Адыгеим и ЛIышъхьэу КъумпIыл Мурат АР-м и Прави­тельствэ зычIэт унэм щызэхищэгъэ зэIукIэр зыфэгъэхьы­гъагъэр общественнэ чIыпIэхэмрэ щагухэмрэ яIыгъын иIо­фыгъохэр ары. Осышхоу къесыгъэм къыздихьыгъэ гумэкIыгъохэм ядэгъэзыжьынкIэ пэщэныгъэ зезыхьэрэ компа­ние­хэм Iофэу ашIагъэр ары анахьэу ынаIэ ащ зытыри­гъэ­тыгъэр.

ЗэIукIэм хэлэжьагъэх АР-м иминист­рэхэм я Кабинет и Тхьаматэу КIэрэщэ Анзауррэ ащ игуадзэу Хъоткъо Хъызыр­рэ, Адыгеим псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан, унэхэм, псэуалъэхэм яшIын зэрэкIорэм ыкIи АР-м ипсэупIэ унэхэм яфонд алъыплъэгъэнымкIэ къэралыгъо инспекциехэм я ГъэIорышIа-
пIэ ипащэу Илона Кравцовар, пэщэныгъэ зезыхьэрэ компаниехэм яIэшъхьэтетхэр, чIыпIэхэм япащэхэр.
КъумпIыл Мурат зэIукIэм хэлажьэ­хэрэм анаIэ зытыраригъэдзагъэр рес­публикэм щыпсэухэрэм къаIэтырэ Iофы­гъохэр ары. ГущыIэм пае, илъэсыкIэм иапэрэ тхьамафэ Адыгеим и ЛIышъхьэ ыцIэкIэ тхьаусыхэ тхылъыбэ къагъэ­хьыгъ. Ахэр зыфэгъэхьыгъагъэхэр фэтэрыбэу зэхэт унэхэм къапэIулъ чIыпIэхэм яIыгъын, пэщэныгъэ зезыхьэрэ компаниехэм ошIэ-дэмышIагъэ зыхэлъ гумэкIыгъор къызэхъум — осышхо къызесым щагухэм яукъэбзынкIэ къатефэрэр зэрамышIагъэр ары.
Илона Кравцовам къызэриIуагъэмкIэ, тхьаусыхэ тхылъхэм ялъытыгъэу Iофтхьэбзэ гъэнэфагъэхэр зэрахьагъэх: ком­паниехэм яIэшъхьэтет пстэуми адэгущыIагъэх, уплъэкIун IофшIэнхэр зэрахьагъэх, хэбзэгъэуцугъэу щыIэр зыу­къуагъэхэм административнэ пщыныжь арагъэхьыгъ. Мы компаниехэм яIофшIэн уигъэрэзэнэу зэрэзэхамыщагъэр анахьэу къызхэкIыхэрэм ащыщэу зигугъу къашIыгъэр техникэмрэ штатым хэт нэбгырэ пчъагъэмрэ зэримыкъухэрэр ары. Щагухэм язытет ауплъэкIу, ащ фэдэ зичэзыу хэукъоныгъэхэр хэзышIыхьэ­хэрэм тазыр атыралъхьэзэ ашIыщт.
«ОшIэ-дэмышIагъэ зыхэлъ гумэкIыгъоу осышхом ыпкъ къикIыгъэр къулыкъу пстэухэмкIи ушэтыпIэу хъугъэ. Зэхэубытагъэу къэпIон хъумэ, а гумэкIыгъом икIэуххэр дэгъэзыжьыгъэнхэр къыддэ­хъугъ. ЗэкIэ амалэу щыIэр дгъэфеди, Iофышхо зэшIотхыгъ. Къалэм осыр щы­IухыгъэнымкIэ гуфакIохэми яшIуагъэ къагъэкIуагъ, нэмыкI муниципалитетхэми ялIыкIохэр IэпыIэгъу къафэхъунхэу къэкIогъагъэх. Мыекъуапэ изакъоу ос кубометрэ мин 70-рэ фэдиз дащыгъ. Электричествэ рыкIуапIэхэр зыпкъ игъэу­цожьыгъэнхэм пае энергетикхэми бэ агъэцэкIагъэр. Ау пэщэныгъэ зезыхьэрэ компаниехэр гумэкIыгъом илъэхъан зэрэзекIуагъэхэм уигъэрэзэнэу щытэп. Фэтэрыбэу зэхэт унэхэм тхьаматэу яIэ­хэм ренэу ахэм зэпхыныгъэ адыряIэн, цIыфхэр зыгъэгумэкIыхэрэм защагъэ­гъозэн, а унэхэм ачIэсхэм яфэIо-фа­шIэхэр икъоу зэшIохыгъэнхэм тегъэ­псыхьагъэу яIофшIэн зэхащэн фае. Пшъэ­дэкIыжь зыхьырэ пстэуми сялъэIу псынкIэу ыкIи зэдегъэштэныгъэ ахэлъэу япшъэрылъхэр агъэцэкIэнхэу», — къыIуагъ АР-м и ЛIышъхьэ.
