АР-м и ЛIышъхьэу КъумпIыл Мурат иунашъокIэ гъот макIэ зиIэ унагъохэу кIэлэцIыкIухэр зэрысхэм ыпкIэ хэмы­лъэу анахь ящыкIэгъэ пкъыгъохэр къазыщаратыщт къулыкъоу «Пункт проката» зыфиIорэр цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэхэу (КЦСОН) республикэм итхэм къащызэIуахыгъэхэу Iоф ашIэ.
Апэу зиIофшIэн зыублагъэр Мые­къуапэ щыIэр ары. «Адыгэ макъэр» ащ еблэгъагъ, къулыкъум IэпыIэгъоу аригъэгъотырэр цIыфхэм къызэрэзыфагъэфедагъэр, фэIо-фашIэхэм зэхъокIыныгъэу афашIыгъэхэр къыригъэIотагъэх цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу Мые­къуапэ дэтым и Унэгъо МФЦ ипащэу Светлана Килиджан.
— Сабыибэ зэрыс унагъохэм ыкIи зигъот макIэхэм яфэныкъуагъэхэр дэгъэзыжьыгъэнхэмкIэ социальнэ IэпыIэгъоу республикэм аригъэгъотырэм, цIыфышъхьэ пчъагъэм ахэгъэхъогъэным фэшI мы чIыпIэр АР-м и ЛIышъхьэу КъумпIыл Мурат иунашъокIэ къызэIуа­хынэу хъугъэ. Апэ ащ иIофшIэн зырегъэжьакIэм (2024-рэ илъэсым) IэпыIэгъу зэригъэгъотыщт купэу агъэнэфэгъа­­гъэр макIэ, джы ащ бэкIэ зырагъэушъом­бгъугъ. Зигъот макIэхэм ямызакъоу, хэушъхьафыкIыгъэ дзэ операцием хэлажьэхэрэм, студент унагъохэм, джащ фэдэу ныбжьыкIэ унагъохэу ны-тыхэу зыныбжь илъэс 35-м шIомыкIыгъэхэр зэрысхэм, шъхьэзэкъо ныхэм мы амалыр къызфагъэфедэн алъэкIыщт, — къы­хигъэщыгъ Светлана Килиджан.
Къулыкъоу «Пункт проката» зыфиIорэр Мыекъуапэ къызыщызэIуахыкIэм бэмэ ашIэщтыгъэп. Ащ пае апэрэ уахътэм ар нахьыбэу цIыфхэм зэрэзэлъарагъэшIэщтым пылъыгъэх. Ащ пае мэкъэгъэIу тхьапэхэр гъэкIэрэкIагъэхэу къыхарагъэ­утыхи, ТОС-хэм, кIэлэцIыкIу IыгъыпIэхэм, IэзапIэхэм ащагощыгъэх, официальнэ сайтхэм, социальнэ хъытыухэм къарагъэхьащт.
ТигущыIэгъу къызэриIуагъэмкIэ, икIыгъэ илъэсым унэгъо 25-рэ фэдизмэ закъыфагъэзагъ, анахьэу къызкIэлъэIугъэхэр курэжъыер, сабыир зыщагъашхэрэ Iанэр, кIуакIэ зыщызэрагъэшIэрэ пкъыгъор, автомобилым рагъэуцорэ тIысыпIэ зэфэшъхьафхэр.
Шъугу къэдгъэкIыжьын, кIэлэцIыкIум ищыкIэгъэ псэуалъэхэр зымыщэфышъу­щтхэм «Пункт проката» зыфиIорэм зыкъыфагъэзэнышъ, сабыим ыныбжь илъэсищым нэсыфэ ищыкIэгъэщтыр ыпкIэ хэмылъэу къыIахын алъэкIыщт. ЗэшIокI зимыIэ унагъохэм, джы хэушъхьафыкIыгъэ дзэ операцием хэлажьэхэрэм ясабыйхэм япIункIэ апэрэ IэпыIэгъур агъотынымкIэ мы къулыкъур амалышIоу щыт. Апэ мэзих пIалъэкIэ зэзэгъыныгъэм адыкIатхэх, ищыкIагъэ хъумэ, нэужым ар лъагъэкIуатэ. Зы унагъом зэтыгъоу пкъыгъуитIу нахьыбэ ратырэп. Мы IэпыIэгъур игъо шъыпкъэу щыт, сыда пIомэ, а пкъыгъохэр зэкIэ къэпщэфынхэр непэкIэ лъапIэх. Сабыим ищыкIагъэхэр ыпкIэ хэмылъэу унагъохэм агъотышъу хъумэ, ящыIэныгъэ къыгъэ­псынкIэщт.
ТигущыIэгъу къызэриIуагъэмкIэ, пкъы­гъоу мы къулыкъум чIагъотэщтхэм ащыщых (къэхъугъакIэхэм къащегъэжьагъэу илъэсищ зыныбжьхэм анэсэу) курэжъые зэфэшъхьафхэр, сабый гъолъы­пIэр, кIоныр езыгъэжьэгъакIэхэр зэрагъэуцохэрэр, автомобилым рагъэуцорэ хэушъхьафыкIыгъэ тIысыпIэхэр, нэмыкIхэри. Къыхэгъэщыгъэн фае, мы къулыкъум IэкIэлъ пкъыгъохэр зэкIэ кIэх. Джыри тапэкIэ ащ къыщымыуцухэу, закъыфэзгъэзэщтхэм япчъагъэ елъы­тыгъэу «Пункт проката» зыфиIорэм иамалхэм ахагъэхъон гухэлъ яI.
Iэшъынэ Сусан.