Тиныбджэгъоу ыкIи тиIофшIэгъоу, хы ШIуцIэ Iушъом щыпсэурэ шапсыгъэмэ я Адыгэ Хасэ иобщественникэу, гъэсэныгъэмкIэ Урысыем и отличникэу, Пшызэ изаслуженнэ кIэлэегъаджэу, ТIопсэ шъолъырым и Ныбыгъу къоджэ псэупIэ ицIыф ГъэшIуагъэу ыкIи идепутатэу ЦунтIыжъ Хьамедэ Музэрбэч ыкъом ыныбжь илъэс 75-рэ хъугъэу идунай ыхъожьыгъ.

ЦунтIыжъ лъэкъуацIэр зызэхахырэм, цIыфхэм анэгухэр зэхъокIыхэрэм, гуфэ­бэныгъэр къахэщэу хъухэрэм фэд, ТIопсэ районыр пштэмэ — ар шъыпкъэ дэд. Хьамедэ иIофшIэгъухэм — муниципалитетым игъэсэныгъэ учреждение зэфэшъхьафхэм ащылэжьэрэ кIэлэегъа­джэхэм — ащ игугъу ашIы хъумэ, шъхьэкIэфэныгъэшхо къыфашIы, IэпэIэ­сэныгъэшхо зыхэлъэу, гъэсэгъэшхоу, цIыф зафэу, щытхъур къэзылэжьыгъэу, ныбджэгъу дэгъоу зэрэщытыгъэр къыхагъэщы. Илъэс пчъагъэхэм къакIоцI ащ ригъэджагъэхэм якIэлэегъэджагъэм шъхьащэ фашIы ыкIи гущыIэ фабэхэр фаIох: ыIуагъэм темыкIэу, десэу къытырэм хэшIыкIышхо фыриIэу, анахь шъхьаIэр — цIыфыгъэшхо хэлъэу зэрэщытыгъэр къыхагъэщы. Сыдигъуи къы­одэIущтыгъ, уигумэкI къыгурыIо­щтыгъ, кIэкIэу къэпIон хъумэ — КIэлэегъэджэ шъыпкъагъ!
«КIэлэегъадж — ар сэнэхьат къодыеп, ащ укъыфэхъун фае, кIэлэегъэджэ IофшIэныр сидунае хэмытэу сыщыIэшъу­щтыгъэп сшIошIы», — къы­кIигъэтхъыщтыгъ Хьамедэ. КIэлэегъэджэ унагъоу къызэрыхъухьагъэм ар епцIы­жьыгъэп, ренэу къыхигъэщыщтыгъ исэнэхьат екIурэ гъогур икъоджэ гупсэу Шiоикъо — янэ-ятэхэр зыщеджагъэхэм, зыщыкIэлэегъэджагъэхэм къызэрэще­жьагъэр. ЛIэшIэгъуныкъом ехъурэ уахътэ сабыйхэм яегъэджэн езытыгъэ цIыфым къыIорэр ышIэщтыгъ. Ащ ынэгу кIэкIыгъэх зы системэр нэмыкIымкIэ зэра­хъо­жьыгъэр, урысые еджапIэхэм екIолIакIэу афэхъугъэр, гъэсэныгъэ технологиеу, егъэджэн методикэу кIэу хагъэхьагъэхэр, нэмыкIыбэхэр. КIэлэегъэджэ IофшIэныр ахэм нахь къагъэхьылъэгъагъ, ау ащ пае къэмынэу, ЦунтIыжъ Хьамедэ джыри илъэсыбэрэ исэнэхьат фэшъыпкъэу лэжьагъэ. Ащ игъусагъ ишъхьэгъусэу Светланэ Махьмудэ ыпхъур, ублэпIэ классхэм якIэлэегъаджэ — ахэр Адыгэ къэралыгъо кIэлэегъэджэ институтым щызэдеджагъэх.
— Ари сэщ фэдэ къабз, — щхызэ къыIуатэщтыгъ Хьамедэ Музэрбэч ыкъом. — Илъэс пчъагъэу тызэрэлэжьагъэри, тибгъэхалъхьэхэри, кIэлэеджакIоу тиIагъэхэри.
