Щылэ мазэм и 2-м Iэшэ зэIу­упIэ­ныгъэхэм ахэкIодэгъэ дзэ­кIолIхэм яшIэжь хагъэунэфыкIыгъ. Ащ фэгъэхьыгъэ шIэжь зэхахьэ Мыекъопэ гарнизоным ­къыпэблэгъэ саугъэтым дэжь щыкIуагъ.

Iофтхьабзэм хэлэжьагъэх хабзэм ирес­публикэ, икъэлэ къулыкъухэм, иобщественнэ организациехэм ялIыкIохэр, депутатхэр, я 131-рэ мотошхончэо бри­гадэм, хэушъхьафыкIыгъэ дзэ опера­-
цием яветеранхэр, фэхыгъэ дзэкIолIхэм ягупсэхэр.
— Дунэе терроризмэм пэуцужьхэзэ ти Хэгъэгу игъунапкъэхэр къэухъумэ­гъэнхэмкIэ зидзэ пшъэрылъхэр зыгъэцэкIэгъэ, Iэшэ зэIуупIэныгъэхэм ахэкIодэгъэ урысые дзэкIолI пстэуми мы мафэм яшIэжь тэгъэлъапIэ, шъхьащэ афэтэшIы. Урысыем къэралыгъуабэ джэгъогъоу къызщыпэуцугъэхэ уахътэми тидзэ­кIолIхэр лIыгъэм ищысэх. Хэушъхьа­фыкIыгъэ дзэ операцием ахэр щыIэхэу къэралыгъом игухэлъхэр къаухъумэх. ТекIоныгъэр яеу ахэм къызэрэтфагъэзэжьыщтым тицыхьэ телъ, — къыIуагъ Урысыем и ЛIыхъужъэу, АР-м и Къэ­ралыгъо Совет — Хасэм и Тхьаматэ игуадзэу Цэй Эдуард.
Шъугу къэдгъэкIыжьын, 1994-рэ илъэ­сым щылэ мазэм и 2-м я 131-рэ мотошхончэо бригадэм аужырэ зэпэуцужьыр къалэу Грознэм щыриIагъ. ИлъэсыкIэр къызщихьащт чэщым ар боевикхэм къаIэтыгъэ мэшIуаем пэхьагъэх. Дзэ пшъэрылъэу яIагъэр Грознэм имэшIокугъогу вокзал аубытыныр ары. А пшъэрылъыр зыгъэцэкIэнэу кIогъэ дзэкъулыкъушIэхэм япэщагъ полковникэу Иван Савиныр. Чэщ-мэфитIум мэшIуаем хэтхэу ахэм вокзалыр къаухъумагъ. Псаоу ащыщ къыхэкIыжьыгъэп, а лъэхъа­ным нэбгыри 100-м ехъу Чэчэным щыфэхыгъагъ. Ахэм, нэмыкI Iэшэ зэIу­упIэныгъэхэм ахэкIодэгъэ дзэкIолIхэми, пстэумкIи нэбгырэ 200-м ехъумэ, ацIэхэр сау­гъэтым тетхагъэх.
ШIэжь зэхахьэм икIэухым дзэкIолIхэр шхончыкIэ дэоягъэх. Iофтхьабзэм хэлэжьагъэхэр фэхыгъэхэм зы такъикърэ афэшъыгъуагъэх, къэгъагъэхэр саугъэтым кIэралъхьагъэх.
Iэшъынэ Сусан.