Хы ШIуцIэ Iушъом щыIэ шапсыгъэмэ ащыщ кIэлэцIыкIу 600 фэдизмэ ИлъэсыкIэ мэфэкIым ипэгъокIэу шIухьафтынхэр Адыгэ Республикэм и ЛIышъхьэу КъумпIыл Мурат къафигъэхьыгъ.

Хабзэ зэрэхъугъэу, илъэ­сыкIэм ипэгъокIэу КъумпIыл Мурат игукъэкIыкIэ шIухьафтын мин 26-рэ агъэхьазыры­гъагъ. IэшIу-IушIухэр, дзыожъыехэу адыгэ тхыпхъэхэмкIэ гъэ­кIэрэкIагъэхэм арылъхэу, рес­публикэм ыкIи Адыгеим ынаIэ зытыригъэтырэ Херсон хэкум арыт кIэлэцIыкIу IыгъыпIэхэм, еджапIэхэм яублэпIэ классхэм якIэлэеджакIохэм аIэкIагъэ­хьагъэх. ШIухьафтын IэпIэшхор къалэу Шъачэ ыкIи ТIопсэ районым ащыIэ псэупIэхэм апае Мыекъуапэ къизыщыжьыгъэр шапсыгъэ Адыгэ Хасэм хэтхэр ары. ПсэупIэхэу ШэхэкIэй, ШэхэкIэй ЦIыкIум, Шэхапэ, Хьа­джыкъо, Къэлэжъ, Нэджыкъо, ПсышIуапэ, Мэкъупсэ, Совет-­Къуаджэ, Ашэ, ТIуапсэ, Агуй-­Шапсыгъэ, Гъуакъо, ШIоикъо, КодэшъхьапIэ, ЦIэпс, Агуяпэ, Ныбыгъу, Тюменскэм ыкIи Ны­джэпсыхъо ащыпсэурэ кIэлэцIыкIухэр ары шIухьафтынхэр зэратыгъэхэр.
«ИлъэсыкIэ хьалэмэтым зы сабый хэмыныным пае тлъэкI къэдгъанэрэп. Анахьэу тынаIэ зытедгъэтыхэрэр гъот макIэ зиIэ унагъохэм, джащ фэдэу хэу­шъхьафыкIыгъэ дзэ операцием хэлажьэхэрэмрэ ветеранхэмрэ якIэлэцIыкIухэр ары. Тисабыймэ ящыIэныгъэ дэхэным, хъярыр къябэкIыным, ясэнаущыгъэ къы­зэIуахыным апае тиамал къы­хьырэр тшIэщт», — къыкIи­гъэтхъыгъ КъумпIыл Мурат.
— Адыгэ Республикэм и ЛIы­шъхьэ ыцIэкIэ илъэсыкIэ шIу­хьаф­тынхэр илъэс пчъагъэ хъу­гъэу къытлъагъэIэсых, сабый­хэр агъэгушIох, ар хэбзэ дахэ хъугъэ. Ащ фэдэ IофыгъошIухэм гур къаIэты, мэфэкIыр зэхыуагъашIэ, сабый пэпчъ фэбагъэ хэлъэу ыгу къенэжьы, — къыхигъэщыгъ Агуй-Шапсыгъэ игурыт еджапIэу N 15-м ипащэу Дмитрий Олейник. — Тицыхьэ телъ а гукъэкI шIагъор илъэсыкIэу тызхахьэрэм ихьа­лэмэтхэм якъежьапIэу зэрэ­хъущтым.
КIэлэцIыкIухэр дэгъоу еджэнхэу, псауныгъэ пытэ яIэнэу, анахь гухэлъ шIагъохэр къадэ­хъунхэу Адыгэ Республикэм и ЛIышъхьэ къазэрэфэ­лъаIорэр зытетхэгъэ открыткэхэм ыкIи шIухьафтынхэм Хьаджыкъо щыщ сабыйхэри лъэшэу агъэгушIуагъэх.
— Мы шIушIэ Iофтхьабзэм гъэ къэс тикIалэмэ мыухыжь гушхуагъэрэ дэхагъэрэ къафе­хьы, — къыщыхагъэщыгъ гурыт еджапIэу N 94-м. — Лъы­тэныгъэ зыфэтшIырэ Мурат Къэралбый ыкъор, тыгу къыддеIэу тызэрэпфэразэр къыотэIо тисабыймэ илъэсыкIэ хьалэмэт къызэрафэпшIыгъэм, зэрэбгъэтхъэжьыгъэхэм апае!
Хы ШIуцIэ Iушъом щыпсэурэ шапсыгъэмэ я Адыгэ Хасэ итхьа­матэу КIакIыхъу Мэджыдэ рэзэныгъэ тхылъ Адыгеим иIэшъхьэтетхэм ыкIи ащ щыпсэу­хэрэм афакIоу ытхыгъ, ар Илъэ­сыкIэмкIэ афэгушIо ыкIи мэфэкI мафэхэм осыбэ къызэресыгъэм къыхэкIэу ом изытет къыздихьыгъэ гумэкIыгъохэм апэуцужьынхэмкIэ зэраготхэр къыщыреIотыкIы. Гъэсэныгъэ организациехэм, кIэлэегъаджэ­хэм, къалэу Шъачэ ыкIи ТIопсэ районым ащыпсэурэ ны-тыхэм ацIэкIэ шапсыгъэ парламентым ипащэ КъумпIыл Мурат рэзэныгъэ гущыIэхэр пигъохыгъэх. «Сабыймэ насыпэу, гушIуагъоу къафэпхьыгъэм шIукIэ, дахэкIэ къыпферэгъэзэжь!», — къыщеIо тхылъэу ыгъэхьыгъэм.
Ныбэ Анзор.