Республикэм щыпсэухэрэм гъэстыныпхъэ шхъуантIэр аIэкIэгъэхьэгъэным ылъэныкъокIэ Iофхэм язытет, ямурадхэм афэгъэхьыгъэу Iахьзэхэлъ обществэу «Газпром газораспределение Майкоп» зыфиIорэмрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром Межрегионгазымрэ» ягенеральнэ пащэу ЕкъутэкI Аслъан зэIукIэгъу журналистхэм афызэхищагъ, упчIэхэм джэуап къаритыжьыгъ.

Пэублэм пащэм къызэриIуагъэмкIэ, республикэм и ЛIышъхьэ пшъэрылъ зэрафишIыгъэм ыкIи Адыгэ Республикэм иминистрэхэм я Кабинет иунашъохэм къызэрэдалъытэрэм тетэу «социальнэ догазификациекIэ» заджэхэрэм ипро­грам­мэ диштэу гъэстыныпхъэ шхъуантIэр зэращэлIэщтхэу IэпыIэгъу аратыным ифитыныгъэ зиIэхэр агъэнэфагъэх. Гъэс­тыныпхъэр цIыфхэм зэраIэкIахьэрэм зегъэушъомбгъугъэным фытегъэпсыхьэгъэ федеральнэ программэу 2021 — 2025-рэ илъэсхэм ателъытэгъагъэр пхы­рыщыгъэ зэрэхъугъэр къызэфихьысыжьызэ, «Газ­промымрэ» шъолъырхэм якъэралыгъо хэбзэ къулыкъухэмрэ Iофы­шхо зэрэзэдашIагъэм къыкIигъэтхъыгъ.
Адыгэ РеспубликэмкIэ гъэстыныпхъэ шхъуантIэр зыгъэфедэхэрэм япчъагъэ процент 92,5-м кIэхьэ (ыпэкIэ а пчъа­гъэр процент 90,07 хъущтыгъэ) ахэм ащыщэу къалэхэмкIэ — процент 99,52-рэ, къоджэ псэупIэхэмкIэ — 85,31-рэ. УрысыемкIэ а пчъагъэр гурытымкIэ процент 71,4-рэ мэхъу.
АР-м ипсэупIэ 17-мэ гъэстыныпхъэ шхъуантIэр аIэкIэгъэхьэгъэн фаеу ащ фытегъэпсыхьэгъэ программэм къыщыдэлъытэгъагъ, 13-мэ ар алъагъэIэсыгъ. «Газпромым» инвестициеу къыхилъхьагъэр сомэ миллиарди 5,4-рэ мэхъу, газрыкIопIэ 17 агъэпсыгъ, ахэм километри 130,1-рэ фэдиз якIыхьагъэ.
2026-рэ илъэсым псэупIи 4-мэ апхырыкIырэ километрэ 20 зэрылъ газрыкIуа­пIэхэр ашIынхэу агъэнафэ. Ащ ишIуагъэ­кIэ Мыекъопэ районым ипсэупIэхэу Веселэм, Безводнаям, Октябрьскэм, Кармир-Астхым адэсхэм гъэстыныпхъэ шхъуантIэр агъэфедэн амал яIэщт.
КъэIогъэн фае, социальнэ догазификацием ипрограммэ 2021-рэ илъэсым къыщегъэжьагъэу агъэцакIэ. Ащ ишIуагъэкIэ гъэстыныпхъэ шхъуантIэр зыIэкIагъэхьэгъэ псэупIэхэм адэсхэм яунэхэм къапэIулъ чIыгу Iахьхэм ягъунапкъэхэм нэс ар аращалIэ. Программэм Iоф зишIэрэм къыщегъэжьагъэу ащ зиушъом­бгъугъ: 2023-м къыщыублагъэу мыщ медицинэ ыкIи гъэсэныгъэ учреждениехэр, 2024-м — чъыгхэтэ ыкIи дачнэ мысатыу товариществэхэр хэлажьэх.
УФ-м и Президентэу В. Путиным ипшъэрылъкIэ программэм игъэцэкIэн пIалъэ имыIэу агъэнэфагъ.
ЕкъутэкI Аслъан къызэриIуагъэмкIэ, социальнэ догазификацием ипрограммэ зылажьэрэм къыщыублагъэу гъэстыныпхъэ шхъуантIэм ирыкIопIэ километрэ 750-рэ фэдиз агъэпсыгъ, цIыф псэупIэхэу ыпэкIэ гъэстыныпхъэ шхъуантIэр зынэмысыгъэхэу 17-мэ ар аIэкIэгъэхьэгъэным иплан аухэсыгъ, лъэIу тхылъ къэзытыгъэ­хэм япчъагъэ мин 14-м нэсыгъ, унэгъо мини 8,1-мэ афыпашIагъ.
