БаскетболымкIэ Урысыем иапшъэрэ лигэ хэт командэхэм зичэзыу ешIэгъухэр яIагъэх. Адыгеир къэзыгъэлъэгъорэ «Динамо-МГТУ-м» мы илъэсыкIэу къихьагъэмкIэ апэрэ зэIукIэгъуитIу иIагъ.

Республикэм ихьэкIагъ «Южный слон-СКФУ» зыфиIорэр. Спорт комплексэу «Ошъутенэм» щыкIогъэ ешIэгъухэр гъэшIэгъоныгъэх, текIоныгъэр къыдэзыхыщ­тыр къэшIэгъоягъ. Турнир таблицэм командитIур зэкIэлъэкIох.
Апэрэ ешIэгъум Ставрополь краим икомандэ 80:72-у текIоныгъэр къыщыдихыгъ. Мэхьанэшхо зиIагъэр ящэнэрэ едзыгъор ары, мыщ хьакIэхэр хэпшIыкIэу нахь щылъэшыгъэх, очко 11-кIэ ыпэ ишъыгъэх. Тикомандэ хэтхэм нахь къахэщыгъэр Алексей Медведевыр ары, ащ очко 14 ригъэкъугъ.
ЯтIонэрэ зэIукIэгъум бысымхэр нахь щылъэшыгъэх, пчъагъэр – 89:78. «Динамо-МГТУ-м» щешIэхэрэ А. Медведевымрэ Станислав Пиньчукрэ очко 22-рэ зырыз командэм къыфахьыгъ.
Зичэзыу ешIэгъухэр тибаскетболистхэм Тобольскэ щыряIэщтых. Щылэ мазэм и 21 – 22-м «Нефтехимикым» дешIэщтых. Джырэ уахътэм Адыгеим икомандэ я 9-рэ чIыпIэм щыт, пэрытныгъэр зыIыгъыр «Русичи» (Курск).

Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Русичи» (Курск) – 41.
2. «Десна» (Брянск) – 40.
3. «ТСК-Урал-УрГУПС» (Екатеринбург) – 38.
4. «Динамо-2» (Уфа) – 35.
5. «ЦСП-Химки» (Московскэ хэку) – 32.
6. «Нефтехимик» (Тобольск) – 32.
7. «Металлург-Челбаскет» (Челябинскэ хэку) – 31.
8. «Чебоксарские ястребы» (Чебоксары) – 28.
9. «Динамо-МГТУ» (Мыекъуапэ) — 25.
10. «Южный слон-СКФУ» (Ставрополь) — 22.