ДзюдомкIэ Къыблэ федеральнэ шъолъырым ипервенствэ къалэу Ермэлхьаблэ щызэхащагъ. Мыщ зыныбжь илъэс 18-м емыхъугъэ кIалэхэр ыкIи пшъашъэхэр хэлажьэх, зэкIэмкIи нэбгырэ 519-мэ заушэты.

Зэнэкъокъум иапэрэ мафэ Адыгэ Республикэм илIыкIохэм гъэхъэгъэшIухэр ашIыгъэх, медалищ къахьыгъ. Тишъолъыр спорт­смен 52-мэ къагъэлъагъо – кIэ­лэ 46-мэ ыкIи пшъэшъи 6-мэ.
Пшъашъэхэм язэнэкъокъу анахь дэгъоу зыкъыщызыгъэлъэгъуагъэр Шъхьэфыжь Радмила, ащ яблэнэрэ чIыпIэр къыхьыгъ. КIалэхэр пштэмэ, килограмм 46-рэ ыкIи 60 къэзыщэчыхэрэм якупхэм ахэтыгъэ тиспортсменхэм хагъэунэфыкIырэ чIыпIэхэр къыдахынхэ алъэкIыгъэп. Ау адритIум медальхэр къащахьы­гъэх. Къанэкъо Салим килограмм 50-м нэс къэзыщэчыхэрэм якуп зыщиушэтыгъ ыкIи тыжьын медаль къыфагъэшъошагъ. Ащ къытекIогъэ закъор Краснодар краим илIыкIоу Арсен Асатрян. Джащ фэдэу Къатмэс Тамерлан ятIонэрэ чIыпIэр къыдихыгъ, Хьаджэкъо Чиназ ящэнэрэ хъугъэ.