УФ-м и Президент пшъэрылъэу къыгъэуцугъэм игъэцэкIэн зыщыкIорэ лъэхъа­ным 2025-рэ илъэсым щылэ мазэм ехъулIэу гъэстыныпхъэ шхъуантIэм ирыкIопIэ километри 110-м ехъу агъэпсыгъ, зэзэгъыныгъэ мини 2-м ехъу зэдашIыгъ, унэгъо мини 3,3-м ехъумэ яхапIэхэм ягъунапкъэхэм ар афыращэлIагъ.
— Мы программэм шIуагъэу иIэхэр сыд фэдэха? Социальнэ догазификацием хэта хэлэжьэн зылъэкIыщтыр?
— Программэм ишIуагъэкIэ гъэстыныпхъэ шхъуантIэр зыIэкIагъэхьэгъэ псэупIэхэм адэсхэм яунэхэм къапэIулъ чIыгу Iахьхэм ягъунапкъэхэм нэс газыр ыпкIэ хэмылъэу аращалIэ.
Гъэстыныпхъэ шхъуантIэмкIэ ящыкIэгъэщт Iэмэ-псымэхэм якъэщэфынрэ ягъэуцунрэ апэIухьащт ахъщэм изы Iахь куп гъэнэфагъэхэм афалъэгъужьыщт. ФэгъэкIотэныгъэр сомэ мини 150-м шIокIыщтэп.
ФэгъэкIотэныгъэ зиIэхэм ахэхьэх Хэгъэгу зэошхом ыкIи зэо зэфэшъхьаф­хэм яветеранхэр, ахэм сэкъатныгъэ ащыхэзыхыгъэхэр, хэушъхьафыкIыгъэ дзэ операцием хэлажьэхэрэр ыкIи ахэм яунагъохэр, сэкъатныгъэ зиIэхэр ыкIи сабый сэкъатхэм алъыплъэхэрэр, сабыибэ зэрыс унагъохэр, гъот макIэ зиIэ унагъохэр, нэмыкIхэри.
2023-рэ илъэсым къыщыублагъэу 2025-рэ илъэсым нэс фэгъэкIотэныгъэ зиIэ нэбгырэ 1650-мэ «Газпромым» зыкъыфагъэзагъ, ахэм ащыщэу 1333-мэ ыпкIэ зыхэмылъ IэпыIэгъу аратыгъ, 956-мэ газыр афатIупщыгъ.
— «Газпромым» епхыгъэу Iоф зышIэрэ зыкI клиент гупчэхэм сыда мэхьанэу яIэр ыкIи тыда ахэр зыдэтхэр?
— Гъэстыныпхъэ шхъуантIэм епхыгъэ упчIэу къэуцухэрэр цIыфым зы чIыпIэм щызэхифын ылъэкIынэу зыкI клиент гупчэхэр дгъэпсыгъэх. Охътэ кIэкIым къыкIоцI цIыфхэм яупчIэхэм яджэуапхэр агъотынхэ алъэкIыщт. Мы мафэм ехъулIэу Адыгэ Республикэм мыщ фэдэ гупчи 10 щэлажьэ. 2025-рэ илъэсым поселкэу Каменномостскэм щыпсэухэрэ нэбгырэ минищым афытегъэпсыхьэгъэ мыщ фэдэ гупчэ къыщызэIуахыгъ.
— Гъэстыныпхъэ шхъуантIэр иунэ зэрэщигъэфедэрэм епхыгъэ зэзэгъыныгъэр цIыфым ымышIы­гъэмэ, пшъэ­дэкIыжь рагъэхьын ылъэкIыщта?
— Фэтэрыбэу зэхэт унэ ыкIи чIылъэ унэ пэпчъ зэрыпщэрыхьэхэрэ хьакухэр, къэзыгъэфэбэрэ котелхэр ыкIи псыр зыгъэфабэрэ котелхэр арытых. Гъэстыныпхъэ шхъуантIэр Iэрыфэгъу ыкIи зэкIэми тесагъ, ау бэрэ тщыгъупшэу къыхэкIы ащ щынагъоу къыздихьын ылъэ­кIыщтыр.
ЦIыфхэм газыр зэрагъэфедэрэмкIэ «Газпромым» зэзэгъыныгъэ дэшIыгъэныр шIокI зимыIэ шапхъэу щыт. Непэрэ мафэм ехъулIэу абонент мини 183,6-м щыщэу мини 157,6-мэ, процент 86-мэ зэзэгъыныгъэхэр ашIыгъэх. Абонент мин 26-мэ хэбзэгъэуцугъэм ишапхъэхэр аукъохэзэ япсауныгъэ зэщагъэкъон зэралъэкIыщтыр къагурыIорэп.
Хэбзэгъэуцугъэм къызэригъэнафэрэмкIэ, газ оборудование зычIэт унэхэм ябысымхэу щынэгъончъэным ишапхъэхэр зыукъохэрэм административнэ пшъэ­дэкIыжь арагъэхьыщт. ЦIыф къызэрыкIохэм тазырыр сомэ мини 5 — 10, IэнатIэ зыIыгъхэм — мин 25 — 100-м нэсы, юридическэ лицэхэм сомэ мин 200 — 500-рэ.
КIАРЭ Фатим.