Къуаджэу ХьакIэмзые лъэпкъ къашъохэмкIэ икупэу «Жъогъобыным» Москва щыкIогъэ зэнэкъокъум апэрэ чIыпIэмрэ цIэ инэу «Золотая Терпсихора» зыфиIорэмрэ къыщыдихыгъэх.

Щылэ мазэм и 8 — 11-м хореографическэ искусствэмкIэ я III-рэ Урысые фестиваль-зэнэкъокъоу «Зимние чудеса» зыфиIорэр къэралыгъом икъэлэ шъхьаIэ щыкIуагъ. «Лъэпкъ къа­шъор» зыфиIорэ лъэныкъомкIэ Адыгеим илIыкIохэр анахь дэгъухэу къыхагъэщыгъэх. Ансамблэм ипащэу УпчIэжьэгъу Альбинэ къызэриIуа­гъэмкIэ, купым хэт нэбгырэ 13 къэлэ шъхьаIэм ыщэгъагъ ыкIи зэнэкъокъум къэшъуитIу къыщагъэлъэгъуагъ. Апэрэр, «Лъэпэрышъор», дэкIыгъом пае шъхьа­фэу, кIэу агъэуцугъ. ЯтIонэрэр, «Пшъэ­шъэ къашъор» нэ­мыкI зэнэкъокъухэм ахэлэжьагъэу, хагъэунэфыкIырэ чIыпIэхэр къырахьыгъэу щыт.
— Узфэе къашъом фэдиз пщэнэу щытыгъ, арыти, тIур къыщыдгъэлъэгъуагъ. ОсэшI купым хэтыгъэхэр зисэнэхьат хэшIыкIышхо фызиIэ кIэлэегъаджэх, культурэмкIэ университетым щэлажьэх. Къэгъэлъэгъонхэм зэкIэм ауж, джыри зэфэхьысыжьхэр къытамыIожьхэзэ, кIэ­лэцIыкIухэм зыкъызэрагъэлъэгъуагъэр, къыддэхъугъэмрэ къыддэмыхъугъэмрэ къытаIонэу таугъоигъ. ОсэшI купым хэтыгъэхэм агу тырихьыгъэу тыкъыхагъэщыгъ. Пшъэшъэжъыехэм ашъхьацхэр зэрэшIыгъагъэхэм къыщегъэжьагъэу алъакъохэм анэсыжьэу, апкъ зэраIыгъы­гъэм осэ ин къафашIыгъ. Щысэ ттырахын фаеу алъытагъ. КъешIакIэхэр ашIогъэшIэгъон дэдагъэх. Зы къашъор къашIызэ сипшъэшъэжъыехэм ащыщ тефа­гъэти, хагъэ­унэфыкIырэ чIыпIи тыщыгугъыгъэп, ау сценэр цIанлъэу зэрэщытыгъэм пае бэхэм ар къяхъулIагъ. Ары нахь мышIэми, апэрэ чIыпIэмрэ цIэ лъапIэмрэ къэдлэжьынымкIэ ар пэрыохъу тфэхъугъэп. Лъэшэу тыгушIуагъ, — еIо къэшъокIо купэу «Жъогъобыным» ипащэу УпчIэжьэгъу Альбинэ.
Къашъоу «ЛъэпэрышъомкIэ» цIэ инэу «Золотая Терпсихора» зыфиIорэр, «Пшъэ­шъэ къашъомкIэ» апэрэ чIыпIэр къы­лэжьыгъэхэу ансамблэм къыгъэзэжьыгъ.

Аужырэ илъэс зэкIэлъыкIохэм мы къэшъокIо купым ыцIэ инэу Iугъэ. Шъо­лъыр ыкIи Урысые зэнэкъокъухэм ренэу хагъэунэфыкIырэ чIыпIэхэр къащыдехых. КъэIогъэн фае, къуаджэу ХьакIэмзые кIэлэцIыкIу къэшъокIо куп зэриIэр УпчIэжьэгъу Альбинэ ихьатыр. ИлъэсипшIкIэ узэкIэIэбэжьмэ чылэм къызэкIожьым ар зэхищагъ. Альбинэ ­АКъУ-м апшъэрэ гъэсэныгъэ щызэригъэгъотыгъ, ау ицIыкIугъом къыщегъэжьагъэу творчествэр шIу зылъэгъурэ цIыф. Орэд къыIоныр, къэшъоныр сыдигъуи икIас. Ар иушъхьагъоу университет ужым опернэ, академическэ орэд къэIоным зыфигъэсэнэу АР-м искусствэхэмкIэ иколледжэу Тхьабысымэ Умар ыцIэ зыхьырэм чIэхьагъ. Ащ щеджэзэ къэшъокIо купым хэхьэ ыкIи ятIонэрэ сэнэхьат фэхъу. Непэ Альбинэ анахьэу шIу ылъэгъурэ IофитIур зэдегъэлажьэ: адыгэ къашъохэм кIэлэцIыкIухэр афегъасэх, ежьми орэдхэр къеIох. КIэлэегъэджэ ыкIи орэдыIо бэлахьэу ыцIэ Iугъэ.
— Орэд къэсIоныр сикIэсэ дэд, ау кIэлэцIыкIухэм сазэрэдэлажьэри зыхэсчын слъэкIыщтэп. ТIур зэголъ дэд. Шъыпкъэу пIощтмэ, сыд фэдэрэ лъэныкъокIи творческэ IофшIэныр сыгу рехьы: театрэуи шIы, орэдэуи, къашъоуи шIы. Ащ гухахъо хэсэгъуатэ, ащкIэ зыкъэсэгъэлъагъо, — къыздэгощагъ Альбинэ.
Альбинэ ыгъэсэрэ кIэлэцIыкIухэм якъэшъуакIэкIэ зыгъэхьазырыгъэхэр къырашIэжьы. Непэ ар нэбгырэ 26-мэ ХьакIэмзые щадэлажьэ. Къуаджэм имызакъоу, гъунэгъу къутырхэм къарыкIырэ урыс сабыйхэри ахэм ахэтых. Къоджэс­хэр УпчIэжьэгъу Альбинэ лъэшэу фэразэх. Ыгуи ыпси ахэлъэу сабыйхэм Iоф зэрадишIэрэр, шIуагъэу къыхьырэр, зыфигъасэхэрэр алъэгъу. НыбжьыкIэхэм ар адэлэжьэрэ къодыеп, ахещэх, нэ­мыкI творческэ купхэм нэIуасэ афешIых, ядунэееплъыкIэ зырегъэушъомбгъу, лъэпкъ культурэр къеухъумэ, кIэлэцIыкIухэм ахилъхьэрэмкIэ инеущырэ мафэ лъегъэкIуатэ.

Анцокъо Ирин.