Урысые хэутыным и Мафэ ехъулIэу, хабзэ зэрэхъугъэу, Адыгеим и ЛIышъхьэу КъумпIыл Мурат шъолъыр, муниципальнэ къэбарлъыгъэIэс амалхэм яредактор шъхьаIэхэмрэ яжурналистхэмрэ зэIукIэгъу адыриIагъ, ЛIышъхьэм ишIухьафтын къизыхыгъэхэм аритыжьыгъ.

Iофтхьабзэм хэлэжьагъэх АР-м и ЛIышъхьэрэ иминистрэхэм я Кабинетрэ я Администрацие ипащэу Вла­димир Свеженец, АР-м иминистрэхэм я Кабинет и Тхьаматэ игуадзэу, финанс­хэмкIэ иминистрэу Виктор Орловыр, Адыгеим и Къэралыгъо Совет — Хасэм и Тхьаматэ игуадзэу Цэй Эдуард, АР-м и ЛIышъхьэрэ иминистрэхэм я Каби­нетрэ я Администрацие ипащэ игуадзэу Къонэ Заур, республикэм лъэпкъ Iоф­хэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэтбый.
Республикэм ипащэ къэзэрэугъои­гъэ­хэм ямэфэкIыкIэ къафэгушIуагъ, Адыгеим исхэм шъыпкъэныгъэр зылъэпсэ къэбархэр зэраIэкIагъахьэхэрэм, яIоф хэшIыкIышхо зэрэфыряIэм афэшI зэрафэразэр къыIуагъ. АР-м и ЛIышъхьэ зэрэхигъэунэфыкIыгъэмкIэ, цыхьэу къа­фашIырэр, республикэм зыпкъитыныгъэу илъыр ащ нахь егъэпытэ.
«НыбжьыкIэхэр яхэгъэгу шIу алъэгъоу пIугъэнхэм, тарихъ шъыпкъагъэмрэ тихабзэхэмрэ якъэу­хъумэн шъуиIахь зэрахэшъушIы­хьэрэм мэхьанэшхо иI. Хэгъэгум иухъумакIо и Илъэсрэ ТекIоныгъэм ия 80-рэ илъэсрэ къадыхэлъытагъэу гъэрекIо тадэжь щыкIогъэ Iофтхьабзэхэр шъо дэгъоу къэ­жъугъэлъэгъуагъэх. ШъыпкъэмкIэ, хэушъхьафыкIыгъэ дзэ опера­цием хэлажьэхэрэм IэпыIэгъу яты­гъэным ар епхыгъ. Хэушъ­хьа­фы­кIыгъэ дзэ операциер зыщыкIорэ чIыпIэм щыIэ тидзэкIолIхэм ялIыхъужъныгъэ, ахэм яуна­гъохэм яIофхэм язытет, ахэм ­IэпыIэгъу ягъэгъотыгъэнымкIэ Адыгеим щызэшIуахырэ Iофышхор къэжъугъэлъагъозэ, тидзэ­кIолIхэм тызэракъотыр зэха­шIэнымкIэ шъуишIуагъэ къэшъо­гъакIо. Зэращымыгъупшэхэрэр, ­зэрафэгумэкIыхэрэр ахэм зэхашIэ. Мы лъэныкъор джащ фэдэу игъэ­кIотыгъэу тапэкIи къэжъугъэ­лъагъу, анахьэу тынаIэ зытедгъэтыхэрэм ар ащыщ», — къыIуагъ КъумпIыл Мурат.
Республикэм и ЛIышъхьэ агу къызэригъэкIыжьыгъэмкIэ, Урысыем и Президентэу Владимир Путиным унашъо зэришIыгъэм тетэу мыгъэ лъэпкъхэм языкIыныгъэ и Илъэсэу щытыщт. ЦIыф лъэпкъыбэ зыщызэдэпсэурэ Адыгеим сыдигъуи лъэпкъ, дин зэгурыIоны­гъэм мэхьанэшхо реты. ХэбзэухъумэкIо къулыкъухэр, общественнэ организа­циехэр къызыхэлэжьэхэрэ ащ фэдэ IофшIэныр хэбзэ къулыкъу пстэуми ащэкIо. Iофхэр республикэм зыпкъ зэрэщитхэр къэбарлъыгъэIэс амалхэм бэкIэ яшIушIагъэу щыт.