ШъыпкъэмкIэ, нэбгыритIуми якIэлэ­егъэджэ IофшIэни, ягъэхъагъэхэри зэ­фэдэх, бэп зэрэзэтекIыхырэр — Урысые Федерацием гъэсэныгъэмкIэ и Отличникэу, ТIопсэ районымкIэ илъэсым икIэлэегъаджэу (2003-рэ илъ.), 2008-рэ илъэсым Президентым игрант къызфагъэшъошэгъэ Светланэ Махьмудэ ып­хъум къызщишIэжьырэм сабыйхэр ригъаджэщтыгъэх, Урысые Федерацием гъэсэныгъэмкIэ и Отличникэу, Пшызэ изаслуженнэ кIэлэегъаджэу, Ныбыгъу къоджэ псэупIэм ицIыф ГъэшIуагъэу ЦунтIыжъ Хьамедэ алгебрэмрэ геометриемрэ зэраригъэхьыгъэм фэшъхьафэу, ТIопсэ районым ит гъэсэныгъэ учреждение пчъагъэхэм пэщэныгъэ адызэрихьагъ. Илъэс тIокIитIум ехъурэ ащ административнэ IофшIэныр зегъэцакIэм, Тенгинкэм, Гъотхым, Ныбыгъу ыкIи Агуе адэт учреждениехэр ары. Илъэс заулэрэ, пенсием кIоным ыпэкIэ, Тюменскэм дэт гъэсэныгъэ учреждениеу N 37-м ипэщагъ. Мы еджапIэм Хьамедэ илъэс зэфэшъхьафхэм Iухьажьынэу хъугъэ: 2003-м еджапIэр къызэIуихыгъ, илъэситф тешIагъэу Агуе дэт еджапIэм кIожьыгъэ, 2014-м къыгъэзэжьыгъ. Ар зыщиIэшъхьэтет уахътэм Урысые зэнэкъокъоу «Илъэсым иеджапI» зыфиIорэм щыте­кIуагъ, 2008-рэ илъэсым Урысыем иеджэпIэ анахь дэгъоу ар алъытагъ.
Пэщэ IэнатIэм зэрэIутым елъытыгъэу бэ ыпшъэ дэкIыщтыгъэр, арэу щытми, общественнэ IофшIэнхэр дигъэцэкIэнхэу уахътэ къыхигъэкIыщтыгъ, Адыгэ Хасэм гъэсэныгъэмкIэ икомитет илъэсыбэрэ итхьамэтагъ. Сабыймэ адыгабзэ зэрагъэшIэным, кIэлэегъаджэмэ IэпыIэгъу афэхъуным ренэу пылъыгъ. Шапсыгъэмэ яобщественнэ парламент изэхэсыгъомэ, изэфэсмэ, культурнэ Iофтхьабзэу зэхищэрэмэ Хьамедэ ахэлажьэщтыгъ, гъэзетэу «Шапсыгъэм» иIофшIэнкIэ ишIуагъэ къакIощтыгъ.
Аужырэ илъэсхэр, игупсэмэ къызэраIотэжьырэмкIэ, зэрэсымаджэм пае къэмынэу, гухэгъо уахътэу ХьамедэкIэ щытыгъэх: къорэлъфиплIэу иIэмэ дунаир фэмыхъужьэу ягугъу ышIыщтыгъ, ыныбжь илъэс 70-рэ мыхъузэ къакIэлъыкIогъэ пхъорэлъф цIыкIур къызэхъум, щыIэныгъэм шIухьафтын шIагъо къыфишIыжьыгъэу ылъытэщтыгъ.
— Хьамедэ идунай зэрихъожьыгъэр шъолъырым игъэсэныгъэ системэкIэ чIэнэгъэшху. ТIопсэ районым ит еджапIэхэм яуцун, хэхъоныгъэ ягъэшIыгъэным ащ иIахьышхо хэлъ. Ар пэрыт шъып­къагъ, цIыфыгъэшхо хэ­лъэу, IэпэIэсэныгъэ ин иIэу щытыгъ, сабыйхэм апае щыIагъ. ЦунтIыжъ Хьамедэ ишIэжь кIэлэеджакIохэм, иIофшIэгъугъэ­хэм ыкIи игупсэхэм агъэлъэ­пIэщт, щэIэфэхэ агу илъыщт, — къыкIигъэтхъыгъ ТIопсэ шъо­лъырым гъэсэныгъэмкIэ игъэIорышIапIэ ипащэу Екатерина Зайцевам.
Хы ШIуцIэ Iушъом щыпсэурэ шапсыгъэмэ я Адыгэ Хасэ ыкIи гъэзетэу «Шапсыгъэм» иредакцие лъэшэу агу хэкIыгъ ЦунтIыжъ Хьамедэ дунаим зэрехыжьыгъэр ыкIи иунагъо, игупсэхэм, иIахьылхэм афэтхьаусыхэх. Тиныбджэгъу лъапIэ ыкIи тиIофшIэгъу щыIэныгъэ гъогу шIагъо къыкIугъ, икъоджэ гупсэу ШIоикъо ар щагъэтIылъыжьыгъ.
Тхьэм джэнэт лъапlэ къырет.
Ныбэ Анзор.