Адыгэ Республикэм и Сурэт къэгъэлъэгъуапIэ «Зима на полотнах художников» зыфиIорэ къэгъэлъэгъоныр къызэIуихыгъ.

Жанрэ зэфэшъхьафхэм арылъ IофшIэгъэ 80-м ехъу сурэтышI 37-мэ къэгъэлъэгъоным хагъэлажьэ. Ахэм ахэтых Урысыем, Адыгеим янароднэ сурэтышIхэм, культурэм изаслуженнэ IофышIэхэм яехэри, Сурэт къэгъэлъэгъуапIэм ифонд къыхэхыгъэхэри, унэе коллекциехэм ащыщхэри.
— Къэгъэлъэгъоныр кIымэфэ хьалэмэтым фэгъэ­хьыгъ. КIымафэм ипшысэмэ къахахыгъэ гупшысэхэр тисурэтышIхэм ясурэтхэм къащаIуатэ. IэпэIасэхэм яIэшIагъэхэм гупшысакIэхэр апхырыщыгъэх. Сэ зы сурэтым Фыщт икъушъхьэсыджхэр къыщысэгъэлъагъо, адрэм — осым чIигъэсэегъэ автомобилэу щагум дэтыр, ящэнэрэм — ижъырэ черкес чъыгхатэу осым ыгъэбылъыгъэр, — къыIуагъ Сурэт къэгъэлъэгъуапIэм ипащэу Бырсыр Абдулахь.
ЧIыопс хьалэмэтым гукIэ ухэзыщэрэ сурэтхэр Къат Теуцожь, Павел Амасьян, ПIэтIыощэ Феликс, Ирина Бредихинам, Василий Нихотиным, Бырсыр Абдулахь, Хъуажъ Рэмэзан, фэшъхьафхэм ашIыгъэх.

Сурэтхэр дахэх, лъэгъупхъэх. Ахэм искусствэм гъунапкъэ зэримыIэр, ащ идэхагъэ къагъэлъагъо. Сурэтхэр шъо зэфэшъхьафхэмкIэ гъэкIэрэкIагъэх, узыIэпащэ. Огу къаргъори, къушъхьэхэм ателъ осыри, чIыопсым идэхагъи, Шъхьэгуащэ ыхьырэ мылхэри нэплъэгъум итых. КIымафэм идэхагъэ угу римыхьын плъэкIырэп. Тхьэпэ фыжьым фэдэу ос къабзэм нэр еумэхъы.
АР-м щызэлъашIэрэ сурэтышIэу Татьяна Осадчаям къэгъэлъэгъоным IофшIэнищ хигъэлэжьагъ.
— Илъэсым илъэхъан хьалэмэтэу кIымафэр сурэт сшIыныр сикIас. СиIэшIагъэхэр чэфынчъэу къэзгъэлъэгъонхэу сыфаеп. Осыр ткIужьы зыхъукIэ къычIэщыжьырэ чъыгхэр, къушъхьэ шыгухэр, гъогубгъухэм къатенэгъэ осыр сурэтхэм къащысэгъэлъагъо. ГущыIэм пае, сиIофшIагъэу «Оттепель» зыфиIорэм остыгъэе чъыг шхъуантIэхэм гур къагъэчэфы, ос фыжьыбзэм дахэу къыхэщых, — къеIуатэ Татьяна Осадчаям.
Къэгъэлъэгъоныр мэзаем и 1-м нэс зэIухыгъэщт. Искусствэр зышIогъэшIэгъонхэр ащ еплъынхэу зэхэщакIохэм рагъэблагъэх.
Лъэпшъыкъо Фатим.