«Пшъэрылъэу зэдытиIэр про­ектхэр щыIэныгъэм щыпхыры­щыгъэ зэрэхъухэрэр къэдгъэлъэ­гъоныр ары. ЯщыIэкIэ-псэукIэ на­хьышIу хъунымкIэ зэшIуахыхэрэр цIыфхэм алъэгъун фае. Инфраструктурэм, экономикэм къыщы­хъурэ зэхъокIыныгъэхэм нахьыбэу шъуатегущыI. Ау ежь цIыфхэм яфэныкъоныгъэхэми шъунаIэ атежъугъэт — псэупIэ-комму­нальнэ хъызмэтым, медицинэм, чIыпIэхэм язэтегъэпсыхьан япхыгъэ Iофыгъохэм афэгъэхьыгъэу на­хьыбэу шъутхы. А лъэныкъохэм Iофыгъохэр зэращызэшIуахыхэрэр икъоу къэжъугъэлъагъу», — ­къыIуагъ Адыгеим и ЛIышъхьэ.
Социальнэ хъытыухэм, къэбарлъы­гъэIэс амалхэм язегъэушъомбгъункIэ Iофэу ашIэн фаер: лэжьакIохэм якъэ­гъотын, лэжьапкIэм, редакциехэр зэрэзэтегъэпсыхьагъэхэм, журналистхэм яIэпэIэсэныгъэ зыкъегъэIэтыгъэным япхыгъэ Iофыгъохэр зэрэзэшIуахыщтхэр КъумпIыл Мурат къыгъэнэфагъэх.
Республикэм и ЛIышъхьэ джащ фэдэу журналистхэм ягъэхьазырынкIэ проектэу ежь журналистхэм къыха­хыгъэм осэшхо къыфишIыгъ. Адыгеим ижурналистхэм я Союз грант IэпыIэ­гъоу къыратыгъэм ишIуагъэкIэ лъэпкъ журналистхэм яегъэджапIэ зэхищагъ, мэзитIум къыкIоцI муниципалитет зэфэ­шъхьафхэм якIэлэеджэкIо 20-м ехъумэ республикэ къэбарлъыгъэIэс амалхэм журналист сэнэхьатым ишъэфхэр аIэ къащырагъэхьагъэх.

КъумпIыл Мурат журналистикэм ылъэ­ныкъокIэ Адыгэ Республикэм и ЛIышъхьэ ишIухьафтынхэр зэIукIэгъум щаритыжьыгъэх. ФэдитIукIэ ахэм ахэхъуагъ, лъэныкъо пэпчъ сомэ мин 400.
Теле-, радио къэтынхэмкIэ шIухьафтыныр зыфагъэшъошагъэр Къэралыгъо телерадиокомпаниеу «Адыгеим» иIофышIэ купэу ток-шооу «Позывной «Вечность» зыфиIорэр зыгъэхьазырыгъэр ары. Ащ хэхьэх къэтыныр зезыщагъэу Ахэджэго Рузаннэ, корреспондентэу Валерия Голубевар, телеоператорхэу Александр Никановымрэ Шъэджэшъэ Азэматрэ, режиссерэу, продюсерэу Хьакъулэ Ратмир. Зещэ гуадзэу ыкIи къырагъэблэгъэгъэ экспертэу щытыгъ Урысыем и ЛIыхъужъэу Цэй Эдуард.
Гъэзетхэмрэ журналхэмрэ къащыхаутыгъэхэмкIэ шIухьафтыныр къызыфагъэшъошагъэр гъэзетэу «Майкопские новости» иредактор-консультантэу Вера Корниенкэм къалэу Курскэ, Донецкэ, Луганскэ народнэ республикхэм зэращыIагъэм икIэуххэм атетэу ытхыгъэ статьяхэр ары. Фронтым къыпэIулъ чIыпIэхэм цIыфхэр зэращыпсэухэрэр, охътэ мыпсынкIэм ахэр IэпыIэгъу зэрэзэфэхъужьхэрэр ащ дэгъоу къыгъэлъэгъуагъ.
Джащ фэдэу зэIукIэгъум Адыгэ Рес­публикэм икъэралыгъо тынхэр къащаратыжьыгъэх. ЩытхъуцIэу «Адыгэ Рес­публикэм изаслуженнэ журналист» зы­фиIорэр къафагъэшъошагъ автоном мысатыу организациеу «Диалог Регионы» зыфиIорэм Адыгэ Республикэм дэлэжьэгъэнымкIэ иотдел ианалитик шъхьаIэу Елена Космачевам, Мыекъопэ районымкIэ гъэзетэу «Маякым» иредактор шъхьаIэ игуадзэу Александра Минаковам, Къэралыгъо телерадиокомпаниеу «Адыгеим» адыгабзэкIэ темати­ческэ къэтынхэр зыщагъэхьазырырэ отделым изещакIоу Нэгэрэкъо Саныет.
Республикэм и ЛIышъхьэ республикэ, чIыпIэ къэбарлъыгъэIэс амалхэм ялIыкIохэм адэгущыIагъ. Журналистхэр Iофыгъоу яIэхэм къатегущыIагъэх, Адыгеим исоциальнэ хъытыухэмрэ икъэбарлъыгъэIэс амалхэмрэ зягъэушъомбгъугъэнымкIэ, республикэм иIофхэм язытеткIэ гупшысэу яIэхэр къыраIотыкIыгъэх.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.