Адыгеим икъалэхэм ыкIи ирайонхэм ащеджэрэ кIэлэеджэкIуи 9-мэ Адыгэ Республикэм ипремие къаратыгъ. Лъэныкъо зэфэшъхьафхэмкIэ сэнаущыгъэ зыхэлъ ныбжьыкIэ анахь дэгъухэр илъэс къэс къыхахых. Къэралыгъо программэу «Гъэсэныгъэм хэхъоныгъэ егъэшIыгъэныр» зыфиIорэм ар къыдыхэлъытагъ ыкIи республикэ бюджетым къыхэхыгъэ ахъщэр шIухьафтынэу араты.

Анахь къахэщыгъэ кIэлэеджакIохэр республикэ естественнэ-хьисап еджапIэм щагъэ­шIуагъэх. Ахэм къафэгушIуагъ АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель.
Лъэныкъоу «ШIэныгъэ-техническэ творчествэр ыкIи егъэджэн-ушэтын Iоф­шIэныр» зыфиIорэмкIэ къахэщыгъэх псэупIэу Красногвардейскэм щыщ Ренат Буяновыр, Мыекъуапэ илIыкIохэу Григорий Саакянрэ Олег Черносмагрэ, джащ фэдэу Инэм щыпсэурэ Татьяна Лысенкэр.
Художественнэ творчествэр» зыфиIорэ лъэныкъомкIэ текIоныгъэр къыдахыгъ Мыекъопэ районым щыщэу Полина Бецевамрэ Хьакурынэхьаблэ щыпсэурэ Хъуажъ Самирэрэ.
СпортымкIэ къыхагъэщыгъэх станицэу Джаджэм щыщ Мария Годовниковар, къуаджэу Кощхьаблэ илIыкIоу Зыхьэ Джамилэ, Пэнэжьыкъуае къикIыгъэ Цундышкэ Ислъам.
АР-м гъэсэныгъэмрэ шIэныгъэмрэкIэ и Министерствэ къызэритырэмкIэ, лауреат хъугъэ ныбжьыкIэхэр зэкIэ гъэсэныгъэм, культурэм ыкIи спортым алъэныкъокIэ дунэе, къэралыгъо ыкIи респуб­ликэ зэнэкъокъухэм, олимпиадэхэм ащатекIуагъэх ыкIи хагъэунэфыкIырэ чIыпIэхэр къащафагъэшъошагъэх.
ДЕЛЭКЪО Анет.