КIэлэцIыкIухэр ыгъэгушIуагъэх
Адыгеим и ЛIышъхьэу КъумпIыл Мурат къуаджэу Кощхьаблэ щыщ Тамирлан зыкIэхъопсыщтыгъэ синтезаторыр, псэупIэу Ханскэм дэс Алисэу пшахъокIэ сурэт шIыгъэным пае къызфагъэфедэрэ Iанэу зыфэягъэр шIухьафтынэу аритыгъ.
КIэлэцIыкIухэм яшIоигъоныгъэхэр зэрыт открыткэхэр Адыгеим и Правительствэ зычIэт унэм чIагъэуцогъэ ИлъэсыкIэ чъыгым республикэм и ЛIышъхьэ къыпихыгъэх. Урысые Iофтхьа-
бзэу «ШIоигъоныгъэхэм я ИлъэсыкIэ чъыг» зыфиIорэм тегъэпсыхьагъэу ар зэхащэгъагъ.
Ащ къыкIэлъыкIогъэ мафэхэм нэмыкI кIэлэцIыкIухэу КъумпIыл Мурат зиоткрыткэхэр республикэ ИлъэсыкIэ чъыгым ыкIи Кремлым хэт Ордэунэшхом чIэтым къапихыгъэхэм яшIоигъоныгъэхэр афигъэцэкIагъэх. А Iофтхьабзэм, хабзэ зэрэхъугъэу, къыхэлэжьагъэх АР-м и Къэралыгъо Совет — Хасэм идепутатхэр, Адыгеим иминистрэхэм я Кабинет хэтхэр, бизнесым илIыкIохэр, республикэм щыпсэурэ цIыфхэм ащыщхэу кIэлэцIыкIухэр гъэгушIогъэнхэр зишэнхэр.
«Урысыем и Президентэу Владимир Путиныр кIэщакIо зыфэхъугъэ шIушIэ Iофтхьабзэр зыфытегъэпсыхьагъэр зипсауныгъэкIэ пыч зиIэ кIэлэцIыкIухэм, щыIэныгъэм чIыпIэ зэжъу ригъэуцуа-
гъэхэм IэпыIэгъу ятыгъэныр ары. ШъэожъыехэмкIи пшъэшъэжъыехэмкIи ИлъэсыкIэр анахь зыдэгуIэхэу зажэхэрэ мэфэкI гушIуагъохэм ащыщ. КIэлэцIыкIухэр хьалэмэт горэм ежэх, тэ, нахьыжъхэм, ахэр зыкIэхъопсыхэрэр шIокI имыIэу къадэхъунхэм ренэу тыпылъ», — къыIуагъ АР-м и ЛIышъхьэ.
Республикэм джащ фэдэу ИлъэсыкIэм епхыгъэ шIушIэ Iофтхьэбзэ заулэ щыкIуагъ. Адыгеим и ЛIышъхьэ и ИлъэсыкIэ чъыг ыкIи киносеансхэм сабыибэ зэрыс унагъохэм, социальнэу мыухъумагъэхэм, хэушъхьафыкIыгъэ дзэ операцием хэлажьэхэрэм якIэлэцIыкIухэр, зипсауныгъэкIэ пыч зиIэхэр, сэнаущыгъэ зыхэлъ кIэлэеджакIохэр ыкIи нэмыкIхэр — пстэумкIи нэбгырэ мини 10 фэдиз къякIолIагъ. Республикэм и ЛIышъхьэ ишIухьафтын IэшIухэмрэ ишIуфэс гущыIэхэмрэ зэкIэхэми алъыIэсыгъэх.
Адыгеим ипэублэ классхэм арыс пстэуми ИлъэсыкIэ шIухьафтынхэр аIэкIэхьагъэх: а 1 — 4-рэ классхэм арысхэм къэмлан мин 26-рэ аратыгъ. Краснодар краим ит къуаджэхэми япэублэ классхэм арысхэм ащ фэдэ шIухьафтын 730-рэ аIэкIагъэхьагъ. Ахэм анэфэшъхьафэу Адыгеим ращыгъэ шIухьафтын IэшIу 10200-рэ Херсон хэкум нагъэсыгъ.