Урысыем ипрокуратурэ иIофы­шIэ и Мафэ тыгъуасэ хагъэунэфыкIыгъ.

Къулыкъур зызэхащагъэр илъэс 304-рэ зэрэхъурэм епхыгъэу Адыгеим ипрокуратурэ щыкIогъэ мэфэкI зэIукIэм АР-м и ЛIышъхьэу КъумпIыл Мурат хэлэ­жьагъ.
Адыгеим и ЛIышъхьэу КъумпIыл Мурат прокуратурэм икъулыкъухэм ащылажьэхэрэм къафэгушIуагъ ыкIи хэбзэгъэуцугъэр мыукъогъэнымкIэ лъэпсэшIоу ахэр зэрэщытхэр къыхигъэщыгъ.
«Прокуратурэм иветеранхэу ежьхэм ящысэкIэ а шапхъэхэр зыгъэпытагъэхэм, тигупсэ республикэмрэ хэгъэгумрэ яфедэ зыхэлъ IофшIэныр гуетыныгъэ фыряIэу зэрагъэцакIэрэм апае сафэраз. Непэ прокуратурэм щылажьэхэрэм ахэм яIоф лъагъэкIуатэ, бзэджэшIагъэм пэшIуекIорэ бэнэныгъэм шIуагъэ къытыным анаIэ тырагъэты, цIыфхэм яфитыныгъэхэу укъуагъэхэр ыкIи зэрарэу ахьыгъэр зыпкъ игъэуцожьыгъэнхэм адэлажьэх», — къыIуагъ КъумпIыл Мурат.
ЭкономикэмкIэ ыкIи социальнэ лъэныкъомкIэ республикэм ыпашъхьэ ит пшъэрылъхэм къатегущыIэзэ Адыгеим и ЛIышъхьэ къызэрэхигъэщыгъэмкIэ, зэхэубытэгъэ продукцием икъыдэгъэкIын республикэм щыхэхъо, мэкъу-мэщым ыкIи къыдэгъэкIыжьыным нахь зау­шъомбгъу. «ЦIыфхэм неущырэ мафэм яцыхьэ телъын, сыд фэдэ чIыпIэ къин ифагъэхэми къэралыгъор ахэм къызэракъоуцощтыр, къызэриухъумэщтхэр къагурэIо. ЦIыфхэм ящыIакIэ нахьышIу хъунымкIэ ащ мэхьанэшхо иI», — къы­Iуагъ КъумпIыл Мурат.
ЦIыфхэм IофшIэнымкIэ, псэупIэхэмкIэ ыкIи социальнэ лъэныкъомкIэ, предпринимательствэмкIэ яфитыныгъэхэр къэу­хъумэгъэнхэм, къолъхьэ тын-Iыхыным пэу­цужьыгъэным, бюджет мылъкур зэрагъэфедэрэм лъыплъэгъэным, къэралы­гъо программэхэмрэ лъэпкъ проектхэмрэ япхырыщын зэрэкIорэм ыкIи нэмыкI лъэныкъохэм анаIэ тыраригъэдзагъ.
Ащ нэужым къыщыуцугъ хэушъхьафы­кIыгъэ дзэ операцием хэлажьэхэрэм ыкIи иветеранхэм яфитыныгъэхэр къэу­хъумэгъэнхэм. Ащ къызэрэхигъэщыгъэм­кIэ, хэбзэ къулыкъухэр, фондэу «Хэгъэ­гум иухъумакIохэр» зыфиIорэр, правовой ыкIи общественнэ организациехэр, гуфакIохэр ащ дэлажьэх. КъумпIыл Мурат анахьэу анаIэ зытыраригъэдзагъэр дзэ­кIолIхэмрэ ахэм яунагъохэмрэ яIофыгъо­хэр икъоу зэшIохыгъэ хъунхэмкIэ ищыкIэгъэ Iофтхьабзэхэр зэрахьанхэр ары.
Экстремизмэмрэ терроризмэмрэ апэу­цужьыгъэным анахьэу анаIэ ащ тыраригъэдзагъ, ныбжьыкIэхэм ащ фэдэ нэшанэхэр къахэмыфэнхэм, общественнэ-политикэ зыпкъитыныгъэр зэщымыгъэкъогъэным япхыгъэ Iофтхьабзэхэри къыхигъэщыгъэх. Адыгеим и ЛIышъхьэ Владимир Путиным игущыIэхэр агу къы­гъэкIыжьыгъэх. Ащ къызэрэхигъэщыгъэм­кIэ, цIыф жъугъэхэмрэ къэралыгъомрэ прокуратурэм иIофышIэхэм зэшIуахырэ Iофым осэшIу фашIы, тапэкIи якъулыкъу пшъэрылъхэр зэрифэшъуашэу зэрагъэцэкIэщтхэм ицыхьэ тепъ.
Iофтхьабзэм къыщыгущыIагъэх АР-м и Къэралыгъо Совет — Хасэм и Тхьаматэу Владимир Нарожнэмрэ АР-м ипрокурорэу Игорь Шевченкэмрэ. МэфэкIым ехъулIэу прокуратурэм иIофы­шIэхэм ахэр афэгушIуагъэх ыкIи Адыге­имрэ Урысыемрэ ащыпсэухэрэм яфедэ зыхэлъ IофшIэныр гъэхъагъэ хэлъэу лъагъэкIотэнэу афэлъэIуагъ.
Игорь Шевченкэм къызэриIуагъэмкIэ, илъэсэу икIыгъэм прокурорхэм респуб­ликэм щыпсэурэ нэбгырэ мин 25-м ехъумэ яфитыныгъэхэр къаухъумагъэх, хэбзэгъэуцугъэр гъогогъу мин 13-рэ аукъуагъэу къыхагъэщыгъ, IэнатIэ зы­Iыгъ нэбгырэ мини 3,4-м ехъумэ пшъэдэкIыжь арагъэхьыгъ, уголовнэ Iоф 50 фэдиз къафаIэтыгъ.
ЗэIукIэгъум икIэухым прокуратурэм иIофышIэхэу анахь гъэхъэгъэшхохэр зышIыгъэхэм Адыгэ Республикэм икъэ­ралыгъо шIухьафтынхэр, Адыгеим и ЛIы­шъхьэрэ АР-м и Къэралыгъо Совет — Хасэмрэ ярэзэныгъэ тхылъхэр, къулыкъу зэфэшъхьафхэм ятынхэр афагъэ­шъошагъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет