэсэщтых, — къыхигъэщыгъ КъумпIыл Мурат.
Зэзэгъыныгъэ адашIы зыхъукIэ, дзэкIолIхэм зэтыгъо ахъщэ къафатIупщы – АдыгеимкIэ ар сомэ миллиони 2,4-рэ мэхъу, джащ фэдэу мазэ къэс сомэ мин 220-м къыщыублагъэу хэушъхьафыкIыгъэ дзэ операцием щыIэхэм ыкIи пыим итехникэу къыраутэхыгъэ пэпчъ пае улэупкI. Зэзэгъыныгъэм кIэтхагъэхэм хэушъхьафыкIыгъэ дзэ операцием хэлажьэхэрэм къатефэрэ социальнэ шэс­хэмрэ фэгъэкIотэнхэмрэ къафашIыщт: УФ-м зыкъэухъумэжьынымкIэ и Министерствэ имылъкукIэ псэупIэ псынкIэу къызIэкIагъэхьаным иамал (угъоин-­ипотечнэ системэкIэ); къулыкъу псэупIэ е бэджэндэу аштагъэм ыпкIэ икъегъэгъэзэжьын; дзэ-медицинэ учреждениехэм ыпкIэ хэмылъэу псауныгъэм иуплъэкIун, изэтегъэуцожьын ащызэшIохыгъэныр, кредит ыкIи хэбзэIахь каникулхэр; чIыфэу сомэ миллиони 10-м нэсырэр афэгъэгъужьыгъэныр; ясабыйхэр апшъэрэ еджапIэхэм ыпкIэ хэмылъэу ащегъэджэгъэнхэр, нэмыкIыбэхэри.
Зэзэгъыныгъэр илъэс пIалъэкIэ зэхагъэуцо, зыгъэпсэфыгъо охътэ шъхьаIэри, лэжьэпIэ чIыпIэри къыфагъанэх. Тхылъхэр къулыкъу зыхьыщтхэр къызщыхахыхэрэ чIыпIэм е зыщыпсэухэрэм дзэ комиссариатэу епхыгъэм ащаратышъущтых. УпчIэ пстэумкIи зыздэжъугъэзэшъущтыр: къ. Мыекъуапэ, ур. Комсомольскэр, ­217-рэ, я 119, я 102-рэ кабинетхэр е мыщ фэдэ телефонхэмкIэ: 8 (8772) 52-11-27, 52-11-25. ЗэзэгъыныгъэмкIэ къулыкъухьыным епхыгъэ Iофыгъохэм атегъэпсыхьэгъэ линие плъырыр: 117#4 ыкIи 8 (8772) 52-11-28.