Ащ нэужым джырэ Iофхэм язытет фэгъэхьыгъэ къэбарым едэIугъэх. Мы лъэхъаным коммунальнэ ыкIи гъогухэм афэгъэзэгъэ къулыкъухэм гъэлъэшыгъэ шIыкIэм тетэу IофшIэныр лъагъэкIуатэ. ЧIыпIэ пстэуми япащэхэм къызэраIуагъэмкIэ, къэхъун ылъэкIыщтым фэхьазырых. Гъогухэм яукъэбзын техникэ 83-рэ фэгъэзагъ. ИщыкIагъэ хъумэ, ма­шинэхэм япчъагъэ хагъэхъощт. Адыге­им и ЛIышъхьэ пшъэрылъ афишIыгъ чIыпIэхэм япащэхэм гъогухэм ящынэгъончъэнкIэ инспекциехэм гъусэныгъэ адыряIэнэу, гъогухэм автомобильхэр ащызэтыримыхьанхэм фэсакъынхэу.
Пыдзэфэ пытэхэр муниципалитетхэм адэщыгъэнхэмкIэ IофшIэныр зыпкъ рагъэуцуагъ, псыр, фабэр ыкIи гъэстыныпхъэ шхъуантIэр цIыфхэм аIэкIэхьанхэмкIэ псэолъэ пстэуми зыпкъитыныгъэ ахэлъэу Iоф ашIэ. Мыекъопэ ТЭЦ-м электричествэ рыкIуапIэхэм язэщыкъоныгъэхэр дэгъэзыжьыгъэнхэмкIэ IофшIэныр лъегъэкIуатэ. Непэ ехъулIэу щы­кIагъэхэр а лъэныкъомкIэ дагъэзыжьыгъэх, республикэм ипсэуалъэхэр зэкIэ элект­ричествэ хъытыухэм апышIагъэх. Iахьзэхэлъ обществэу «Россети Кубань» зы­фиIорэм икъутамэу Адыгэ электрическэ хъытыухэм ошIэ-дэмышIагъэ къэ­хъумэ нахь тэрэзэу фэхьазырынхэм пае бригадэ 40-рэ техникэ 25-рэ агъэхьазырыгъ. КIуачIэхэмрэ амалхэмрэ имыкъухэмэ, IэпыIэгъу тедзэ агъэфедэным пае подряднэ организациехэм зэзэгъы­ныгъэхэр адашIыгъэх.
ЗэIукIэм икIэуххэм атегъэпсыхьагъэу АР-м и ЛIышъхьэ пшъэрылъ афишIыгъ пэщэныгъэ зезыхьэрэ компаниехэм яIофшIэн лъыплъэнхэу, щыкIагъэу афэ­хъухэрэр дэгъэзыжьыгъэнхэмкIэ Iоф­тхьабзэхэр зэрахьанхэу, зичэзыу бжы­хьэ-кIымэфэ лъэхъаным зыфагъэхьазырын зыхъукIэ ахэр къыдалъытэнхэу. Джыри зы пшъэрылъ афишIыгъ — осы­шхом ыуж зэтырихьэгъэ хэкIыр чIыпIэ­хэм аIущыгъэныр ыкIи гъэкъэ­бзэгъэнхэр.
«ЗэкIэми пшъэрылъэу тиIэр зыфэ­кIожьырэр ищыкIагъэр зэкIэ тшIэныр, чIыопсым изытет сыд фэдизэу къызэщыкъуагъэми, цIыф псэупIэхэр къэбзэнхэр, щынэгъончъэнхэр, гупсэфыпIэу щытынхэр ары. Хэти къытефэрэр ышIэнымкIэ осымрэ щтыргъукIымрэ телъхьапIэ ышIынхэу щытэп. Тигуетыныгъэрэ типшъэдэкIыжьрэ зынэсырэр ащ фэдэ чIыпIэхэм къащэлъагъо», — къыхигъэщыгъ республикэм ипащэ.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.