КъызэтынэкIыгъэ илъэсыкIэ зыгъэпсэфыгъо мафэхэм Адыгеим зекIо нэбгырэ мини 150-рэ фэдизмэ зыщагъэпсэфыгъ. Республикэм зыкъытезыубгъогъэ осышхор пэрыохъу мыхъу­гъагъэмэ, пчъагъэр нахьыбэн ылъэкIыщтыгъ.

Ары нахь мышIэми, блэкIыгъэ илъэсым мыщ фэдэ илъэхъан икъэгъэлъэгъонхэм ягъэпша­гъэмэ мыгъэрэр нэбгырэ мин 30 фэдизкIэ нахьыб. ИлъэсыкIэм ипэгъокIэу хьакIэщхэм зэкIэм чIыпIэхэр яIэжьыгъэхэп. Аужырэ илъэсхэм, хабзэ зэрэхъу­
гъэу, мэзэ заулэ иIэу уцупIэхэр зэбгырахых. ГущыIэм пае, Рос­тов хэкум къикIыгъэ Хлоповхэм яунагъо илъэсныкъокIэ ыпэу хьакIэщэу къызщыуцущтыр ыгъэ­нафи бэджэндыпкIэр ыты­гъагъ. Щылэ мазэм и 6-м къыщегъэ­жьагъэу и 10-м нэс ащ къушъхьэлъэ Адыгеим зыщигъэпсэфыгъ. Нахьыжьэу къэкIонэу зэ­рэримыхъухьагъэм кIэгушIужьыгъ. Арыгъэмэ, осышхом ыпкъ къикIэу мафэхэр шIокIодынхэ ылъэкIыщтыгъ. Мыгъэ ар бэмэ къяхъулIагъ.
— ЧIыопсыр дэхэ дэд. Осы­лъэ Адыгееу тыкъыздэкIуагъэм лъэшэу тигъэгушIуагъ. Ащ ихьатыркIэ илъэсыкIэ мэфэкIхэр пшысэхэкI шъыпкъэм фэдэх. Аужырэ илъэс заулэм мыщ ­
фэдэ уахътэм зыкъытедгъафэу республикэм тыкъэкIо. ТиунагъокIэ лъэшэу тыгу рехьы, — еIо Хлоповхэм яунагъо ибысымэу Анатолий.
— Осыр тшIотхъагъу. Бгым тыкъечъэхы, осрыкIохэкIэ зыкъыретэгъэхьыхы, ос IашкIэ тешIэ, — къыхегъахъо Ана­толий икIэлэ нахьыжъэу Арсений.
Хлоповхэм афэдэу жъугъэу зекIохэр зыщыплъэгъущтыгъэхэр Iажэ къечъэхыпIэхэр ары. Лэгъонакъэрэ Анай гъэхъунэмрэ (ГъозэрыплъэкIэ) апэблэгъэ бгыхэм зэкIэми пIоми хъунэу ахэр ащыгъэпсыгъэх. Джащ фэдэу, зекIохэм гъочIэгъхэр ашIогъэшIэгъоных, Хьаджыкъо, Мышъэкъо къушъхьэ тIуакIэ­хэми, Сырыф псыкъефэххэми якIуалIэх.
Урысыем ошIэ-дэмышIэ Iоф­хэмкIэ и Министерствэ и Гъэ­IорышIапIэу Адыгеим щыIэм зекIохэм япсауныгъэ щынэгъон­чъэным гъунэ лъифыгъ. Шъо­лъырым илъыхъон-къэгъэ­нэжьэкIо къулыкъу ипащэу Дмит­­рий Голубевым къызэри­IуагъэмкIэ, илъэсыкIэ мэфэкI мафэхэм къакIоцI, щылэ мазэм и 1-м къыщегъэжьагъэу и 12-м нэс, лъыхъон-къэгъэнэжьын IофшIэнхэр гъогогъу 13-рэ зэхащагъэх. Пчъагъэм щыщэу 6-р зэпхыгъагъэр IажэкIэ бгымэ къячъэхырэ зекIохэм шъобжхэр атещагъэхэ зэрэхъугъэр ары. Адырэхэр ос куум къыздихьыгъэ гумэкIыгъохэм ядэгъэзыжьын.
— Мы пчъагъэм щыщых гъо­гум ефэхыгъэ автомобилитIоу къэтIэтыжьыгъэхэр, Анай гъэ­хъу­­нэм осым щыхиубытэгъэ зе­кIо нэбгыриблэу къыхэтщы­жьыгъэхэр, бгъагъэ къутагъэхэм къачIэтхыжьыгъэхэр. Шъып­къэр пIощтмэ, илъэсыкIэ мэфэкIхэм къахиубытэу лъы­хъон-къэгъэнэжьын Iофэу мыгъэ ти­Iагъэр макIэ. Ос куу зэрэте­лъыгъэм къыхэкIэу шъобж зытещагъэ хъугъэр бэп. Аужырэ илъэсищыр пштэмэ, ахэм япчъа­гъэ къехызэ макIо. 2021-м а къэгъэлъэгъоныр гъогогъу 40-м нэсыщтыгъ, — еIо Дмитрий Голубевым.
ИлъэсыкIэ мафэхэр блэкIыгъэх, ау ар кIымэфэ зыгъэпсэфыгъо лъэхъаным икIэухэп. Ос телъыщтмэ, гъатхэм ыгузэгум нэс ар кIощт. Ом изытет лъыплъэрэ къулыкъум къызэритырэмкIэ, мы тхьамафэми къе­сыщт. Ащ дакIоу зекIохэм якъа­кIо зэпыущтэп.
Анцокъо Ирин.